ഉത്സവാന്തരീക്ഷം പകര്‍ന്ന് ഉമ്മുല്‍ഖുവൈനില്‍   യുഫെസ്​റ്റ്​ പ്രചരണം

ഉമ്മുൽഖുവൈൻ:  യുഫെസ്​റ്റ്​  2017 കലാമാമാങ്കത്തിനു മുന്നോടിയായി പത്തു ദിനങ്ങള്‍ ഇരുപതു സ്കൂളുകള്‍ എന്ന പ്രചാരണ കാമ്പയിനുമായി ഉമ്മുൽഖുവൈനിൽ എത്തിയ  സംഘത്തിന്​ ഉല്‍സവാന്തരീക്ഷത്തില്‍  വരവേല്‍പ്പ്. യു.എ ഇ യിലെ ഇന്ത്യന്‍ സ്കൂളുകളെ ഉള്‍പ്പെടുത്തി നടക്കുന്ന ജീപ്പാസ് യുഫെസ്​റ്റി​​െൻറ  പ്രചരണയാത്ര റാസല്‍ഖൈമ, അജ്മാന്‍, ഫുജൈറ, ദുബൈ എന്നിവിടങ്ങള്‍ പിന്നിട്ടാണ്ഉമ്മുൽഖുവൈനിൽ എത്തിയത്.  ന്യൂ ഇന്ത്യന്‍ സ്കൂള്‍, ഹാബിറ്റാറ്റ് സ്കൂള്‍ എന്നിവിടങ്ങളില്‍ പര്യടനം നടത്തിയ സംഘത്തെ ഹര്‍ഷാരവത്തോടെ  വിദ്യാര്‍ഥികൾ സ്വീകരിച്ചു. പഠനസമയത്തിനിടയിലെ ഇടവേളകള്‍ സര്‍ഗ്ഗവാസനകള്‍ക്കു ഉപയോഗപ്പെടുത്തുന്ന വിദ്യാര്‍ത്ഥികളെ യുഫെസ്​റ്റ്​ കലോത്സവത്തില്‍ പങ്കെടുപ്പിക്കുന്നതില്‍ അഭിമാനമുണ്ടെന്ന്​ അധ്യാപകര്‍ പറഞ്ഞു.  

പ്രമുഖ പരസ്യ ഏജന്‍സിയായ ഇക്കുറ്റി പ്ലസ്‌ അണിയിച്ചൊരുക്കുന്ന യുഫെസ്​റ്റ്​  കലോത്സവത്തി​​െൻറ ആദ്യ എഡീഷനിൽ കൈവിട്ടുപോയ കിരീടം ഇക്കുറി  നേടുമെന്നാണ്  ഇവര്‍ പറയുന്നത്.   ഹാബിറ്റാറ്റ്  സ്കൂള്‍ പ്രിന്‍സിപ്പല്‍ ഡോ.ബിനു കുര്യന്‍, ന്യൂ ഇന്ത്യന്‍ സ്കൂള്‍ പ്രിന്‍സിപ്പല്‍ റഫീക്ക് എ.റഹിം എന്നിവര്‍  ജീപ്പാസ് യുഫെസ്​റ്റ്​ ​പോസ്റ്റര്‍ എറ്റുവാങ്ങി. ഹിറ്റ്‌  എഫ് എം 96.7 അവതാരകരായ നയില ഉഷ,  അര്‍ഫാസ്,  സംഘാടക പ്രതിനിധി ദില്‍ഷാദ് എന്നിവര്‍  യാത്രക്ക് നേതൃത്വം നല്‍കി.