യു.എ.ഇയിൽ തൊഴിലാളികൾക്ക്​ സംരക്ഷണ നിയമം; ഫെബ്രുവരിയിൽ പ്രാബല്യത്തിൽ വരും

ദുബൈ: തൊഴിലാളികൾക്ക്​ അതി​ക്രമങ്ങളിൽ നിന്നും ചൂഷണത്തിൽ നിന്നും സംരക്ഷണം നൽകുന്ന നിയമമൊരുക്കി യു.എ.ഇ. മാനവവിഭവ ശേഷി- എമിറേറ്റൈസേഷൻ മന്ത്രാലയമാണ്​ തൊഴിൽ ബന്ധങ്ങൾ നിയന്ത്രിക്കുന്നതിന്​ പുതിയ ഉത്തരവ് പ്രഖ്യാപിച്ചത്​. യു.എ.ഇ ​പ്രസിഡൻറ്​​ ശൈഖ്​ ഖലീഫ ബിൻ സായിദ്​ ആൽ നെഹ്​യാനാണ്​ നിയമം പുറപ്പെടുവിച്ചത്​. വിവിധ തൊഴിൽ വിഭാഗങ്ങളിലെ ജീവനക്കാർക്ക്​ സംരക്ഷണമൊരുക്കുന്നതും തൊഴിൽ മേഖലയെ അയവുള്ള സമീപനത്തിലേക്ക്​ നയിക്കുന്നതുമാണ്​ നിയമം.

ഫെഡറൽ നിയമത്തിലെ തൊഴിൽ ബന്ധങ്ങളുടെ നിയന്ത്രണം സംബന്ധിച്ച 2021ലെ 33ാം നമ്പർ നിയമം​ അടുത്ത വർഷം ഫെബ്രുവരി 2മുതൽ പ്രാബല്യത്തിൽ വരും. തൊഴിൽ നിയമത്തിൽ സമീപ കാലത്തുണ്ടാകുന്ന ഏറ്റവും സുപ്രധാനമായ ഭേദഗതിയാണിത്​. സാങ്കേതിക പുരോഗതിക്കും കോവിഡ് സാഹചര്യത്തിനും ഇടയിൽ അതിവേഗം മാറിക്കൊണ്ടിരിക്കുന്ന തൊഴിൽ രംഗം പരിഗണിച്ചാണ്​ പുതിയ നിയമം നടപ്പിലാക്കുന്നതെന്ന്​ മാനവവിഭവ ശേഷി- എമിറേറ്റൈസേഷൻ മന്ത്രി ഡോ. അബ്​ദുറഹ്​മാൻ അൽ തവാർ പറഞ്ഞു. ഫുൾടൈം, പാർടൈം, താൽകാലിക ജോലികൾക്കെല്ലാം സഹായകമാകുന്നതാണ്​ നിയമമെന്നാണ്​ വിലയിരുത്തപ്പെടുന്നത്​.

പ്രൊബേഷൻ ആറുമാസത്തിൽ കൂടരുത്​

പ്രൊബേഷൻ ആറു മാസത്തിൽ കൂടരുതെന്ന്​ നിയമം അനുശാസിക്കുന്നു. തൊഴിലാളികളുടെ രേഖകൾ അനധികൃതമായി പിടിച്ചെടുക്കുന്നത്​ ഇത്​ തടയുന്നുമുണ്ട്​. ഒരു ബിസിനസ്​ സ്​ഥാപനത്തിൽ നിന്നും മറ്റൊന്നിലേക്ക്​ മാറാൻ തൊഴിലാളിക്ക്​ അനുവദം ലഭിക്കും. തൊഴിൽ കാലാവധി കഴിഞ്ഞാൽ രാജ്യം വിടണമെന്ന്​ ഉടമക്ക്​ നിർബന്ധിക്കാൻ പുതിയ നിയമം പ്രാബല്യത്തിലായാൽ കഴിയില്ല. ഈ വകുപ്പുകളെല്ലാം പ്രവാസികളടക്കമുള്ളവർക്ക്​ ഏ​റെ ഉപകാരപ്രദമായ മാറ്റങ്ങളാണെന്നാണ്​ വിലയിരുത്തപ്പെടുന്നത്​.

സ്​ത്രീകൾക്ക്​ സംരക്ഷണം

തൊഴിലിടത്തിൽ സ്​ത്രീകളെ സംരക്ഷിക്കുന്നതിനും അവരെ ശാക്​തീകരിക്കുന്നതിനുമുള്ള ഘടകങ്ങളെ പ്രോൽസാഹിപ്പിക്കുന്നതാണ്​ നിയമം. തൊഴിലാളികൾക്കെതിരെ അവരുടെ മേലുദ്യോഗസ്ഥർ അല്ലെങ്കിൽ സഹപ്രവർത്തകർ നടത്തുന്ന ലൈംഗിക പീഡനം, ഭീഷണിപ്പെടുത്തൽ, അല്ലെങ്കിൽ വാക്കാലോ ശാരീരികമോ മാനസികമോ ആയ അക്രമം എന്നിവയും ഇത് നിരോധിക്കുന്നു. വംശം, നിറം, ലിംഗം, മതം, ദേശീയത തുടങ്ങിയവയുടെ ഏത്​ തരത്തിലുള്ള വിവേചനവും പുതിയ നിയമം കർശനമായി വിലക്കുന്നു.

യു.എ.ഇ പൗരന്മാരുടെ പങ്കാളിത്തം വർധിക്കും

യു.എ.ഇ പൗരന്മാരുടെ പങ്കാളിത്തവും മൽസര ശേഷിയും വർധിപ്പിക്കുന്നതിന്​ നിയമം സഹായിക്കും. വ്യവഹാരത്തി​െൻറ എല്ലാ ഘട്ടങ്ങളിലും തൊഴിൽ കേസുകളെ ജുഡീഷ്യൽ ഫീസിൽ നിന്ന് ഒഴിവാക്കിയിട്ടുണ്ട്​. തൊഴിൽ കരാറിലെ ഇരു കക്ഷികളുടെയും അവകാശങ്ങൾ സന്തുലിതമായി ഉറപ്പുനൽകുകയും സംരക്ഷണം നൽകുകയും ചെയ്യുന്നതുമാണ്​ നിയമം.