വെ​ബ്സൈ​റ്റ് അ​റ്റ​കു​റ്റ​പ്പ​ണി; പാ​സ്പോ​ർ​ട്ട് സേ​വ​ന​ങ്ങ​ൾ മു​ട​ങ്ങും

ദു​ബൈ: ‘പാ​സ്‌​പോ​ര്‍ട്ട് സേ​വാ’ വെ​ബ്സൈ​റ്റി​ന്‍റെ സാ​​ങ്കേ​തി​ക അ​റ്റ​കു​റ്റ​പ്പ​ണി കാ​ര​ണം പാ​സ്​​പോ​ർ​ട്ട് സേ​വ​നം വ്യാ​ഴാ​ഴ്ച വൈ​കീ​ട്ട് മു​ത​ൽ തി​ങ്ക​ളാ​ഴ്ച വ​രെ ത​ട​സ്സ​പ്പെ​ടു​മെ​ന്ന് യു.​എ.​ഇ​യി​ലെ ഇ​ന്ത്യ​ൻ എം​ബ​സി അ​റി​യി​ച്ചു. യു.​എ.​ഇ സ​മ​യം വ്യാ​ഴാ​ഴ്ച വൈ​കീ​ട്ട് 6.30മു​ത​ൽ (ഇ​ന്ത്യ​ൻ സ​മ​യം രാ​ത്രി എ​ട്ട്), സെ​പ്റ്റം​ബ​ർ ര​ണ്ട് തി​ങ്ക​ളാ​ഴ്ച പു​ല​ർ​ച്ച 4.30 (ഇ​ന്ത്യ​ൻ സ​മ​യം രാ​വി​ലെ ആ​റു) വ​​രെ​യാ​ണ് വെ​ബ്സൈ​റ്റ് സ​ർ​വി​സ് കാ​ര​ണം മു​ട​ങ്ങു​ന്ന​ത്. ഇ​ക്കാ​ല​യ​ള​വി​ൽ പാ​സ്​​പോ​ർ​ട്ട്, താ​ൽ​ക്കാ​ലി​ക പാ​സ്​​പോ​ർ​ട്ട്, പി.​സി.​സി ഉ​ൾ​പ്പെ​ടെ സേ​വ​ന​ങ്ങ​ൾ ല​ഭി​ക്കി​ല്ലെ​ന്ന് യു.​എ.​ഇ​യി​ലെ ഇ​ന്ത്യ​ൻ എം​ബ​സി അ​റി​യി​ച്ചു. തി​ങ്ക​ളാ​ഴ്ച രാ​വി​ലെ മു​ത​ൽ പ​തി​വു​പോ​ലെ സേ​വ​ന​ങ്ങ​ൾ ല​ഭ്യ​മാ​കു​ന്ന​താ​ണ്. അ​തേ​സ​മ​യം, എം​ബ​സി​യി​ലെ കോ​ൺ​സു​ലാ​ർ, വി​സ സേ​വ​ന​ങ്ങ​ൾ പ​തി​വു​പോ​ലെ ത​ന്നെ തു​ട​രും.

അ​തേ​സ​മ​യം, ഇ​ന്ത്യ ഉ​ൾ​പ്പെ​ടെ രാ​ജ്യ​ങ്ങ​ളി​ൽ വെ​ള്ളി​യാ​ഴ്ച​ത്തേ​ക്ക് ന​ൽ​കി​യ എ​ല്ലാ പാ​സ്​​പോ​ർ​ട്ട് സം​ബ​ന്ധ​മാ​യ അ​പ്പോ​യി​ൻ​മെ​ന്റു​ക​ളും റ​ദ്ദാ​ക്കി​യ​താ​യി ‘പാ​സ്​​പോ​ർ​ട്ട് സേ​വ’ വെ​ബ്സൈ​റ്റ് അ​റി​യി​ച്ചു. അ​ന്നേ​ദി​വ​സം അ​പ്പോ​യി​ൻ​മെ​ന്റു​ക​ള്‍ ല​ഭി​ച്ച അ​പേ​ക്ഷ​ക​ർ​ക്ക് പു​തി​യ തീ​യ​തി എ​സ്.​എം.​എ​സ് വ​ഴി അ​റി​യി​ക്കും.