യു.എ.ഇയിൽ ട്രാൻസിറ്റ്​ യാത്രക്കാർക്ക്​ സന്ദർശക വിസ ഉടൻ

അബൂദബി: യു.എ.ഇയിലെ എല്ലാ വിമാനത്താവളങ്ങളിലുമെത്തുന്ന ട്രാൻസിറ്റ്​ യാത്രക്കാർക്ക്​ രാജ്യത്ത്​ എവിടെയും സന്ദർശനം നടത്താൻ സാധിക്കുന്ന തരത്തിൽ വിസ അനുവദിക്കാൻ യു.എ.ഇ മന്ത്രിസഭ തീരുമാനിച്ചു. ഇന്ത്യ ഉൾപ്പെടെ 50 രാജ്യങ്ങളിൽനിന്നുള്ളവർക്കാണ്​ നിലവിൽ ഇത്തരത്തിൽ വിസ അനുവദിക്കുക. യു.എ.ഇയുടെ വിനോദസഞ്ചാര മേഖലയിൽ മുന്നേറ്റം ഉണ്ടാക്കുന്നതാണ്​ നടപടി. കണക്​ഷൻ വിമാനങ്ങൾ കാത്ത്​ വിമാനത്താവളത്തിൽ യാത്രക്കാരുടെ സമയം പാഴാകുന്നത്​ ഒഴിവാകുകയും ചെയ്യും. 

ഇന്ത്യക്ക്​ പുറമെ പാകിസ്​താൻ, അറബ്​^ആഫ്രിക്കൻ^തെക്കേ അമേരിക്കൻ രാജ്യങ്ങൾക്കാണ്​ ആദ്യ ഘട്ടത്തിൽ ട്രാൻസിറ്റ്​ വിസ സൗകര്യം ഉപയോഗപ്പെടുത്താനാവുക. ട്രാൻസിറ്റ്​ വിസ സംബന്ധിച്ച നയരൂപവത്​കരണത്തിനും ഇത്​ വിനോദസഞ്ചാര മേഖലയിലും സമ്പദ്​വ്യവസ്​ഥയിലുമുണ്ടാക്കുന്ന ഗുണകരമായ ഫലങ്ങൾ വിലയിരുത്താനും മന്ത്രിസഭ കമ്മിറ്റി ഉണ്ടാക്കിയിട്ടുണ്ട്​. മരുഭൂ യാത്രകൾ ഉൾപ്പെടെ ഏകദിന വിനോദസഞ്ചാരങ്ങൾ വർധിക്കുമെന്നതിനാൽ ടൂർ ഒാപറേറ്റർമാർ നടപടിയെ സ്വാഗതം ചെയ്യുകയാണ്​. ലൂവർ അബൂദബി, ശൈഖ്​ സായിദ്​ ഗ്രാൻഡ്​ മോസ്​ക്​, ബുർജ്​ ഖലീഫ, ദുബൈ മാൾ തുടങ്ങിയ പ്രധാന ആകർഷണ കേന്ദ്രങ്ങളിൽ കൂടുതൽ ആളുകളെത്തുമെന്നും പ്രതീക്ഷക്കപ്പെടുന്നു. 

അബൂദബിയിലെ വിമാനത്താവളത്തിൽ എത്തുന്ന ട്രാൻസിറ്റ്​ യാരതക്കാർക്ക്​ 14 ദിവസത്തെ വിസ അനുവദിക്കുന്ന സംവിധാനം നേരത്തെ തന്നെ നിലവിലുണ്ട്​. സോമാലിയ, അഫ്​ഗാനിസ്​താൻ, ഇറാഖ്​, നൈജർ ഒഴികെയുള്ള രാജ്യങ്ങളിലെ യാത്രക്കാർക്ക്​ നാല്​ മണിക്കൂർ കഴിഞ്ഞാണ്​ കണക്​ഷൻ വിമാനമെങ്കിലാണ്​ ഇൗ വിസ അനുവദിക്കുന്നത്​. 2017ൽ യു.എ.ഇയിലെ വിമാനത്താവളങ്ങളിലെത്തിയ 70 ശതമാനം പേരും ട്രാൻസിറ്റ്​ യാത്രക്കാരായിരുന്നു. ദുബൈ അന്താരാഷ്​ട്ര വിമാനത്താവളത്തിൽ മാത്രം കഴിഞ്ഞ വർഷം 8.9 കോടി യാത്രക്കാരാണെത്തിയത്​. ഇതിൽ ഏഴ്​ കോടിയും ട്രാൻസിറ്റ്​ യാത്രക്കാരായിരുന്നു.