വാറ്റ്​ രജിസ്​റ്റർ ചെയ്യാത്തവർക്ക്​ ഏപ്രിൽ 30 വരെ പിഴയില്ല

അബൂദബി: മൂല്യവർധിത നികുതി (വാറ്റ്​) രജിസ്​ട്രേഷൻ പൂർത്തിയാക്കാത്തവർക്ക്​ ഏപ്രിൽ 30 വരെ ഇളവ്​ അനുവദിച്ചു. ഇവരിൽനിന്ന്​ ഏപ്രിൽ 30 വരെ പിഴ ഇൗടാക്കില്ലെന്ന്​ ഫെഡറൽ നികുതി അതോറിറ്റി (എഫ്​.ടി.എ) ബുധനാഴ്​ച വ്യക്​തമാക്കി. വാറ്റ്​ രജിസ്​ട്രേഷൻ നടത്താനുള്ള അവസാന തീയതി ആയിരുന്ന 2017 ഡിസംബർ നാലിന്​ മുമ്പ്​ രജിസ്​ട്രേഷൻ നടപടികൾ പൂർത്തീകരിക്കാൻ സാധിക്കാത്ത വാണിജ്യ സ്​ഥാപനങ്ങൾക്ക്​ വലിയ ആശ്വാസമാണ്​ എഫ്​.ടി.എയുടെ തീരുമാനം.
നികുതി നടപടികൾക്ക്​  അനുസൃതമാകാനും പിഴയിൽനിന്ന്​ ഒഴിവാകാനും ബിസിനസ്​ സംരംഭങ്ങളെ  സഹായിക്കുന്നതിനാണ്​ ഇത്തരമൊരു തീരുമാനമെടുത്തതെന്ന്​ എഫ്​.ടി.എ അധികൃതർ പ്രസ്​താവനയിൽ പറഞ്ഞു. ധനകാര്യമന്ത്രിയും ദുബൈ ഉപ ഭരണാധികാരിയുമായ ശൈഖ്​ ഹംദാൻ ബിൻ റാശിദ്​ ആൽ മക്​തൂം, എഫ്​.ടി.എ ബോർഡ്​ ഡയറക്​ടർമാർ തുടങ്ങിയവർ വാറ്റ്​ നടപടികൾ അവലോകനം ചെയ്​തു. ജനുവരി ഒന്നിനാണ്​ യു.എ.ഇയിൽ വാറ്റ്​ പ്രാബല്യത്തിലായത്​.