നിയമലംഘനം: പണമിടപാട്​ സ്ഥാപനത്തിന്​ ഒരു കോടി ദിർഹം പിഴ

ദുബൈ: നിയമം ലംഘിച്ച പണമിടപാട്​ മണി എക്സ്​ചേഞ്ചിന്​​ യു.എ.ഇ സെൻട്രൽബാങ്ക്​ 1.7 കോടി ദിർഹം പിഴ ചുമത്തി. കളളപ്പണം വെളുപ്പിക്കൽ, ഭീകര സംഘടനകൾക്ക്​ ധനസഹായം നൽകുന്നത്​ തടയൽ നിയമം ലംഘിച്ചതായി പരിശോധനയിൽ കണ്ടെത്തിയതിനെ തുടർന്നാണ്​ നടപടി.

2018ലെ പാസാക്കിയ ഫെഡറൽ നിയമം അനുസരിച്ചാണ്​ സ്ഥാപനത്തിനെതിരെ നിയമ നടപടിയെടുത്തത്​. യു.എ.ഇയിലെ എല്ലാ പണമിടപാട്​ സ്ഥാപനങ്ങളുടെ ഉടമകളും ജീവനക്കാരും രാജ്യത്തെ നിയമങ്ങളും മാർനിർദേശങ്ങളും പാലിക്കുന്നുണ്ടെന്ന്​ ഉറപ്പുവരുത്തുന്നതിന്‍റെ ഭാഗമായാണ്​ സെൻട്രൽ ബാങ്ക്​ പരിശോധന നടത്തുന്നത്​.

രണ്ട്​ ദിവസം മുമ്പ്​ നിയമം ലംഘിച്ച്​ പ്രവർത്തിച്ച അൽ നഹ്​ദി എക്സ്​ചേഞ്ചിന്‍റെ ലൈസൻസ്​ റദ്ദാക്കുകയും രജിസ്റ്ററിൽ നിന്ന്​ സ്ഥാപനത്തിന്‍റെ പേര്​ നീക്കുകയും ചെയ്തിരുന്നു. കള്ളപ്പണം വെളുപ്പിക്കൽ നിയമം പാലിക്കുന്നതിൽ സ്ഥാപനം ഗുരുതരമായ വീഴ്ച വരുത്തിയതായി സെൻട്രൽ ബാങ്ക്​ നടത്തിയ പരിശോധനയിൽ കണ്ടെത്തിയിരുന്നു.