വാക്​സിൻ വിരുദ്ധ ട്വീറ്റുകൾ; എഴുത്തുകാരി നവോമി വുൾഫിനെ വിലക്കി​ ട്വിറ്റർ

വാഷിങ്​ടൺ: കടുത്ത വാക്​സിൻ നിലപാട്​ പുലർത്തുകയും അത്​ സമൂഹ മാധ്യമങ്ങളിൽ പങ്കുവെക്കുകയും ചെയ്​ത അമേരിക്കൻ ഫെമിനിസ്റ്റ്​ എഴുത്തുകാരി നവോമി വുൾഫിന്​ ട്വിറ്ററിൽ വിലക്ക്​. കോവിഡ്​ മഹാമാരിയെ കുറിച്ചും ഇതിന്‍റെ ഭാഗമായ ലോക്​ഡൗൺ, വാക്​സിൻ എന്നിവയെ കുറിച്ചും തെറ്റായ ധാരണകൾ പരത്തുന്നുവെന്ന്​ പറഞ്ഞാണ്​ നടപടി.

വാക്​സിൻ പാസ്​പോർട്ട്​ ഏർപെടുത്താൻ യു.എസ്​ സർക്കാർ തീരുമാനത്തിനെതിരെ കടുത്ത നിലപാടുമായി വുൾഫ്​ രംഗത്തെത്തിയിരുന്നു. ''എണ്ണമറ്റ വംശഹത്യകൾക്ക്​ ഇതുപോലുള്ള തുടക്കമാണ്​'' എന്നായിരുന്നു അന്ന്​ പ്രതികരണം.

വാക്​സിൻ വ്യാപകമായി നൽകിത്തുടങ്ങിയ ഘട്ടത്തിൽ വാക്​സിനെ കുറിച്ച്​ ഇവർ പറഞ്ഞത്​, ''അപ്​ലോഡുകൾ സ്വീകരിക്കാനാവുന്ന സോഫ്​​റ്റ്​വേർ വേദി'' മാത്രമാണെന്നായിരുന്നു. വാക്​സിൻ നൽകിയവരുടെ മൂത്രം അഴുക്കുചാലുകൾ വഴിയും മറ്റു ജലമാർഗങ്ങൾ വഴിയും കൂട്ടമായി ഒഴുകുന്നത്​ തടയണമെന്നായിരുന്നു മറ്റൊരു ട്വീറ്റ്​.

വുൾഫിനെ വിലക്കിയതിനെ പിന്തുണച്ച്​ നിരവധി പേർ രംഗത്തെത്തി. 'വിഡ്​ഢിയായതിന്‍റെ പേരിൽ ആദ്യമായി ട്വിറ്റർ വിലക്കിയ വ്യക്​തിയാകും' ഇവരെന്ന്​ ചിലർ പരിഹസിച്ചു.

എന്നാൽ, അഭിപ്രായ സ്വാതന്ത്ര്യനുള്ള പ്രഹരമാണ്​ വിലക്കെന്ന്​ ചിലർ കുറ്റപ്പെടുത്തി. അമേരിക്കയിൽ വിവാദമുയർത്തിയ നിരവധി ആരോപണങ്ങളുമായി രംഗത്തെത്തിയ ആളാണ്​ വുൾഫ്​.