പുതുക്കിയ എമിറേറ്റ്സ് ഐഡി പുറത്തിറക്കി

ദുബൈ: യു.എ.ഇയിലെ പൗരന്മാരുടെയും താമസക്കാരുടെയും ഐഡൻറിറ്റി കാർഡായ എമിറേറ്റ്​സ്​ ഐഡിയുടെ ഏറ്റവും പുതിയ പതിപ്പ്​ പൊതുജനങ്ങൾക്കായി പുറത്തിറക്കി.

കാർഡി​െൻറ പുതിയ സവിശേഷതകൾ വ്യക്തമാക്കി​യാണ്​ സമൂഹമാധ്യമങ്ങളിലൂടെ ഇതി​െൻറ രൂപം ഫെഡറൽ അതോറിറ്റി ഫോർ ഐഡൻറിറ്റി ആൻഡ്​ സിറ്റിസൺഷിപ്​ ​(ഐ.സി.എ) പുറത്തുവിട്ടത്​. 'പുതുതലമുറ' കാർഡിൽ ഡേറ്റയുടെ മെച്ചപ്പെട്ട സുരക്ഷ വാഗ്​ദാനം ചെയ്യുന്നു. 10 വർഷത്തിൽ കൂടുതൽ കാലം ഇത്​ നിലനിൽക്കുകയും ചെയ്യും. കാർഡ് ഉടമയുടെ ജനനത്തീയതി കാണിക്കാൻ ലേസർ പ്രിൻറിങ്​ സാങ്കേതികവിദ്യ ഉപയോഗിച്ച ത്രീഡി ചിത്രം ഇതിൽ ഉൾപ്പെടും. നൂതന സാങ്കേതികവിദ്യ ഉപയോഗിച്ച കാർഡിലെ ചിപ്പിന് നോൺ-ടച്ച് ​േഡറ്റ റീഡിങ്​ സവിശേഷതയുണ്ട്​. കാർഡ്​ ഉടമയുടെ പ്രഫഷനൽ വിവരങ്ങൾ, ജനസംഖ്യ ഗ്രൂപ്​ എന്നിവയും ഇതിൽ ഉൾപ്പെടും.

എന്നാൽ, എപ്പോൾ മുതലാണ്​ പുതിയ കാർഡ്​ ലഭ്യമായിത്തുടങ്ങുകയെന്ന്​ അധികൃതർ വ്യക്തമാക്കിയിട്ടില്ല. ഐഡൻറിറ്റി കാർഡും പാസ്‌പോർട്ടും നവീകരിക്കുന്ന പദ്ധതിയുടെ ഭാഗമായാണ് പുതുക്കിയ കാർഡ് പുറത്തിറക്കുന്നത്. ന്യൂജൻ കാർഡുകൾ ആദ്യം ലഭിക്കുന്നത്​ നിലവിലുള്ളതിെൻറ കാലാവധി കഴിഞ്ഞവർക്കും നഷ്​ട​പ്പെടുകയോ കേടുവരുകയോ ചെയ്​ത്​ പുതിയതിന്​ അപേക്ഷിക്കുന്നവർക്കുമായിരിക്കുമെന്ന്​ ഐ.സി.എ ആക്​ടിങ്​ ഡയറക്​ടർ ജനറൽ മേജർ ജനറൽ സുഹൈൽ അൽ ഖൈലി പറഞ്ഞു. നിലവിലുള്ള കാർഡ്​ കാലാവധി കഴിയുന്നവരുടെ ഉപയോഗിക്കാമെന്നും അദ്ദേഹം പറഞ്ഞു.

പുതിയ കാർഡിന്​ അപേക്ഷിക്കുന്നതിന്​ ഫീസ്​ വർധനയില്ലെന്ന്​ ഐ.സി.എയിലെ മറ്റൊരു ഉന്നത ഉദ്യോഗസ്​ഥൻ വെളിപ്പെടുത്തി. ഏറ്റവും പുതിയ സാ​ങ്കേതികവിദ്യ പ്രയോജനപ്പെടുത്തി ജനസംഖ്യ വിവരങ്ങൾ കൂടുതൽ കൃത്യപ്പെടുത്താനുള്ള സർക്കാർ നയത്തി​െൻറ ഭാഗമായാണ്​ പുതിയ ഐഡി പുറത്തിറക്കിയത്​. ​

എമിറേറ്റ്​സ്​ ഐഡിക്ക്​ അപേക്ഷിച്ച്​ ലഭിക്കാൻ വൈകുന്നവർക്ക്​ ഇതി​െൻറ ഇ-വേർഷൻ ഉപയോഗിക്കാൻ ഇക്കഴിഞ്ഞ ജൂണിൽ അധികൃതർ അനുവാദം നൽകിയിരുന്നു. ഐ.സി.എയുടെ ആപ്പിലാണ്​ ഇത്​ ലഭ്യമാക്കിയത്​.