‘അ​തെ, ഞാ​ൻ അ​ച്യു​താ​ന​ന്ദ​ൻ സ്വാ​മി​യാ​ണ്...​’

ദു​ബൈ: വ​ർ​ഷം 1997, ഇ.​കെ. നാ​യ​നാ​ർ കേ​ര​ള മു​ഖ്യ​മ​ന്ത്രി​യാ​യി​രി​ക്കു​മ്പോ​ഴാ​ണ്​ വി.​എ​സ്.​ അ​ച്യു​താ​ന​ന്ദ​ൻ ആ​ദ്യ​മാ​യി യു.​എ.​ഇ സ​ന്ദ​ർ​ശി​ക്കു​ന്ന​ത്. ഒ​രു​പ​ക്ഷേ, വി.​എ​സി​ന്‍റെ ആ​ദ്യ വി​ദേ​ശ സ​ന്ദ​ർ​ശ​ന​മാ​യി​രി​ക്കാ​മ​ത്. ഒ​രു ത​ണു​ത്ത വെ​ളു​പ്പാ​ൻ കാ​ല​ത്ത്​ വെ​ളു​ത്ത ജു​ബ്ബ​യും ഷാ​ളും പു​ത​ച്ച്​ ജു​മേ​ര ഹോ​ട്ട​ലി​ന്‍റെ പൂ​മു​ഖ​ത്ത്​ നി​ൽ​ക്കു​ന്ന വി.​എ​സി​ന്‍റെ പു​ഞ്ചി​രി തൂ​കു​ന്ന മു​ഖം കാ​ൽ​നൂ​റ്റാ​ണ്ടി​നി​പ്പു​റ​വും ഇ​ട​തു​പ​ക്ഷ പ്ര​വ​ർ​ത്ത​ക​നും പ്ര​വാ​സി​യു​മാ​യ മോ​ഹ​ന​ന്‍റെ മ​ന​സ്സി​ൽ നി​ന്ന് ഇ​പ്പോ​ഴും​ മാ​ഞ്ഞി​ട്ടി​ല്ല. ഇ​ട​ത്​ സാം​സ്കാ​രി​ക സം​ഘ​ട​ന​യാ​യ ‘ഓ​ർ​മ’​യു​ടെ ആ​ദ്യ രൂ​പ​മാ​യ ‘ദ​ല’​യു​ടെ ജ​ന​റ​ൽ സെ​ക്ര​ട്ട​റി​യാ​യി​രു​ന്നു അ​ന്ന്​ മോ​ഹ​ന​ൻ. സി.​കെ. ലാ​ൽ ആ​യി​രു​ന്നു പ്ര​സി​ഡ​ന്‍റ്.

സൗ​ഹൃ​ദ സ​ന്ദ​ർ​ശ​ന​ത്തി​നാ​യി പ്ര​വാ​സ ലോ​ക​ത്ത്​ എ​ത്തി​യ വി.​എ​സി​നെ എ​തി​രേ​ൽ​ക്കാ​നു​ള്ള ദൗ​ത്യം ദ​ല​യു​ടെ ഭാ​ര​വാ​ഹി​ക​ൾ എ​ന്ന നി​ല​യി​ൽ ഇ​വ​ർ​ക്ക്​ ര​ണ്ടു​പേ​ർ​ക്കു​മാ​യി​രു​ന്നു. കേ​ര​ളം ക​ണ്ട ഏ​റ്റ​വും കാ​ർ​ക്ക​ശ്യ​ക്കാ​ര​നാ​യ സ​മ​ര നാ​യ​ക​ന്‍റെ പ​രി​വേ​ഷ​ത്തി​ൽ നി​ന്ന്​ വി​ത്യ​സ്ത​മാ​യി, പു​ഞ്ചി​രി തൂ​കു​ന്ന, ത​മാ​ശ​ക​ൾ കേ​ട്ട്​ പൊ​ട്ടി​ച്ചി​രി​ക്കു​ന്ന വി.​എ​സി​ന്‍റെ മു​ഖ​മാ​ണ്​ ഓ​ർ​മ​യി​ലു​ള്ള​തെ​ന്ന്​ മോ​ഹ​ന​ൻ പ​റ​യു​ന്നു.

വെ​ളു​ത്ത ജു​ബ്ബ​യും ഷാ​ളും പു​ത​ച്ചു​ള്ള വി.​എ​സി​ന്‍റെ നി​ൽ​പ്​ ക​ണ്ട​പ്പോ​ൾ ജു​മേ​ര ഹോ​ട്ട​ലി​ന്‍റെ സെ​ക്യൂ​രി​റ്റി​ക്കാ​ര​ൻ വ​ന്ന്​​ സ്വാ​മി​യെ എ​വി​ടെ​യോ ക​ണ്ടി​ട്ടു​ണ്ടെ​ന്ന്​ പ​റ​ഞ്ഞ​പ്പോ​ൾ ചി​രി​ച്ചു​കൊ​ണ്ട്​ വി.​എ​സ്​ അ​തി​ന്​ പ​റ​ഞ്ഞ മ​റു​പ​ടി, അ​തെ ഞാ​ൻ അ​ച്യു​താ​ന​ന്ദ​ൻ സ്വാ​മി​യാ​ണെ​ന്നാ​യി​രു​ന്നു. കേ​ട്ടു നി​ന്ന മ​ല​യാ​ളി സു​ഹൃ​ത്തു​ക്ക​ൾ​ക്ക്​ അ​ന്ന്​ മു​ഴു​വ​ൻ പ​റ​ഞ്ഞു ചി​രി​ക്കാ​നു​ള്ള വ​ക​യാ​യി​രു​ന്നു അ​ത്.

11 ദി​വ​സ​ത്തോ​ളം അ​ന്ന്​ യു.​എ.​ഇ​യി​ൽ താ​മ​സി​ച്ച ശേ​ഷ​മാ​യി​രു​ന്നു അ​ദ്ദേ​ഹ​ത്തി​ന്‍റെ മ​ട​ക്കം. വി​ക​സ​ന പാ​ത​യി​ൽ കു​തി​ക്കാ​ൻ യു.​എ.​ഇ​യു​ടെ ഇ​ന്ധ​ന​മാ​യ തൊ​ഴി​ലാ​ളി വ​ർ​ഗ​ത്തി​ന്‍റെ ജ്വ​ലി​ക്കു​ന്ന നേ​താ​വി​ന്​ ഹൃ​ദ്യ​മാ​യ സ്വീ​ക​ര​ണ​മാ​ണ്​ പ്ര​വാ​സി മ​ല​യാ​ളി​ക​ൾ ഒ​രു​ക്കി​യി​രു​ന്ന​ത്​. ദു​ബൈ കൂ​ടാ​തെ, ഷാ​ർ​ജ​യി​ലും അ​ബൂ​ദ​ബി​യി​ലും സ​ന്ദ​ർ​ശ​നം ന​ട​ത്തി​യ അ​ദ്ദേ​ഹം തൊ​ഴി​ലാ​ളി സ​മൂ​ഹ​ത്തെ അ​ടു​ത്ത​റി​യാ​ൻ പ്ര​ത്യേ​ക താ​ൽ​പ​ര്യ​മെ​ടു​ത്തി​രു​ന്നു.

11 ദി​വ​സ​വും താ​മ​സം ഇ​ട​ത്​ സ​ഹ​യാ​ത്രി​ക​നാ​യ ബാ​ബു​ജി​യു​ടെ വീ​ട്ടി​ലാ​യി​രു​ന്നു. പ്ര​വാ​സ ലോ​ക​ത്താ​ണെ​ങ്കി​ലും ദി​ന​ച​ര്യ​ക​ൾ കൃ​ത്യ​മാ​യി പാ​ലി​ക്കാ​ൻ അ​ദ്ദേ​ഹം പ്ര​ത്യേ​കം ശ്ര​ദ്ധി​ച്ചി​രു​ന്ന​താ​യി മോ​ഹ​ന​ൻ പ​റ​ഞ്ഞു. നാ​ട്ടി​ൽ ക​ഴി​ക്കു​ന്ന അ​തേ ഭ​ക്ഷ​ണ​ക്ര​മം ത​ന്നെ​യാ​യി​രു​ന്നു ഇ​വി​ടെ​യും. രാ​വി​ല​ത്തെ യോ​ഗ​യും വൈ​കു​ന്നേ​ര​ത്തെ ന​ട​ത്ത​വും ദു​ബൈ​യി​ലും അ​ദ്ദേ​ഹം തു​ട​ർ​ന്നു.

ബാ​ബു​ജി​യു​ടെ കു​ട്ടി​ക​ൾ​ക്ക്​ നാ​ട്ടി​ൽ നി​ന്നു​വ​ന്ന അ​പ്പൂ​പ്പ​നാ​യി​രു​ന്നു അ​ദ്ദേ​ഹം. കേ​ര​ള​ത്തി​ന്‍റെ വി​ക​സ​ന​ത്തി​ന്‍റെ മു​ക്കാ​ൽ പ​ങ്കും അ​വ​കാ​ശ​പ്പെ​ടാ​ൻ അ​ർ​ഹ​ത​യു​ള്ള മ​ല​യാ​ളി പ്ര​വാ​സി​ക​ൾ​ക്ക്​ വി.​എ​സി​ന്‍റെ വി​യോ​ഗം തീ​രാ​ന​ഷ്ട​മാ​ണെ​ന്നും മോ​ഹ​ന​ൻ പ​റ​യു​ന്നു. സ​മ​ര​നാ​യ​ക​ന്‍റെ ജ്വ​ലി​ക്കു​ന്ന ഓ​ർ​മ​യി​ൽ മ​ന​സ്സി​ൽ പു​ഷ്പാ​ർ​ച്ച​ന ന​ട​ത്തു​ക​യാ​ണ്​ പ്ര​വാ​സ ലോ​കം.