സ്വദേശികളെ അപമാനിച്ച്​ വീഡിയോ; പ്രവാസി യുവാവ് പിടിയിൽ

ദുബൈ: ഇമാറാത്തി വേഷത്തിൽ ആഡംബര കാർ ഷോറൂമിൽ എത്തി പണമെറിഞ്ഞ്​ വിലകൂടിയ കാർ ആവശ്യപ്പെട്ട സംഭവത്തിൽ ഏഷ്യൻ യുവാവ്​ പിടിയിൽ. കാർ ഷോറൂമിൽ പണവുമായി എത്തിയ യുവാവ്​ ഉടമക്ക്​ നേരെ പണമെറിഞ്ഞ്​ രണ്ട്​ ദശലക്ഷം ദിർഹം വില വരുന്ന ആഡംബര കാർ ആവശ്യപ്പെടുന്ന വീഡിയോ കഴിഞ്ഞ ദിവസം സമൂഹ മാധ്യമങ്ങളിൽ വൈറലായിരുന്നു. ഇയാളുടെ പ്രവൃത്തി ​സ്വദേശികളെ അപമാനിക്കുന്ന തരത്തിലും പൊതുതാൽപര്യത്തിന്​ ഹാനികരവും ആണെന്ന്​ ആരോപിച്ചാണ്​ യു.എ.ഇ ഫെഡറൽ പ്രോസിക്യൂഷൻ കസ്റ്റഡിയിലെടുത്തത്​​. വീഡിയോ ചിത്രീകരിച്ച കാർ ഷോറൂം ഉടമയേയും ചോദ്യം ചെയ്യാനായി പ്രോസിക്യൂഷൻ വിളിപ്പിച്ചിട്ടുണ്ട്​. വൻ തുകയടങ്ങിയ ട്രേയുമായി രണ്ട്​ കൂട്ടാളികൾക്കൊപ്പമായിരുന്നു യുവാവ്​ കാർ ഷോറൂമി​ലെത്തിയത്​​. തുടർന്ന്​ പ്രകോപനപരമായ ഭാഷയിൽ സ്ഥാപനത്തിന്‍റെ ഉടമയെ അന്വേഷിക്കുകയും ഈ സമയം ജീവനക്കാർക്ക്​ നേരെ പണം എറിഞ്ഞ്​നൽകുകയുമായിരുന്നു.

സമൂഹത്തിൽ പണത്തിന്​ യാതൊരു വിലയുമില്ലെന്ന്​ കാണിക്കുന്ന രീതിയിലായിരുന്നു ഇയാളുടെ പ്രകടനം. സംഭവത്തിന്‍റെ വീഡിയോ വൈറലായതോടെ ഫെഡറൽ പ്രോസിക്യൂഷൻ അന്വേഷണം ആരംഭിച്ചിരുന്നു. പൊതുജനാഭിപ്രായം ഇളക്കിവിടുന്ന തരത്തിൽ സമൂഹത്തിൽ തെറ്റായ സന്ദേശം നൽകുന്നതാണ്​ വീഡിയോ എന്ന്​ അന്വേഷണത്തിൽ വ്യക്​തമായതായി ഫെഡറൽ പ്രോസിക്യൂഷൻ അറിയിച്ചു. ഇമാറാത്തി സമൂഹത്തെ അപമാനിച്ചു, ഇന്‍റർനെറ്റ്​ ദുരുപയോഗം, സമൂഹമാധ്യമം ഉപയോഗിക്കുന്നതിന്‍റെ നിലവാരം കാത്തുസൂക്ഷിച്ചില്ല തുടങ്ങിയ കുറ്റങ്ങളാണ്​ ഇയാൾക്കെതിരെ ചുമത്തിയിട്ടുള്ളത്​.