യു.എ.ഇയുടെ എണ്ണയിതര വിദേശവ്യാപാരം 1.7 ലക്ഷം കോടി കടന്നു; ആറു മാസത്തെ കണക്കുകൾ പുറത്തുവിട്ട്​ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം

ദുബൈ: നടപ്പു സാമ്പത്തിക വർഷം ആദ്യ പകുതിയിൽ യു.എ.ഇയിലെ എണ്ണയിതര വിദേശ വ്യാപാരം 1.7 ലക്ഷം കോടി ദിർഹം കടന്നു. യു.എ.ഇ വൈസ്​ പ്രസിഡന്‍റും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമാണ്​ എക്സിലൂടെ ഇക്കാര്യം വെളിപ്പെടുത്തിയത്​​. കഴിഞ്ഞ വർഷം ഇതേ കാലയളവിനെ അപേക്ഷിച്ച്​ 24 ശതമാനമാനം വർധനവാണ്​ രാജ്യം നേടിയത്​. 2021ന്‍റെ ആദ്യ പകുതിയിൽ കൈവരിച്ചതിനേക്കാൾ ഇരട്ടി​ നേട്ടം​ ഉണ്ടാക്കാൻ കഴിഞ്ഞു. 2022ന്‍റെയും 2023ന്‍റെയും ആദ്യ പകുതിയുമായി താരതമ്യപ്പെടുത്തുമ്പോൾ യഥാക്രമം 59.5 ശതമാനത്തിന്‍റെയും 37.8 ശതമാനത്തിന്‍റെയും വളർച്ച രേഖപ്പെടുത്തിയതായും അദ്ദേഹം പറഞ്ഞു.

പ്രസിഡന്‍റ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാന്‍റെ നേതൃത്വത്തിന്​ കീഴിൽ ലോകത്തെ പ്രധാന വ്യാപാര രാഷ്ട്രമായി മാറാനുള്ള പാതയിൽ രാജ്യം മുന്നേറുകയാണ്​​. ഇന്ന്​ ലോകത്തെ ഏറ്റവും വലിയ സമ്പദ്​വ്യവസ്ഥകളുടെ വിശ്വസനീയമായ വ്യാപാര പങ്കാളിയും ലോകമെമ്പാടുമുള്ള വ്യാപാര ഇടപാടുകൾ സുഗമമാക്കുന്നതിനുള്ള ഒരു കവാടവുമാണ്​ യു.എ.ഇ. ലോകമെമ്പാടും വ്യാപാര പങ്കാളികളുടെ ശൃംഖല വ്യാപിപ്പിക്കാൻ ലക്ഷ്യമിട്ട്​ 2021 സെപ്​റ്റംബറിൽ സമഗ്ര സാമ്പത്തിക സഹകരണ കരാ (സെപ)റിൽ യു.എ.ഇ വിവിധ രാജ്യങ്ങളുമായി ഒപ്പുവെച്ചിരുന്നു. എണ്ണയിതര ഇതര വ്യാപാര രംഗത്തെ കുതിച്ചു ചാട്ടത്തിന്​ ഈ കരാർ സഹായകമായി​. സെപ കരാറിന്​ കീഴിൽ ഇതുവരെ 28 കരാറികളിലാണ്​ യു.എ.ഇ ഒപ്പുവെച്ചത്​. ഇതിൽ 10 കരാറുകൾ യാഥാർഥ്യമായി. ഇതു വഴി 300 കോടി വരുന്ന ഉപഭോക്​താക്കളുള്ള വിപണിയിലേക്ക്​ തടസ്സമില്ലാതെ പ്രവേശിക്കാൻ യു.എ.ഇക്ക്​ കഴിയുമെന്നും അദ്ദേഹം കൂട്ടിച്ചേർത്തു.

ആകെ എണ്ണയിതര വിദേശവ്യാപാരത്തിൽ എണ്ണയിതര കയറ്റുമതിയുടെ സംഭാവന 21.4 ശതമാനമാണ്​. രാജ്യത്തിന്‍റെ ചരിത്രത്തിൽ ആദ്യമായാണ്​ ഈ നേട്ടം കൈവരിക്കുന്നത്​. കഴിഞ്ഞ വർഷം ഇത്​ 18.4 ശതമാനം ആയിരുന്നു. 2025 ജനുവരി മുതൽ ജൂൺ 30 വരെയുള്ള കാലയളവിൽ യു.എ.ഇയുടെ എണ്ണയിതര വിദേശ വ്യാപാരത്തിൽ തുടർന്നയായി കുതിപ്പ്​ പ്രകടമാണ്​. ഈ വർഷം ആദ്യ പകുതിയിൽ എണ്ണയിതര കയറ്റുമതി 369.5 ശതകോടി ദിർഹമിലെത്തിയിട്ടുണ്ട്​. 44.7 ശതമാനത്തിന്​ മുകളിലാണ്​ ഈ രംഗത്തെ വളർച്ച.