പള്ളികളിലെ ജല ഉപഭോഗം കുറക്കാൻ പദ്ധതിയുമായി അബൂദബി വിതരണ കമ്പനി

അബൂദബി: അബൂദബി, ദഫ്​റ എന്നിവിടങ്ങളിലെ നഗരങ്ങളിൽ സ്​ഥിതി ചെയ്യുന്ന പള്ളികളിൽ ജല ഉപഭോഗം കുറക്കുന്നതിനുള്ള പദ്ധതിയുമായി അബൂദബി വിതരണ കമ്പനി. മസ്​ജിദി എന്ന്​ പേരിട്ട പദ്ധതിയിൽ കുറച്ച്​ ജലം മാത്രം ഉപയോഗിക്കുന്ന രീതിയിൽ പള്ളികളിലെ അംഗശുദ്ധി വരുത്താനുള്ള ടാപ്പുകൾ മാറ്റി സ്​ഥാപിക്കും. ജല ഉപഭോഗം നിലവിലുള്ളതി​​​െൻറ 50 ശതമാനത്തിലധികം കുറക്കുകയാണ്​ ലക്ഷ്യം. പദ്ധതി നിർവഹണത്തിന്​ കമ്പനി മുസനദയുമായി തിങ്കളാഴ്​ച കരാറിൽ ഒപ്പ്​ വെക്കും. ജലകാര്യക്ഷമത ഉറപ്പ്​ വരുത്തുന്ന തരത്തിലുള്ള ടാപ്പുകളാണ്​ പുതുതായി സ്​ഥാപിക്കുക.

അംഗശുദ്ധി വരുത്തൽ, പള്ളി ശുചീകരണം, പള്ളിയിലെ മരങ്ങൾ നനക്കൽ തുടങ്ങിയ ആവശ്യങ്ങൾക്കായി ഉപയോഗിക്കുന്ന വെള്ളം കൂടുതലാണെന്ന്​ 2014ൽ നടത്തിയ പഠനത്തി​ൽ കണ്ടെത്തിയിരുന്നു. ഇൗ പഠനത്തി​​​െൻറ അടിസ്​ഥാനത്തിലാണ്​ ഇപ്പോൾ ജല ഉപഭോഗം കുറക്കാനുള്ള പദ്ധതി തയാറാക്കിയത്​.