പ്രവാസ ജീവിതത്തിന്​ വിരാമം; വി.പി. അഹ്​മദ്​ കുട്ടി മദനി നാടണയുന്നു

ദുബൈ: രണ്ടര പതിറ്റാണ്ടത്തെ ധന്യമായ പ്രവാസ ജീവിതം അവസാനിപ്പിച്ച് വി.പി. അഹ്​മദ്​ കുട്ടി മദനി എടവണ്ണ നാടണയുന്നു. വിവിധ വിഷയങ്ങളിൽ ആഴത്തിൽ ജ്ഞാനമുള്ള അദ്ദേഹം മികച്ച പ്രഭാഷകനും സംഘാടകനും കൂടിയാണ്.

അധ്യാപനം, സാമൂഹിക പ്രവർത്തനം, ഉദ്‌ബോധനം, സംഘടനാ പ്രവർത്തനം തുടങ്ങിയ മേഖലകളിൽ സാന്നിധ്യമറിയിച്ച സംതൃപ്തിയോടെയാണ് മടക്കം.

നാട്ടിൽ അധ്യാപകനായി ജോലിചെയ്യവെയാണ്​ 1994 ൽ സൗദിയിൽ പ്രവാസ ജീവിതം ആരംഭിക്കുന്നത്. ഏഴു വർഷങ്ങൾക്കു ശേഷം 2002 ൽ അജ്മാനിൽ പ്രിൻറിങ് പ്രസിൽ ജോലി ലഭിച്ചതോടെ പ്രവാസജീവിതം യു.എ.ഇയിലേക്ക് മാറി. 2009 മുതൽ ഷാർജ ഇന്ത്യൻ ഹൈസ്‌കൂളിൽ അധ്യാപകനായി ജോലിചെയ്യുന്നു.

യു.എ.ഇ മതകാര്യവകുപ്പി​ന്​ കീഴിലെ പള്ളികളിൽ മലയാളത്തിൽ ഖുത്ബ നിർവഹിച്ചുകൊണ്ടിരുന്ന അപൂർവം വ്യക്തികളിൽ ഒരാളാണ് മദനി. ഫുജൈറയിലെ മസ്ജിദുൽ ഇമാം ഷാഫിയിലാണ് ഏതാനും വർഷങ്ങളായി വെള്ളിയാഴ്‌ച ഉദ്​ബോധനം നടത്തുന്നത്​.

യു.എ.ഇ കെ.എം.സി.സി എക്സിക്യൂട്ടിവ് അംഗം, അജ്‌മാൻ കെ.എം.സി.സി സംസ്ഥാന ജനറൽ സെക്രട്ടറി, ജില്ല പ്രസിഡൻറ്​, യു.എ.ഇ ഇസ്​ലാഹി സെൻറർ പ്രസിഡൻറ്​, സീതി സാഹിബ് വിചാര വേദി ട്രഷറർ, മദീനത്തുൽ ഉലൂം അറബിക് കോളജ് അലുംനി യു.എ.ഇ ചാപ്റ്റർ ചെയർമാൻ തുടങ്ങിയ പദവികൾ വഹിച്ചിട്ടുണ്ട്. എം.എസ്.എഫ് അലുംനി യു.എ.ഇ ചാപ്റ്റർ, യു.എ.ഇ എടവണ്ണ പഞ്ചായത്ത് അസോസിയേഷൻ തുടങ്ങിയ കൂട്ടായ്മകളിൽ ത​േൻറതായ സംഭാവന നൽകി.

മലപ്പുറം എടവണ്ണക്ക് സമീപമുള്ള കല്ലിടുമ്പിലാണ് താമസം. നഫീസയാണ് ഭാര്യ. ഏഴ് പെൺകുട്ടികളും മൂന്ന് ആൺകുട്ടികളുമുണ്ട്‌.