വിവാഹമോചനത്തിന്​ 100കോടി ദിർഹം ആവശ്യപ്പെട്ട്​ യുവതി

അബൂദബി: വിവാഹമോചന നഷ്ടപരിഹാരമായി 100കോടി ദിർഹം ആവശ്യപ്പെട്ട്​ കബീരിയൻ യുവതിയുടെ ഹരജി. യു.എ.ഇയിലെ ഏറ്റവും ഉയര്‍ന്ന തുക ആവശ്യപ്പെടുന്ന വിവാഹമോചന നഷ്ടപരിഹാര​ ഹരജിയാണിത്​.

രാജ്യത്ത്​ ദീര്‍ഘകാലമായി താമസക്കാരിയാണ്​ ഹരജിക്കാരിയായ കരീബിയന്‍ വനിത. ഗള്‍ഫ് മേഖലയിലെ തന്നെ ഏറ്റവും ഉയര്‍ന്ന വിവാഹമോചനദ്രവ്യമായിരിക്കും ഇതെന്ന് അബൂദബി സിവില്‍, ഫാമിലി കോടതിയില്‍ യുവതിക്കു വേണ്ടി ഹാജരാവുന്ന അഭിഭാഷകൻ പറയുന്നു.

18വർഷമായി യു.എ.ഇയിൽ താമസിക്കുന്ന മുസ്​ലിം ദമ്പതികളാണ് അബൂദബി സിവില്‍, ഫാമിലി കോടതിയില്‍ വിവാഹ മോചന നടപടികളിലേക്ക് കടന്നിരിക്കുന്നത്. ദമ്പതികള്‍ അതിസമ്പന്ന കുടുംബത്തിലെ അംഗങ്ങളാണ്. അതേസമയം ഇരുവരുടെയും സ്വകാര്യ വിവരങ്ങള്‍ പുറത്തുവിട്ടിട്ടില്ല. ഈ വര്‍ഷം മേയില്‍ വിദേശ ദമ്പതികളുടെ വിവാഹമോചനം 1 കോടി ദിര്‍ഹമിലേറെ വിവാഹമോചനദ്രവ്യം നല്‍കി തീര്‍പ്പാക്കിയതാണ് യു.എ.ഇയിലെ ഏറ്റവും വലിയ വിവാഹമോചന ഒത്തുതീര്‍പ്പായി വിലയിരുത്തപ്പെടുന്നത്​.