ബോധവത്​കരണത്തിന്​  ‘മാലിന്യവസ്​ത്രം’ ധരിച്ച്​ യുവതികൾ

ദുബൈ: എത്രയെത്ര മാലിന്യമാണ്​ നാം ഭൂമിയുടെ മാറിലേക്ക്​ വലിച്ചെറിയുന്നുവെന്ന്​ ചിന്തിച്ചിട്ടുണ്ടോ? അതറിയാൻ അവ കൂട്ടിവെക്കണം. അതി​​​െൻറ കനമറിയാൻ ഒന്ന്​ പൊക്കിനോക്കണം. അപ്പോൾ മനസ്സിലാകും കോടിക്കണക്കിന്​ മനുഷ്യർ മാലിന്യം കൊണ്ട്​ ഭൂമിക്ക്​ നൽകുന്ന ഭാരമെത്രയെന്ന്​. 
ഏതായാലും ഇൗയൊരു പരീക്ഷണത്തിന്​ രണ്ടും കൽപിച്ചിറങ്ങിയിരിക്കുകയാണ്​ ദുബൈയിൽ താമസിക്കുന്ന മാറിത്ത പീറ്റേഴ്​സും മറിസ്​ക നീലും. ഒാരോ ദിവസവും തങ്ങൾ ‘ഉൽപാദിപ്പിക്കുന്ന’ മാലിന്യം വസ്​ത്രരൂപത്തിൽ അണിയുകയാണ്​ ഇവർ. ഭൗമമണിക്കൂർ ആചരിച്ച മാർച്ച്​ 24നാണ്​ ഇവർ ഇൗ യജ്ഞം ആരംഭിച്ചത്​. ഭൗമദിനമായി ആചരിക്കുന്ന ഏപ്രിൽ 22 വരെ ഇത്​ തുടരാനാണ്​ തീരുമാനം. 

ഉപയോഗിച്ച്​ വലിച്ചെറിയുന്ന വസ്​തുക്കൾ വളരെ കുറച്ച്​ സുസ്​ഥിര ജീവിതരീതി പിന്തുടരുന്ന യുവതിയാണ്​ മാറിത്ത. ഇതിനായി ചായക്കപ്പുകളും സ്​പൂണുകളുമെല്ലാം കൂടെ കൊണ്ടുനടക്കുകയാണ്​ ഇവർ. അതിനാൽ ഇത്ര ദിവസം പിന്നിട്ടിട്ടും രണ്ട്​ കിലോയിൽ കുറഞ്ഞ മാലിന്യമേ ഇവർ വഹിക്കുന്നുള്ളൂ. 
എന്നാൽ, ശരാശരി ജീവിതം നയിക്കുന്ന മറിസ്​ക ഒരു ദിവസം രണ്ട്​ മുതൽ മൂന്ന്​ വരെ കിലോഗ്രാം മാലിന്യം ‘ഉൽപാദിപ്പിക്കുന്നു. 35 കിലോഗ്രാമിലധികം ഭാരമുള്ള ‘മാലിന്യവസ്​ത്ര’മാണ്​ ഇപ്പോൾ ഇവർ വഹിക്കുന്നത്​. കൂടാതെ ഒരു ട്രോളിയിൽ ​മാലിന്യം വേറെയുമുണ്ട്​. മാലിന്യവസ്​ത്രം ധരിച്ചത്​ കണ്ട്​ ആളുകൾ അന്ധാളിച്ച്​ നോക്കുന്നതായി മറിസ്​ക ഇൻസ്​റ്റഗ്രാം പോസ്​റ്റിൽ പറയുന്നു. ചോദ്യങ്ങളുമായെത്തുന്നവരോട്​ മാലിന്യം കുറക്കേണ്ടതി​​​െൻറ ആവശ്യകതയെ കുറിച്ച്​ സംസാരിച്ച്​ ബോധവത്​കരണം നടത്തി മുന്നേറുകയാണ്​ ഇവർ.