യു.എ.ഇയിൽ യു.പി.ഐ പെയ്മെന്‍റ് സംവിധാനം വ്യാപിപ്പിക്കുന്നു; പണം കൈയിൽ കരുതാതെ ഇന്ത്യയിൽ നിന്ന് യു.എ.ഇയിലേക്ക് യാത്ര ചെയ്യാം

ദുബൈ: ക്യൂ.ആർ കോഡ്​ ഉപയോഗിച്ചുള്ള ഇന്ത്യയുടെ യു.പി.ഐ പെയ്​മെന്‍റ്​ സംവിധാനം യു.എ.ഇയിൽ കൂടുതൽ മേഖലകളിലേക്ക്​ വ്യാപിപ്പിക്കുന്നു. ഇന്ത്യയിൽ നിന്ന്​ യു.എ.ഇയിലേക്ക് യാത്ര ചെയ്യുന്നവർക്ക് കൈയിൽ പണമോ എ.ടി.എം കാർഡുകളോ ഇല്ലാതെ മുഴുവൻ ഇടപാടുകളും യു.പി.ഐ ആപ്ലിക്കേഷൻ വഴി നിർവഹിക്കാൻ ഇതു വഴി സൗകര്യം ഒരുങ്ങും.

ദുബൈ ഇന്ത്യൻ കോൺസുലേറ്റിൽ നടത്തിയ വാർത്ത സമ്മേളനത്തിൽ നാഷനൽ ​പെയ്​മെന്‍റ്​ കോർപറേഷൻ ഓഫ്​ ഇന്ത്യ (എൻ.പി.സി.ഐ) മാനേജിങ്​ ഡയറക്ടറും സി.ഇ.ഒയുമായ റിതേഷ്​ ഷുക്ല, ദുബൈ ഇന്ത്യൻ കോൺസുൽ ജനറൽ സതീഷ്​ കുമാർ ശിവൻ എന്നിവരാണ്​​ ഇക്കാര്യങ്ങൾ അറിയിച്ചത്​.

നിലവിൽ യു.എ.ഇയിലെ ഏറ്റവും പ്രമുഖ വ്യാപാര ശൃംഖലയായ ലുലു ഹൈപ്പർ മാർക്കറ്റ്​, ദുബൈ ഡ്യൂട്ടി ഫ്രീ എന്നിവിടങ്ങളിൽ ക്യൂ.ആർ കോഡ്​ ഉപയോഗിച്ചുള്ള യു.പി.ഐ ​പെയ്​മെന്‍റ്​ ഇടപാട്​ അനുവദിക്കുന്നുണ്ട്​. ഇന്ത്യയിൽ നിന്നുള്ള ഉപഭോക്​താക്കൾക്ക്​ യു.എ.ഇയിൽ വ്യാപാര ഇടപാട്​ നടത്തുമ്പോൾ അവരുടെ ഇന്ത്യൻ എകൗണ്ടിൽ നിന്ന്​ നേരിട്ട്​ പണമടക്കാൻ കഴിയു​മെന്നതാണ്​ ഇതിന്‍റെ​ ഏറ്റവും വലിയ സവിശേഷത​.

രണ്ടാം ഘട്ടമെന്ന നിലയിലാണ്​ ഈ സംവിധാനം കൂടുതൽ ഇടങ്ങളിലേക്ക്​ വ്യാപിപ്പിക്കുന്നത്​. ​മഷ്​രിക്​ ബാങ്കിന്‍റെ നിയോപേ, നെറ്റ്​വർക്ക്​ ഇന്‍റർനാഷനൽ, മാഗ്​നാട്ടി തുടങ്ങിയ പെയ്​മെന്‍റ്​ സേവന ദാതാക്കളുടെ പങ്കാളിത്തത്തിലൂടെയാണ്​ ഇത്​ സാധ്യമാക്കുകയെന്ന്​ റിതേഷ്​ ഷുക്ല പറഞ്ഞു.

ഇന്ത്യയുടെ യു.പി.ഐയുടെയും യു.എ.ഇയുടെ ആനി (എ.എ.എൻ.ഐ) യുടെയും ഡിജിറ്റൽ പേയ്‌മെന്‍റ്​ പ്ലാറ്റ്‌ഫോമുകളുടെ സംയോജനം ഇതിനായി പൂർത്തിയാകേണ്ടതുണ്ട്​. ഇതിനായുള്ള ചർച്ചകൾ പുരോഗമിക്കുകയാണ്​. ഒരു വർഷത്തിനുളളിൽ യു.എ.ഇയിലുടനീളമുള്ള വ്യാപാര സ്ഥാപനങ്ങളിലും ടാക്സികൾ ഉൾപ്പെടെയുള്ള ഗതാഗത സൗകര്യങ്ങളിലും യു.പി.ഐ പെയ്​മെന്‍റ്​ സംവിധാനം ഉപയോഗിച്ച്​ ഇടപാട്​ നടത്താൻ കഴിയുമെന്നും അദ്ദേഹം പറഞ്ഞു.