യുക്രെയ്​ൻ: യു.എൻ പ്രമേയത്തിന്​ അനുകൂലമായി യു.എ.ഇ വോട്ട്​ ചെയ്തു

ദുബൈ: യുക്രെയ്​നിൽ സമാധാനം സ്ഥാപിക്കാൻ ലക്ഷ്യമിട്ട്​ ഐക്യരാഷ്ട്ര സഭ അവതരിപ്പിച്ച പ്രമേയത്തിന്​ അനുകൂലമായി യു.എ.ഇ വോട്ട്​ ചെയ്തു. നയതന്ത്ര ഇടപെടലിലൂടെയും ചർച്ചയിലൂടെയും പ്രശ്നം പരിഹരിക്കണമെന്ന്​ യു.എ.ഇ പ്രതിനിധി ആവശ്യപ്പെട്ടു. രാഷ്ട്രീയകാര്യ സഹമന്ത്രിയും ഐക്യരാഷ്ട്രസഭയിലെ യു.എ.ഇയുടെ സ്ഥിരാംഗവും യു.എ.ഇ അംബാസഡറുമായ ലന നുസൈബയാണ്​ യു.എൻ ജനറൽ അസംബ്ലിയുടെ അടിയന്തര സെഷനിൽ ഇക്കാര്യം അറിയിച്ചത്​.

സമാധാനത്തിനായി ശ്രമിക്കുന്ന അംഗരാജ്യങ്ങൾക്കൊപ്പം ഞങ്ങളും ചേരുന്നു. ഐക്യരാഷ്ട്ര സഭയുടെ പരമാധികാരവും സ്വാതന്ത്ര്യവും സമഗ്രതയും ഉറപ്പാക്കി എല്ലാവരുമായും ചേർന്ന്​ സമാധാനം നിലനിർത്താനുള്ള ശ്രമത്തിൽ പങ്കാളികളാകുന്നു. ചർച്ചകൾക്കുള്ള വഴികൾ മുമ്പത്തേക്കാൾ പ്രാധാന്യത്തോടെ തുറന്നിടണം. അതിനായി ഒരുമിച്ചുനിൽക്കുകയും ചെയ്യണം. ജനങ്ങളുടെ സുരക്ഷക്കാണ്​ മുഖ്യപ്രാധാന്യം. സംഘർഷം അവസാനിപ്പിക്കാൻ ക്രിയാത്​മകമായി ഇട​പെടേണ്ട സമയമാണിത്​. നമ്മുടെ അനുഭവങ്ങളുടെ പരിചയസമ്പത്ത്​ ഇതിനായി ഉപയോഗിക്കണം. ഐക്യരാഷ്ട്രസഭയുടെ വിശ്വാസ്യത അതിന്‍റെ ആഗോള പ്രാതിനിധ്യത്തിലും സമൂഹക്ഷേമം മുൻനിർത്തിയുള്ള പ്രവർത്തനങ്ങളുടെ ഫലപ്രാപ്തിയിലും അധിഷ്ഠിതമാണ്​. ഈ നയം തുല്യമായി പ്രയോഗിക്കണം. യുക്രെയ്​നിലെ മനുഷ്യരുടെ അവസ്ഥയിൽ അഗാധമായ ഉത്​കണ്ഠയുണ്ട്​. ഇവരുടെ അവസ്ഥ കൂടുതൽ വഷളാകുന്നത്​ തടയാൻ എല്ലാ ശ്രമങ്ങളുമുണ്ടാകണം. ഇതിനായി എല്ലാ നയതന്ത്ര മാർഗങ്ങളും ഉപയോ​ഗപ്പെടുത്തണം. ഇത്​ അന്താരാഷ്ട്ര സമൂഹത്തിന്‍റെ കൂട്ടുത്തരവാദിത്തമാണ്​. ശത്രുതക്ക്​ അറുതിവരുത്താനുള്ള യു.എൻ ശ്രമങ്ങളെ ​പ്രോത്സാഹിപ്പിക്കണമെന്നും ലന നുസൈബ പറഞ്ഞു.

കഴിഞ്ഞദിവസം യുക്രെയ്​ന്​ 50 ലക്ഷം ഡോളർ സഹായം യു.എ.ഇ പ്രഖ്യാപിച്ചിരുന്നു.

യു​ക്രെയ്​നിൽ സഹായമെത്തിക്കാൻ ഐക്യരാഷ്ട്രസഭ നടപ്പാക്കുന്ന പദ്ധതിയുടെ ഭാഗമായാണ്​ യു.എ.ഇയും സഹായമെത്തിക്കുന്നത്​.