യൂമെക്​സിൽ സ്വയംനിയന്ത്രിത വാഹന തിരക്ക്​

അബൂദബി: സ്വയംനിയന്ത്രിത വാഹനങ്ങളുടെ അത്​ഭുത കാഴ്​ചകളിലേക്ക്​ സന്ദർശകരെ ക്ഷണിച്ച്​ യൂമെക്​സ്​ (അൺമാൻഡ്​ സിസ്​റ്റംസ്​ എക്​സിബിഷൻ ആൻഡ്​ കോൺഫറൻസ്​) പ്രദർശനം. ഗതാഗത മേഖലയിൽ ആഗോളാടിസ്​ഥാനത്തിൽ വരാൻ പോകുന്ന സാങ്കേതിക വിദ്യ മുന്നേറ്റങ്ങൾ അടുത്തറിയാണുള്ള അവസരമാണ്​ അബൂദബി നാഷനൽ എക്സിബിഷൻ സ​െൻററിൽ (അഡ്​നെക്​) നടക്കുന്ന പ്രദർശനം നൽകുന്നത്. പ്രദർശനം ഇന്ന്​ സമാപിക്കും.

സാധാരണ റോഡുകൾ മുതൽ യുദ്ധക്കളങ്ങളിൽ വരെ സ്വയം നിയന്ത്രിത ഉപകരണങ്ങൾ ഏതൊക്കെ തരത്തിൽ സ്വാധീനം ചെലുത്തുമെന്നതി​​െൻറ നേർക്കാഴ്​ചകളാണിത്​. ആകാശദൃശ്യങ്ങൾ ഒപ്പിയെടുക്കുന്ന കാമറകൾ ഘടിപ്പിച്ച ഡ്രോണുകൾ, റോക്കറ്റ് ലോഞ്ചറുകൾ, യന്ത്രത്തോക്കുകൾ പിടിപ്പിച്ച കൂറ്റൻ വാഹനങ്ങൾ, വിമാനാപകടങ്ങളിലെ ബ്ലാക്ക് ബോക്സുകൾ കണ്ടെത്താൻ സഹായിക്കുന്ന സീ എക്സ്പ്ലോറർ തുടങ്ങിയ ഉപകരണങ്ങളെല്ലാം ഇതിലുണ്ട്​. സാങ്കേതികരംഗത്തെ പുതിയ കണ്ടെത്തലുകൾ പ്രതിരോധ മേഖലയിലുണ്ടാക്കിയ മുന്നേറ്റമാണ്​ ഇവയിൽ പ്രതിഫലിക്കുന്നത്. 

യു.എ.ഇയിലെ വിവിധ സർവകലാശാലകളിൽനിന്നുള്ള വിദ്യാർഥികളുടെ കണ്ടെത്തലുകളും ഇവിടെ പ്രദർശിപ്പിച്ചിട്ടുണ്ട്. ഭാവിയിലെ ഇലക്ട്രിക് വാഹനങ്ങൾക്കായി വയർലെസ് ഇലക്ട്രിക് ചാർജറുകളുടെ കണ്ടെത്തലുകളുമായി എത്തിയവരും ഇവരിലുണ്ട്​. വിവിധ രാജ്യങ്ങളിൽനിന്നുള്ള നൂറോളം പ്രദർശകരാണ് യൂമെക്​സിലുള്ളത്​.