സഹായവസ്തുക്കളുമായി യു.എ.ഇയുടെ കൂറ്റൻ കപ്പൽ ഗസ്സയിലേക്ക്​ പുറപ്പെട്ടു

അബൂദബി: ഗസ്സയിൽ ദുരിതമനുഭവിക്കുന്നവർക്ക്​ 7,166 ടൺ സഹായ വസ്തുക്കളുമായി യു.എ.ഇയിൽ നിന്നുള്ള ഏറ്റവും വലിയ കപ്പൽ ‘ഖലീഫ’ ഗസ്സയിലേക്ക്​ പുറപ്പെട്ടു. അബൂദബി ഖലീഫ തുറമുഖത്തുനിന്നാണ്​ കപ്പൽ പുറപ്പെട്ടത്​. 4,372 ടൺ ഭക്ഷ്യവസ്തുക്കൾ, 1,433 ടെൻറുകൾ അടക്കമുള്ള താമസസൗകര്യങ്ങൾ, 860ടൺ മെഡിക്കൽ വസ്​തുക്കൾ, വസ്ത്രങ്ങൾ, കിടക്കകൾ, ഹൈജീൻ കിറ്റുകൾ, മറ്റു അവശ്യ വസ്തുക്കൾ എന്നിവ കപ്പലിൽ കൊണ്ടുപോകുന്നുണ്ട്​.

അതോടൊപ്പം ഗസ്സയിലെ ആരോഗ്യ മേഖലക്ക്​ വലിയ സഹായമാകുന്ന ഫീൽഡ്​ ആശുപ​ത്രിയും എത്തിക്കുന്നുണ്ട്​. ആശുപത്രിയിൽ 400രോഗികൾക്ക്​ ചികിൽസ നൽകാനുള്ള സൗകര്യമുണ്ട്​. അതോടൊപ്പം 16ആംബുലൻസുകളും ഇതിലുൾപ്പെടും. ഗസ്സയിലെ ജനങ്ങൾക്ക്​ ശുദ്ധജലം എത്തിക്കുന്നതിന്​ 20 ടാങ്കുകളും എത്തിക്കുന്നുണ്ട്​.

യു.എ.ഇ പ്രസിഡൻറ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ പ്രഖ്യാപിച്ച ഓപറേഷൻ ഷിവർലെസ്​ നൈറ്റ്​ 3 പദ്ധതിയുടെ ഭാഗമായാണ്​ സഹായം എത്തിക്കുന്നത്​. കപ്പൽ ഈജിപ്തിലെ അൽ ആരിഷ്​ തുറമുഖത്ത്​ എത്തിച്ച ശേഷം ട്രക്കുകളിലായാണ്​ സഹായ വസ്തുക്കൾ ഗസ്സയിലേക്ക്​ കൊണ്ടുപോവുക. ഈജിപ്ത് തുറമുഖത്തെത്താൻ 14ദിവസമാണ്​ പ്രതീക്ഷിക്കുന്നത്​. ഇമാറാത്തി റെഡ് ക്രസന്റ്, ഖലീഫ ഫൗണ്ടേഷൻ, സായിദ് ചാരിറ്റബിൾ ആൻഡ് ഹ്യുമാനിറ്റേറിയൻ ഫൗണ്ടേഷൻ, ദാറുൽ ബിർറ്​ സൊസൈറ്റി, അജ്മാൻ ആസ്ഥാനമായുള്ള ഇന്റർനാഷണൽ ചാരിറ്റി ഓർഗനൈസേഷൻ, അൽ ഇഹ്സാൻ ചാരിറ്റി അസോസിയേഷൻ, അൽ ഇത്തിഹാദ് ചാരിറ്റി ഫൗണ്ടേഷൻ, റാസൽഖൈമ ആസ്ഥാനമായുള്ള അൽ ഖാസിമി ഫൗണ്ടേഷൻ എന്നിവയാണ് ദൗത്യത്തെ സഹായിക്കുന്നത്.

2023മുതൽ ഗസ്സയിലേക്ക്​ യു.എ.ഇ തുടർച്ചയായി സഹായം എത്തിക്കുന്നുണ്ട്​. കഴിഞ്ഞ ആഴ്ചയും യു.എ.ഇ സഹായട്രക്കുകൾ ഗസ്സയിൽ സഹായം വിതരണം ചെയ്തിരുന്നു. ഗസ്സയിൽ പരിക്കേറ്റ നിരവധിപേരെ അബൂദബിയിൽ എത്തിച്ച്​ ചികിൽസ നൽകുന്ന പദ്ധതിയും നടപ്പിലാകിവരുന്നുണ്ട്​.