ഗ്ലോബൽ വില്ലേജിൽ ബിസിനസ്​ തുടങ്ങണോ; ഇപ്പോൾ രജിസ്റ്റർ ചെയ്യാം

ദുബൈ: ഗ്ലോബൽ വില്ലേജിന്‍റെ 28ാം സീസണിൽ ബിസിനസ്​ നടത്താൻ താൽപര്യമുള്ളവർക്ക്​ ഇപ്പോൾ രജിസ്റ്റർ ചെയ്യാം. പുതിയ സീസണിൽ ചെറുതും വലുതുമായ സംരംഭങ്ങൾ തുടങ്ങാൻ താൽപര്യമുള്ളവരിൽ നിന്നാണ്​ അപേക്ഷകൾ ക്ഷണിച്ചത്​. 90 ലക്ഷത്തോളം സന്ദർശകരെത്തിയ 27ാം സീസൺ ഈ മാസമാണ്​ സമാപിച്ചത്​. ഈ വർഷം ഒക്​ടോബറിലായിരിക്കും അടുത്ത സീസണിനായി വില്ലേജ്​ തുറക്കുക.

https://business.globalvillage.ae/en എന്ന വെബ്​സൈറ്റ്​ വഴിയാണ്​ രജിസ്റ്റർ ചെയ്യേണ്ടത്​. ലീസിങ്​ ഓപർച്യൂനിറ്റീസ്​ എന്ന ലിങ്കിൽ ക്ലിക്ക്​ ചെയ്ത്​ വിവിധ ബിസിനസുകളിൽ രജിസ്റ്റർ ചെയ്യാം. അനുമതി കിട്ടിയാൽ ജീവനക്കാരുടെ വിസ അടക്കമുള്ള നടപടികളുമായി മുൻപോട്ടുപോകാം. ഫുഡ്​ കോർട്ട്​, റസ്റ്റാറന്‍റ്​, കോഫി ഷോപ്പ്​, റിടെയിൽ ഷോപ്പ്​ തുടങ്ങിയവ ​ഗ്ലോബൽ വില്ലേജിൽ നടത്താൻ കഴിയും.

നിരവധി മലയാളികളാണ്​ വില്ലേജിൽ വിവിധ സംരംഭങ്ങളുമായി ഓരോ സീസണിലും എത്തുന്നത്​. ഓരോ സീസണിലും ​തിരക്ക്​ കുതിച്ചുയരുന്നതിനാൽ വ്യാപാരികൾക്കും മികച്ച കച്ചവടമാണ്​ ലഭിക്കുന്നത്​.