യു.എ.ഇയുടെ ഐ.പി.എൽ

​രാജ്യാന്തര ക്രിക്കറ്റിൽ യു.എ.ഇ അത്ര വലിയ ശക്​തിയൊന്നുമല്ല. എന്നാൽ, ക്രിക്കറ്റിന്‍റെ ചരിത്ര പുസ്തകത്തിൽ ഒരിക്കലും ഒഴിവാക്കാനാകാത്ത ശക്​തിയാണ്​ യു.എ.ഇ എന്ന രാജ്യം. ലോകത്ത്​ ഏറ്റവും കൂടുതൽ ഏകദിന മത്സരങ്ങൾ നടത്തിയ സ്​റ്റേഡിയമുള്ള രാജ്യത്താണ്​ ലോകകപ്പും ഏഷ്യകപ്പും പോലുള്ള മഹാമാമാങ്കങ്ങൾ അരങ്ങേറിയത്​. ലോകത്തിലെ ഏറ്റവും വലിയ ക്രിക്കറ്റ്​ ലീഗായ ഇന്ത്യൻ പ്രീമിയർ ലീഗിന്​ (ഐ.പി.എൽ) ഒന്നിലേറെ തവണ ആതിഥ്യം വഹിച്ച യു.എ.ഇ ഇപ്പോഴിതാ ഐ.പി.എൽ മാതൃകയിൽ സ്വന്തം ലീഗുമായി എത്തിയിരിക്കുകയാണ്​.

ലോകോത്തര താരങ്ങളെ അണിനിരത്തി യു.എ.ഇ ഒരുക്കുന്ന ഇന്‍റർനാഷനൽ ടി 20 ലീഗ്​​ (ഐ.എൽ ടി20) ജനുവരി 13 മുതൽ ഫെബ്രുവരി 12 വരെ നടക്കും. ആറ്​ വമ്പൻ ഫ്രാഞ്ചൈസികളാണ്​ ടീമുകളെ സ്വന്തമാക്കിയിരിക്കുന്നത്​. ഇതിൽ അഞ്ചും ഇന്ത്യയിൽ നിന്നാണ്​ എന്നത്​ ഇന്ത്യക്കാർക്കിടയിലും ഈ ടൂർണമെന്‍റിനെ പ്രിയപ്പെട്ടതാക്കുന്നു. 34 മത്സരങ്ങളുണ്ടാകും. ഓരോ ടീമും രണ്ട്​ തവണ ഏറ്റുമുട്ടുന്ന രീതിയിലാണ്​ ഷെഡ്യൂൾ. നാല്​ ​േപ്ല ഓഫ്​​ മത്സരങ്ങളുണ്ടാകും.

ഐ.പി.എൽ ടീമുകളായ കൊൽക്കത്ത നൈറ്റ്​ റൈഡേഴ്​സ്​, ഡൽഹി കാപ്പിറ്റൽസ്​, മുംബൈ ഇന്ത്യൻസ്​ എന്നിവ ഇവിടെയും ടീമുകളെ ഏറ്റെടുത്തിട്ടുണ്ട്​. ഷാരൂഖ്​ ഖാന്‍റെ ഉടമസ്ഥയിലുള്ള കൊൽക്കത്ത നൈറ്റ്​ റൈഡേഴ്​സ്​​, ഡൽഹി കാപ്പിറ്റൽസിന്‍റെ ഉടമകളായ ജി.എം.ആർ ഗ്രൂപ്പ്​, മുംബൈ ഇന്ത്യൻസിന്‍റെ ഉടമകളായ റിലയൻസ്​, ഇന്ത്യ കേന്ദ്രീകരിച്ച്​ പ്രവർത്തിക്കുന്ന കാപ്രി ​ഗ്ലോബൽ, അദാനി ഗ്രൂപ്പിന്‍റെ അദാനി സ്​പോർട്​സ്​ ലൈൻ​ എന്നിവയാണ്​ ഇന്ത്യൻ ഫ്രാഞ്ചൈസികൾ. ഇംഗ്ലീഷ്​ പ്രീമിയർ ലീഗ്​ ക്ലബ്ബായ മാഞ്ചസ്റ്റർ യുനൈറ്റഡ്​ ഫുട്​ബാൾ ടീമിന്‍റെ ഉടമകളായ ലാൻസർ കാപ്പിറ്റലാണ്​ ഇന്ത്യയിൽ നിന്നല്ലാത്ത ഏക ഫ്രാഞ്ചൈസി.

ടീമുകളും താരങ്ങളും

അബൂദബി നൈറ്റ്​ റൈഡേഴ്​സ്​

ഷാരൂഖ്​ ഖാന്‍റെ കൊൽക്കത്ത നൈറ്റ്​ റൈഡേഴ്​സിന്‍റെ യു.എ.ഇ വേർഷനാണ്​ അബൂദബി നൈറ്റ്​ റൈഡേഴ്​സ്​. കൊൽക്കത്തയുടെ വെസ്റ്റിൻഡീസ്​ താരം സുനി​ൽ നരൈനാണ്​ അബൂദബി റൈഡേഴ്​സിനെ നയിക്കുന്നത്​. മറ്റൊരു കൊൽക്കത്തൻ താരം ആന്ദ്രേ റസലും ടീമിലുണ്ട്​. ഇംഗ്ലീഷ്​ വിക്കറ്റ്​ കീപ്പറും വെടിക്കെട്ട്​ താരവുമായ ജോണി ബെയർസ്​റ്റോയാണ്​ ടീമിന്‍റെ കുന്തമുന. ലങ്കൻ താരങ്ങളായ ലാഹിറു കുമാര, അസലങ്ക, ദക്ഷിണാഫ്രിക്കയുടെ കോളിൻ ഇൻഗ്രാം തുടങ്ങിയവരും ടീമിൽ അണിനിരക്കുന്നു.

എം.ഐ. എമിറേറ്റ്​സ്​

ഏറ്റവും കൂടുതൽ ഐ.പി.എൽ കിരീടം നേടിയ മുംബൈ ഇന്ത്യൻസിന്‍റെ സ്വന്തം ടീമാണ്​ എം.ഐ. എമിറേറ്റ്​സ്​. മുംബൈ താരമായിരുന്ന കിറോൺ പൊള്ളാഡാണ്​ നായകൻ. വെസ്റ്റിൻഡീസിൽ നിന്നുള്ള സഹതാരങ്ങളായ ഡ്വൈൻ ബ്രാവോയും നിക്കോളാസ്​ പുരാനും ടീമിലുണ്ട്​. ന്യൂസിലൻഡ്​ പേസർ ട്രെൻഡ്​ ബോൾട്ടാണ്​ ബൗളിങ്​ കരുത്ത്​. മലയാളിയായ യു.എ.ഇ ദേശീയ താരം ബാസിൽ ഹമീദും ടീമിലുണ്ട്​. ​ട്വന്‍റി ലോകകപ്പിലും പ്രാദേശിക ലീഗുകളിലും ബാസിൽ മികച്ച പ്രകടനം കാഴ്ചവെച്ചിരുന്നു. ഇന്ത്യയിൽ നിന്നുള്ള യു.എ.ഇ താരം വൃത്യ അരവിന്ദും പാഡണിയും.

ഡസർട്ട്​ വൈപ്പേഴ്​സ്​

മാഞ്ചസ്റ്റർ യുനൈറ്റഡിന്‍റെ ഉടമസ്ഥതയിലുള്ള ലാൻസർ കാപ്പിറ്റൽ ഇറക്കുന്ന ടീമാണ്​ ഡസർട്ട്​ വൈപ്പേഴ്​സ്​. ടൂർണമെന്‍റിൽ ഇന്ത്യക്ക്​ പുറത്തുള്ള ഏക ഫ്രാഞ്ചൈസിയും ഇവരാണ്​. ഫുട്​ബാളിൽ പയറ്റിത്തെളിഞ്ഞ ഇവർ ക്രിക്കറ്റിൽ ഒരു കൈ നോക്കാൻ ഇറങ്ങുമ്പോൾ കൈയിലുള്ളത്​ ഒരുപിടി മികച്ച താരങ്ങളാണ്​. സൂപ്പർ താരങ്ങളെ നോക്കാതെ മികച്ച കളിക്കാരെ അണിനിരത്താനാണ്​ ഇവരുടെ ശ്രമം. ന്യൂസിലാൻഡ്​ വെടിക്കെട്ട്​ താരം കോളിൻ മൺറോയാണ്​ നായകൻ. ലങ്കൻ ഓൾറൗണ്ടർ വനിന്ദു ഹസരംഗ, ഇംഗ്ലണ്ടിന്‍റെ അലക്സ്​ ഹെയിൽസ്​, ടോം കറൻ, സാം ബില്ലിങ്​സ്​, വെസ്റ്റിൻഡീസിന്‍റെ ഷെൽഡൻ കോട്രൽ, റൂതർഫോഡ്​ തുടങ്ങി ഒരുപിടി മികച്ച താരങ്ങളുണ്ട്​.

ദുബൈ കാപ്പിറ്റൽസ്​

ഐ.പി.എൽ കരുത്തൻമാരായ ഡൽഹി കാപ്പിറ്റൽസിന്‍റെ സ്വന്തം ടീമാണ്​ ദുബൈ കാപ്പിറ്റൽസ്​. വിൻഡിസ്​ ഓൾറൗണ്ടർ റൊവ്​മാൻ പവൽ നയിക്കുന്ന ടീമിൽ ശ്രീലങ്കൻ നായകൻ ദാസുൻ ഷനകയുമുണ്ട്​. മറ്റ്​ ലങ്കൻ താരങ്ങളായ ഭാനുക രാജപക്ഷ, ദുഷ്മന്ത ചമീര എന്നിവർ യു.എ.ഇയിൽ നടന്ന ഏഷ്യകപ്പിൽ മികച്ച പ്രകടനം നടത്തിയിരുന്നു. ബൗളിങിന്​ ചുക്കാൻ പിടിക്കുന്നത്​ അഫ്​ഗാനിസ്ഥാന്‍റെ സ്റ്റാർ സ്പിന്നർ മുജീബുർ റഹ്​മാനായിരിക്കും. ഇന്ത്യൻ താരം റോബിൻ ഉത്തപ്പയും ടീമിലുണ്ട്​. വിൻഡീസ്​ ഓൾറൗണ്ടർ ഫാബിയൻ അലനാണ്​ മറ്റൊരു പ്രതീക്ഷവെക്കുന്ന താരം. സിക്കന്ദർ റാസ, ഇസുറു ഉഡാന, ഹസറത്തുള്ള സെസായി, ചിരാഗ്​ സുരി എന്നിവരും ടീമിന്‍റെ പ്രതീക്ഷകളാണ്​.

ഗൾഫ്​ ജയന്‍റ്​സ്​

അദാനി ഗ്രൂപ്പിന്‍റെ ടീമാണ്​ ഗൾഫ്​ ജയന്‍റ്​സ്​. ഇംഗ്ലണ്ട്​ ഓൾറൗണ്ടർ ജെയിംസ്​ വിൻസിനെ നായകനാക്കി ഇറങ്ങുന്ന ടീമിൽ സഹതാരം ക്രിസ്​ ജോർദാനുമുണ്ട്​. വെസ്റ്റിൻഡ്യൻ തീപ്പൊരി ഷിംറോൺ ഹെറ്റ്​മെയർ, ഡൊമിനിക്​ ഡ്രേക്സ്​, ആസ്​ട്രേലിയയുടെ ​ക്രിസ്​ ലിൻ എന്നിവർ ടീമിൽ അണിനിരക്കും. യു.എ.ഇ ടീമിന്‍റെ മലയാളി നായകൻ സി.പി. റിസ്​വാനാണ്​ മറ്റൊരു പ്രധാന താരം. അന്താരാഷ്ട്ര ക്രിക്കറ്റിൽ സെഞ്ച്വറിയുള്ള ഏക മലയാളി താരമാണ്​ റിസ്​വാൻ. മറ്റൊരു ഇന്ത്യക്കാരനായ യു.എ.ഇ താരം ആയാൻ അഫ്​സൽ ഖാനും ടീമിലുണ്ട്​.

ഷാർജ വാരിയേഴ്​സ്​

ഇന്ത്യ കേന്ദ്രീകരിച്ച്​ പ്രവർത്തിക്കുന്ന കാപ്രി ​ഗ്ലോബൽ മികച്ച നിരയുമായാണ്​ കളത്തിലിറങ്ങുന്നത്​. ഇംഗ്ലണ്ട്​ ഓൾ റൗണ്ടർ മൊഈൻ അലി നയിക്കുന്ന ടീമിൽ നാട്ടുകാരൻ ഡേവിഡ്​ മലനും വെസ്റ്റിൻഡീസിന്‍റെ എവിൻ ലൂയിസും കളം നിറയും. അഫ്​ഗാനിസ്ഥാന്‍റെ മുഹമ്മദ്​ നബിയാണ്​ മറ്റൊരു പ്രധാന താരം. ഇംഗ്ലീഷ്​ വിക്കറ്റ്​ കീപ്പർ ക്രിസ്​ ബഞ്ചമിൻ, ക്രിസ്​ വോക്സ്​, അഫ്​ഗാന്‍റെ റഹ്​മത്തുള്ള ഗുർബാസ്​, നവീൻ ഉൾ ഹഖ്​ എന്നിവരും ടീമിന്​ കരുത്ത്​ പകരുന്നു. യു.എ.ഇ ടീമിലെ മറ്റൊരു മലയാളി താരം അലിഷാൻ ഷറഫുവും ടീമിലുണ്ട്​. തമിഴ്​നാട്ടുകാരനായ യു.എ.ഇ സ്പിന്നർ കാർത്തിക്​ മെയ്യപ്പനാണ്​ മറ്റൊരു താരം.