ലോകകപ്പ്​ യോഗ്യത: കച്ചമുറുക്കി യു.എ.ഇ

ദുബൈ: ഖത്തർ ലോകകപ്പിലേക്ക്​ കണ്ണുനട്ട്​ യു.എ.ഇയുടെ പടയൊരുക്കം. അടുത്തമാസം നടക്കുന്ന യോഗ്യത മത്സരങ്ങളിൽ വിജയംകൊയ്​ത്​ ഖത്തർ ടിക്കറ്റുറപ്പിക്കാൻ യു.എ.ഇ ഫുട്​ബാൾ ടീം പരിശീലനം തുടങ്ങി.കോച്ച്​ ബെർട്ട്​ വാൻ മാർവികി​െൻറ നേതൃത്വത്തിലാണ്​ ശനിയാഴ്​ച മുതൽ ടീം പരിശീലനക്കളത്തിലിറങ്ങിയത്​.

കടുത്ത പോരാട്ട ദിനങ്ങളാണ്​ യു.എ.ഇ ടീമിനെ കാത്തിരിക്കുന്നത്​. നിലവിൽ ഗ്രൂപ്​ ജിയിൽ (ഏഷ്യ) നാലാം സ്​ഥാനത്തുള്ള യു.എ.ഇക്ക്​ മികച്ച പ്രകടനം പുറത്തെടുത്താൽ മാത്രമേ യോഗ്യത കടമ്പ കടക്കാനാവൂ. ജൂൺ മൂന്ന്​ മുതൽ 15 വരെയുള്ള 13 ദിവസത്തിനിടെ നാല്​ മത്സരങ്ങളുണ്ട്​. ദുബൈയിൽ നടക്കുന്ന ആദ്യ മത്സരത്തിൽ മലേഷ്യയാണ്​ എതിരാളികൾ.

ഏഴിന്​ തായ്​ലൻഡി​െനയും 11ന്​ ഇ​ൻഡോനേഷ്യയെയും 15ന്​ വിയറ്റ്​നാമിനെയും നേരിടും. അഞ്ച്​ മത്സരത്തിൽ മൂന്നിലും ജയിച്ച വിയറ്റ്​നാമാണ്​ പട്ടികയുടെ തല​പ്പത്ത്​. നാല്​ മത്സരത്തിൽ രണ്ട്​ ജയവും രണ്ട്​ തോൽവിയുമായി ആറ്​ പോയൻറാണ്​​ യു.എ.ഇയുടെ സാമ്പാദ്യം.

നിലവിൽ നാലാം സ്​ഥാനത്താണെങ്കിലും മറ്റ്​ ടീമുകളെ അപേക്ഷിച്ച്​ ഒരു മത്സരം കുറച്ചാണ്​ യു.എ.ഇ കളിച്ചിരിക്കുന്നത്​. ഈ മത്സരംകൂടി ജയിച്ചാൽ രണ്ടാം സ്​ഥാനത്തെത്താൻ കഴിയും. കഴിഞ്ഞവർഷം മത്സരങ്ങൾ നടക്കാത്തതിനാൽ ഒന്നരവർഷത്തിന്​ ശേഷമാണ്​ ടീം യോഗ്യത മത്സരത്തിൽ കളത്തിലിറങ്ങുന്നത്​. എന്നാൽ, ഇതിനിടയിൽ സൗഹൃദ മത്സരങ്ങൾ കളിച്ചിരുന്നു. കഴിഞ്ഞ വർഷം സെപ്​റ്റംബറിൽ മലേഷ്യക്കെതിരെയായിരുന്നു അവസാന യോഗ്യത റൗണ്ട്​ മത്സരം. യു.എ.ഇ 2- 1ന്​ ജയിച്ചു. അടുത്ത യോഗ്യത മത്സരങ്ങളെല്ലാം ദുബൈയിൽ നടക്കുന്നു എന്നത്​ യു.എ.ഇക്ക്​ ഹോം ഗ്രൗണ്ടി​െൻറ ഗുണം ചെയ്യും.

കോവിഡിനെ തുടർന്ന്​ എല്ലാ മത്സരങ്ങളും ഏതെങ്കിലും ഒരു വേദിയിൽ നടത്താൻ ഏഷ്യൻ ഫുട്​ബാൾ കോൺഫെഡറേഷൻസ്​ തീരുമാനിച്ചതോടെയാണ്​ യു.എ.ഇക്ക്​ നറുക്കുവീണത്​.കോച്ച്​ വാൻ മാർവികിന്​ ഇത്​ രണ്ടാം ഊഴമാണ്​. 34 അംഗ ടീമിൽനിന്ന്​ ആറു പേരെ ഒഴിവാക്കി 28 അംഗ ടീമായി കഴിഞ്ഞ ദിവസം പ്രഖ്യാപിച്ചിരുന്നു.

പ്രസിഡൻഷ്യൽ കപ്പ്​ ഫൈനൽ നടക്കുന്നതിനാൽ ഷബാബ്​ അൽ അഹ്​ലി, അൽ നാസർ, അൽ വഹ്​ദാ ക്ലബ്​ ടീം അംഗങ്ങൾ അടുത്തയാഴ്​ചയേ ടീമിനൊപ്പം ചേരൂ.യോഗ്യത മത്സരത്തിന്​ മുന്നോടിയായി മേയ്​ 24ന്​ യു.എ.ഇ ടീമും ജോർഡനുമായി അൽ വാസലിലെ സബീൽ സ്​റ്റേഡിയത്തിൽ സൗഹൃദ മത്സരം കളിക്കുന്നുണ്ട്​. സബീൽ സ്​റ്റേഡിയം, അൽ മക്​തൂം സ്​റ്റേഡിയം എന്നിവിടങ്ങളിലാണ്​ യോഗ്യത മത്സരങ്ങൾ നടക്കുക.