ശൈഖ്​ സായിദ്​ ജന്മശതാബ്​ദി: നാടെങ്ങും വിപുല പദ്ധതികൾ

അബൂദബി: യു.എ.ഇ രാഷ്​ട്രപിതാവ്​ ശൈഖ്​ സായിദ്​ ബിൻ സുൽത്താൻ ആൽ നഹ്​യാ​​​െൻറ പൈതൃകത്തിനും മൂല്യങ്ങൾക്കുമുള്ള അംഗീകാരമായി അബൂദബി പൊലീസ്​ ‘സായിദ്​ വർഷ പുരസ്​കാരം’ ഏർപ്പെടുത്തി. ശൈഖ്​ സായിദി​െന ലോക നേതാവും ഭാവി തലമുറയുടെ ദീപസ്​തംഭവുമാക്കിയ അദ്ദേഹത്തി​​​െൻറ പൈതൃകവും മൂല്യങ്ങളും പ്രോത്സാഹിപ്പിക്കുക എന്ന ലക്ഷ്യത്തോടെയാണ്​ പൊലീസിൽ ‘സായിദ്​ വർഷ പുരസ്​കാരം’ എന്ന പേരിൽ ആഭ്യന്തര അവാർഡ്​ ഏർപ്പെടുത്തിയതെന്ന്​ അബൂദബി പൊലീസ്​ കമാൻഡർ ഇൻ ചീഫ്​ മേജർ ജനറൽ മുഹമ്മദ്​ ഖൽഫാൻ ആൽ റുമൈതി പറഞ്ഞു.

ലോകത്താകമാനം സമാധാനത്തി​​​െൻറയും സഹിഷ്​ണുതയുടെയും സന്ദേശം വ്യാപിപ്പിക്കാനുള്ള ശൈഖ്​ സായിദ​ി​​​െൻറ പ്രതിബദ്ധത ഉയർത്തിക്കാട്ടുക കൂടിയാണ്​ തങ്ങളുടെ ഉദ്ദേശ്യമെന്നും മുഹമ്മദ്​ ഖൽഫാൻ ആൽ റുമൈതി കൂട്ടിച്ചേർത്തു.വിവിധ പൊലീസ്​ വകുപ്പുകൾക്കാണ്​ പുരസ്​കാരം സമ്മാനിക്കുക. സംസ്​കാരവും വിജ്ഞാനവും, പരിസ്​ഥിതിയും സുസ്​ഥിരതയും, ദാനവും മനുഷ്യത്വവും, സാമൂഹിക വികസനം എന്നീ നാല്​ മുഖ്യ മേഖലകളിൽ വിവിധ വകുപ്പുകൾ നടത്തുന്ന പ്രവർത്തനങ്ങൾ വിലയിരുത്തിയാണ്​ പുരസ്​കാര ജേതാക്കളെ കണ്ടെത്തുക. 

സർക്കാർ ജീവനക്കാർക്ക്​ ബോണസുമായി കൂടുതൽ എമിറേറ്റുകൾ
അബൂദബി: യു.എ.ഇ രാഷ്​ട്രപിതാവ്​ ശൈഖ്​ സായിദ്​ ബിൻ സുൽത്താൻ ആൽ നഹ്​യാ​​​െൻറ നൂറാം ജന്മദിനത്തോടനുബന്ധിച്ച്​ കൂടുതൽ എമിറേറ്റുകൾ സർക്കാർ ജീവനക്കാർക്ക്​ ബോണസ്​ പ്രഖ്യാപിച്ചു. അബൂദബി, ദുബൈ എമിറേറ്റുകൾക്ക്​ പിന്നാലെ അജ്​മാൻ, ഫുജൈറ, റാസൽഖൈമ, ഉമ്മുൽഖുവൈൻ എമിറേറ്റുകളാണ്​ സർക്കാർ ജീവനക്കാർക്കും പെൻഷൻകാർക്കും ഒരു മാസത്തെ അടിസ്​ഥാന ശമ്പളം ബോണസായി നൽകാൻ തീരുമാനിച്ചത്​.
യു.എ.ഇ പ്രസിഡൻറ് ശൈഖ് ഖലീഫ ബിൻ സായിദ് ആൽ നഹ്​യാൻ, യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂം, അബൂദബി കിരീടാവകാശിയും യു.എ.ഇ സായുധ സേനാ ഡെപ്യൂട്ടി സുപ്രീം കമാൻഡറുമായ ജനറൽ ശൈഖ് മുഹമ്മദ് ബിൻ സായിദ് ആൽ നഹ്​യാൻ എന്നിവരുടെ നിർദേശം നടപ്പിലാക്കുന്നതിന്​ വേണ്ടിയാണ്​ വിവിധ എമിറേറ്റ്​ ഭരണാധികാരികൾ ബോണസ്​ വിതരണത്തിന്​ ഉത്തരവ്​ നൽകിയത്​. അജ്​മാൻ സർക്കാറിലെ എല്ലാ ജീവനക്കാർക്കും ബോണസ്​ നൽകാൻ സുപ്രീം കൗൺസിൽ അംഗവും അജ്മാൻ ഭരണാധികാരിയുമായ ശൈഖ് ഹുമൈദ് ബിൻ റാശിദ് ആൽ നുഐമി ഉത്തരവിട്ടു. 

റാസൽഖൈമ സർക്കാർ ജീവനക്കാർക്ക്​ ബോണസ്​ നൽകാൻ സുപ്രീം കൗൺസിൽ അംഗവും റാസൽഖൈമ ഭരണാധികാരിയുമായ ശൈഖ് സഉൗദ് ബിൻ സഖർ ആൽ ഖാസിമി, ഫുജൈറ സർക്കാർ ജീവനക്കാർക്ക്​ ബോണസ്​ വിതരണം ചെയ്യാൻ സുപ്രീം കൗൺസിൽ അംഗവും ഫുജൈറ ഭരണാധികാരിയുമായ ശൈഖ് ഹമദ് ബിൻ മുഹമ്മദ് ആൽ ശർഖി, ഉമ്മുൽഖുവൈനിൽ ബോണസ്​ വിതരണം ചെയ്യാൻ സുപ്രീം കൗൺസിൽ അംഗവും ഉമ്മുൽഖുവൈൻ ഭരണാധികാരിയുമായ ശൈഖ് സഉൗദ് ബിൻ റാശിദ് ആൽ മുഅല്ല എന്നിവരും നിർദേശം നൽകിയിട്ടുണ്ട്​.