50​െൻറ നിറവിൽ പുതുമകളോടെ അൽ​െഎൻ മൃഗശാല

അൽ​െഎൻ: യു.എ.ഇയിലെത്തുന്ന വിനോദസഞ്ചാരികളെ ആകർഷിക്കുന്ന അൽ​െഎൻ മൃഗശാല 50 വർഷങ്ങളുടെ നിറവിൽ. 1968ൽ സ്​ഥാപിതമായ മൃഗശാല അര നൂറ്റാണ്ട്​ പിന്നിടുന്നതി​​​െൻറ ഭാഗമായി നിരവധി നവീകരണ പ്രവർത്തനങ്ങൾക്കാണ്​ രൂപം നൽകിയിരിക്കുന്നത്​. കഴിഞ്ഞ ദിവസം മുതൽ മൃഗ​ശാലയിൽ ലൈറ്റ്​ ഷോ ഒരുക്കിയിട്ടുണ്ട്​. മൃഗശാലയിലെ മൃഗങ്ങളുടെ ജീവിതവും ചരിത്രവും മനസ്സിലാക്കാൻ കഴിയുന്ന രീതിയിലാണ്​ ലൈറ്റ്​ ഷോ തയാറാക്കിയിട്ടുള്ളത്​. മാർച്ച്​ അവസാനം വരെ നീണ്ടുനിൽക്കുന്ന ലൈറ്റ്​ ഷോ വൈകുന്നേരം ആറ്​ മുതൽ രാത്രി പത്ത്​ വരെയാണ്​. 10 ദിർഹമാണ്​ പ്രവേശന നിരക്ക്​.

അടിസ്​ഥാനപരമായ മാറ്റങ്ങളും മൃഗശാലയിൽ വരുത്തിയിട്ടുണ്ട്​. പ്രദർശന വസ്​തുക്കൾ വിപുലീകരിക്കുകയും പുതിയവ സ്​ഥാപിക്കുകയും ചെയ്​തിട്ടുണ്ട്​. പ്രവേശന കവാടത്തിൽ കുട്ടികൾക്ക്​ കളിക്കാനായി വിപുലമായ സൗകര്യമാണ്​ ഒരുക്കിയിട്ടുള്ളത്​.കഴിഞ്ഞ മാസം സഫാരി പാർക്കിനോട്​ ചേർന്ന്​ പ്രവർത്തനമാരംഭിച്ച വെള്ളം നിറച്ച ചില്ലുകൂടിനകത്തെ ഹിപ്പോപൊട്ടാമസി​​​െൻറ കളികൾ സന്ദർശകർക്ക്​ വിസ്​മയക്കാഴ്​ച സമ്മാനിക്കുന്നു. നിലവിലുള്ള ഇഴജന്തുക്കളുടെ പാർക്ക്​ പൊളിച്ചുമാറ്റി വിപുലമായ സൗകര്യത്തോടെ പുതിയ പാർക്ക്​ സജ്ജീകരിക്കുമെന്ന്​ അധികൃതർ അറിയിച്ചു.

ഇന്ത്യ, ആ​ഫ്രിക്ക, ഒാസ്​ട്രിയ തുടങ്ങിയ രാജ്യങ്ങളിൽനിന്ന്​ നിരവധി മൃഗങ്ങളെയാണ്​ കഴിഞ്ഞ വർഷം മൃഗശാലയിൽ എത്തിച്ചത്​. കഴിഞ്ഞ വർഷം പ്രജനനത്തിലൂടെ മൃഗങ്ങൾ വർധിച്ചതായും ജീവനക്കാർ പറഞ്ഞു. നിലവിൽ വിവിധ ഇനങ്ങളിൽ പെട്ട 4000ത്തോളം മൃഗങ്ങളെ കാണാൻ അൽ​െഎൻ മൃഗശാലയിലെത്തുന്ന സന്ദർശകർക്ക്​ കഴിയും. ആഫ്രിക്കയിലെ തെക്കുകിഴക്ക്​ മേഖലയിലെ വംശനാശം നേരിടുന്ന മാനുകളും ഇവിടെയുണ്ട്​. ആഗോളതലത്തിൽ പ്രവർത്തിക്കുന്ന ‘സഹാറ കൺസർവേഷൻ ഫണ്ട്​’ എന്ന മൃഗസംരക്ഷണ കൂട്ടായ്​മയിലെ അംഗമാണ്​ അൽ​െഎൻ മൃഗശാല.