സായിദ് ദേശീയ മ്യൂസിയം കുട്ടികള്‍ക്കായി​ നാലു പുസ്തകങ്ങൾ പുറത്തിറക്കി

അബൂദബി: യു.എ.ഇയിലെ ദേശീയ മ്യൂസിയമായ സായിദ് ദേശീയ മ്യൂസിയം രാജ്യത്തെ കുട്ടികള്‍ക്കായി ഇംഗ്ലീഷിലും അറബിയിലുമായി നാലു പുസ്തകങ്ങള്‍ പ്രകാശനം ചെയ്തു. യു.എ.ഇയുടെ പാരമ്പര്യവും സ്വാഭാവിക പരിതസ്ഥിതിയിലും വേരൂന്നിയതാണ് ഈ പുസ്തകങ്ങളുടെ ഉള്ളടക്കങ്ങൾ.

യു.എ.ഇയെ കുറിച്ച്​ യുവ വായനക്കാര്‍ക്ക് ആഴത്തിലുള്ള പഠനാനുഭവം സൃഷ്ടിക്കുന്നതിനായി സ്പര്‍ശന-അനുഭവ ഘടകങ്ങള്‍, പോപ്പ്-അപ്പ് ചിത്രീകരണങ്ങള്‍, ആകര്‍ഷകമായ അനിമേഷനുകള്‍ എന്നിവയുള്‍പ്പെടെയുള്ള സംവേദനാത്മക സവിശേഷതകളോടെയാണ് പുസ്തകങ്ങള്‍ രൂപകല്‍പ്പന ചെയ്തിരിക്കുന്നത്.

പൈതൃകം മുതല്‍ മരുഭൂമിയിലെ പ്രകൃതിദൃശ്യങ്ങള്‍, സമുദ്ര ആവാസവ്യവസ്ഥകള്‍, വൈവിധ്യമാര്‍ന്ന വന്യജീവികള്‍ വരെയുള്ള രാജ്യത്തിന്‍റെ സ്വത്വത്തിന്‍റെ പ്രധാന വശങ്ങള്‍ മനസിലാക്കാൻ ഈ പുസ്തകങ്ങള്‍ കുട്ടികളെ സഹായിക്കും.

ഖുദ് വതി-അണ്ടര്‍ ദ ഡെസേര്‍ട്ട് സ്‌കൈ, കിതാബു- സ്റ്റെപ് ഇന്‍സൈഡ്, ലിസന്‍ ക്ലോസ് ലി, വാട്ട് ഈസ് ദിസ്? അനിമല്‍സ് ഓഫ് ദ യുനൈറ്റഡ് അറബ് എമിറേറ്റ്‌സ്, ഔര്‍ ലൈഫ് ബൈ ദ സീ എന്നിവയാണ് സായിദ് ദേശീയ മ്യൂസിയം പുറത്തിറക്കിയ പുതിയ പുസ്തകങ്ങള്‍.