വാർണർ ബ്രോസ്​ വേൾഡ്​  ഉദ്​ഘാടനം ചെയ്​തു

അബൂദബി: വാർണർ ബ്രോസ്​ വേൾഡ്​ അബൂദബി യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം, അബൂദബി കിരീടാവകാശിയും സായുധസേന ഡെപ്യൂട്ടി സുപ്രീം കമാൻഡറുമായ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ എന്നിവർ ചേർന്ന്​ തിങ്കളാഴ്​ച ഉദ്​ഘാടനം ചെയ്​തു. സന്ദർശകർക്ക്​ ബുധനാഴ്​ച മുതൽ പ്രവേശനം നൽകും. 

നമ്മുടെ കുടുംബങ്ങൾക്ക്​ വിനോദ കേന്ദ്രവും വിനോദസഞ്ചാര മേഖലയിലെ സുപ്രധാന ചുവടുവെയ്​പുമായ വാർണർ ബ്രോസ്​ വേൾഡ്​ തലസ്​ഥാനത്തെ പുതിയ നാഴികക്കല്ലാണെന്ന്​ ശൈഖ്​ മുഹമ്മദ്​ ബിൻ റാശിദ്​ ട്വിറ്ററിൽ കുറിച്ചു. യാസ്​ ​െഎലൻഡിലെ കുടുംബ വിനോദ സഞ്ചാരം പ്രോത്സാഹിപ്പിക്കുന്ന തരത്തിലുള്ള മറ്റൊരു ആകർഷണമാണ്​ വാർണർ ബ്രോസെന്ന്​ ശൈഖ്​ മുഹമ്മദ്​ ബിൻ സായിദ്​ അഭിപ്രായപ്പെട്ടു. 

ഏഴ്​ വർഷം മുമ്പ്​ നിർമാണം ആരംഭിച്ച വാർണർ ബ്രോസ്​ വേൾഡിന്​ 100 കോടി ദിർഹമാണ്​ നിർമാണ ചെലവ്​. 16 ദശലക്ഷം ചതുരശ്രയടി വിസ്​തീർണമുള്ള ഇവിടെ 29 റൈഡുകൾ ഒരുക്കിയിട്ടുണ്ട്​. ഗോതം സിറ്റി, മെട്രോപോളിസ്​, കാർട്ടൂൺ ജങ്​ഷൻ, ബെഡ്​ റോക്ക്​, ഡൈനാമിറ്റ്​ ഗൾച്​, വാർണർ ബ്രോസ്​ പ്ലാസ എന്നീ സോണുകളിൽ ലൈവ്​ ഷോകൾ അരങ്ങേറും.