കെ.എൽ 14 അബ്​ദുല്ലകുഞ്ഞി ഫ്രം കാസർകോട് 

ഷാർജ: കാസർകോട് ജില്ലയിലെ തനിഗ്രാമമായ ചേറൂരിലെ കണ്ണത്തിൻമൂലയിൽ  നിന്ന് ഇക്കുറിയും ഒരാൾ ലോകകപ്പ് ഫുട്ബാൾ മത്സരങ്ങളിൽ ആവേശം വിതറാനെത്തും. ഷാർജ രാജ്യാന്തര വിമാനതാവളത്തിലെ പർച്ചേഴ്സിങ് ഓഫീസർ അബ്​ദുല്ല കുഞ്ഞിയാണ് ഇന്ന്​ റഷ്യയിലേക്ക് പുറപ്പെടുന്നത്. 2006 മുതൽ തുടങ്ങിയതാണ് ഈ നേരിട്ട് പോക്ക്. പണ്ടൊക്കെ ഇഷ്​ട ടീമുകളുടെ ജഴ്സി അണിഞ്ഞായിരുന്നു വേദിയിൽ ആവേശം വിതച്ചിരുന്നത്. എന്നാൽ ഇത്തവണ അയാം കെ.എൽ 14 കാസർകോടിയൻ എന്ന് ഡിസൈൻ ചെയ്ത കുപ്പായവുമണിഞ്ഞായിരിക്കും അബ്​ദുല്ല എത്തുക. സ്വന്തം ജില്ലയിലെ ഫുട്ബാൾ ഹരം ലോകമാകെ അറിയിക്കുക തന്നെയാണ് ലക്ഷ്യം. 2006ൽ ജർമനിയിൽ നിന്ന് തുടങ്ങിയ ഫുട്ബാൾ യാത്ര റഷ്യയിലെത്തുമ്പോൾ, അതിരുകളില്ലാത്ത സ്​നേഹത്തി​​​െൻറ വലിയൊരു സൗഹൃനിര തന്നെ കാത്ത് നിൽപ്പുണ്ട് അബ്ദുല്ലയെ. ഈ സുഹൃദ് ബന്ധവും കളികാണാനുള്ള ഉൗർജമാണ്. ഫിഫയുടെ നിയമ പ്രകാരം ഒരാൾക്ക് ഏഴ് കളികൾ കാണാനുള്ള ടിക്കറ്റാണ് ഓൺലൈൻ വഴി ലഭിക്കുക. ഇതി​​​െൻറ കൂടെ നാല് ഗസ്​റ്റ് ടിക്കറ്റും ലഭിക്കും.

അബ്​ദുല്ല കുഞ്ഞി അർജൻറീന ആരാധകരോടൊപ്പം

 

ലോകമാകെ പരന്ന് കിടക്കുന്ന ഈ സുഹൃത്തുകൾ അവരുടെ അതിഥി പട്ടികയിൽ പേരുൾപ്പെടുത്തി അബ്​ദുല്ലയെ ചേർത്ത് പിടിക്കുന്നു. അത് കൊണ്ട്  ഓരോ ലോക കപ്പിലും 15ലേറെ കളികൾ കാണാൻ അബ്​ദുല്ലക്കാവുന്നു. ഇത്തവണത്തെ ലോക കപ്പ് മത്സരങ്ങളിലെ രണ്ട് ക്വാർട്ടർ, സെമി, ഫൈനൽ മത്സരങ്ങൾ കാണാനുള്ള ടിക്കറ്റാണ് ഫിഫ വഴി ലഭിച്ചത്. ബാക്കിയുള്ള കളികാണാനുള്ള ടിക്കറ്റ് നൽകിയത് കൂട്ടുകാരാണ്. കുട്ടികാലത്ത് പന്ത്കളികാണാൻ ടെലിവിഷനുള്ള വീട് തേടി നടന്ന കണ്ണീർ കഥകൂടിയുണ്ട് ഈ ഫുട്ബാൾ യാത്രയിൽ കരുത്തായ്. അന്ന് ഗ്രാമത്തിൽ ടി.വിയുള്ള വീടുകൾ അപൂർവ്വം. ചില വീട്ടുകാർ കളികാണാൻ പോയാൽ ജനൽ തുറന്നിട്ട് കൊടുക്കും, ചിലർ കാലനക്കം കേട്ടാൽ ടി.വി ഓഫാക്കും. പിന്നീട് പഠിച്ച് നല്ല ജോലി സമ്പാദിച്ച് ഷാർജയിലെത്തിയപ്പോൾ ആദ്യം ചെയ്തത് വലിയ സ്​ക്രീനുള്ള ടി.വി വാങ്ങി വീട്ടിൽ വരുന്നവർക്കും പോകുന്നവർക്കും കാണാനുള്ള സൗകര്യം ഒരുക്കലായിരുന്നു. അത് കൊണ്ടും ഫുട്ബാൾ പിരിശം തീരാതെയാണ്​ ലോക കപ്പ് ഫുട്ബാൾ മത്സരങ്ങൾ നേരിൽകാണാനിറങ്ങിയത്​.   ടീമുകളോടെല്ലാം മുഹബത്താണെങ്കിലും ഇഷ്ട്ട ടീം മനസിലുണ്ട്. അവർ ഇറങ്ങുന്ന ദിവസം കാസർകോടൻ ആവേശം കൂടും.