വാഹനങ്ങൾക്ക്​ മോടികൂടിയാൽ പിടിവീഴും

ദുബൈ: കഴിഞ്ഞ ഒന്നരവർഷത്തിനിടെ മോടികൂട്ടി ട്രാഫിക്​ നിയമലംഘനം നടത്തിയ 2105 വാഹനങ്ങൾ പിടിച്ചെടുത്തതായി ദുബൈ പൊലീസ്​ അറിയിച്ചു.

അനധികൃതമായി എൻജിനുകൾ പരിഷ്​കരിച്ച്​ ജനങ്ങ​ളെ അലോസരപ്പെടുത്തുന്ന ശബ്​ദമുണ്ടാക്കിയതിനാണ് കൂടുതൽ വാഹനങ്ങൾ പിടിച്ചെടുത്തതെന്ന്​ ബ്രിഗേഡിയർ അബ്​ദുല്ല ഖാദിം പറഞ്ഞു. ബർദുബൈ മേഖലയിലാണ്​ ഏറ്റവും കൂടുതൽ കേസുകളുണ്ടായത്​. റോഡ് സുരക്ഷ ഉറപ്പുവരുത്താനും ട്രാഫിക് അപകടങ്ങൾ കുറയ്ക്കാനും പൊതുജനങ്ങളുടെ സ്വത്ത്​ സംരക്ഷിക്കാനുമാണ്​ നിയമലംഘകർക്കെതിരെ നടപടി സ്വീകരിക്കുന്നതെന്ന്​ അധികൃതർ വ്യക്​തമാക്കി.

എൻജിൻ അല്ലെങ്കിൽ, വാഹനങ്ങളുടെ അടിസ്ഥാന ഘടന അനുവദമില്ലാതെ മാറ്റിയാൽ ആയിരം ദിർഹം പിഴയും 12 ബ്ലാക്​ പോയൻറുകളുമാണ്​ ശിക്ഷ. ഇതിന്​ പുറമെ വാഹനം 30 ദിവസത്തേക്ക്​ പിടിച്ചെടുക്കും. റോഡ് ഉപയോഗിക്കുന്നവരുടെ ജീവൻ അപകടത്തിലാകാതിരിക്കാൻ ട്രാഫിക് നിയമങ്ങൾ പാലിക്കണമെന്ന് ദുബൈ പൊലീസ് വാഹനമോടിക്കുന്നവരോട് അഭ്യർഥിച്ചു.