സങ്കുചിത ദേശീയത രാജ്യപുരോഗതി തടയും – പി.കെ. കുഞ്ഞാലിക്കുട്ടി

ദുബൈ: സങ്കുചിത ദേശീയതയും വര്‍ഗീയതയും രാജ്യപുരോഗതി തടയുമെന്നും മതേതരത്വം തകരാതെ നോക്കേണ്ടത് ഒാരോരുത്തരുടെയും ബാധ്യതയാണെന്നും ഇന്ത്യന്‍ യൂനിയന്‍ മുസ്‌ലിംലീഗ് ജനറല്‍ സെക്രട്ടറി പി.കെ. കുഞ്ഞാലിക്കുട്ടി എം.പി. ദുബൈ കെ.എം.സി.സി അൽ ബറാഹയിലെ വിമന്‍ അസോസിയേഷന്‍ ഹാളില്‍ സംഘടിപ്പിച്ച ഗ്ലോബല്‍ ഇന്ത്യന്‍ സമ്മിറ്റില്‍ മുഖ്യാതിഥിയായി സംസാരിക്കുകയായിരുന്നു അദ്ദേഹം. 

പ്രസിഡൻറ്​ പി.കെ. അന്‍വര്‍ നഹ അധ്യക്ഷത വഹിച്ചു. ബഷീറലി ശിഹാബ് തങ്ങള്‍, തമിഴ്‌നാട് മുസ്‌ലിംലീഗ് ജനറല്‍ സെക്രട്ടറി കെ.എ.എം. അബൂബക്കര്‍ എം.എൽ.എ, മുസ്‌ലിംലീഗ് സംസ്ഥാന സെക്രട്ടറി സി.പി. ബാവ ഹാജി, യു.എ.ഇ കെ.എം.സി.സി പ്രസിഡൻറ്​ പുത്തൂര്‍ റഹ്​മാന്‍, ജനറല്‍ സെക്രട്ടറി ഇബ്രാഹിം എളേറ്റില്‍, എം.ജി. പുഷ്പന്‍ മഹാദേവന്‍, സി.വി.എം. വാണിമേല്‍ എന്നിവര്‍ സംസാരിച്ചു.

എ.പി ഷംസുദ്ദീന്‍ ബിന്‍ മുഹ്‌യുദ്ദീന്‍ കോണ്‍സുല്‍ ജനറല്‍ വിപുലിനും ഡോ. പി.എ. ഇബ്രാഹിം ഹാജി പി.കെ. കുഞ്ഞാലിക്കുട്ടിക്കും കെ.എം.സി.സിയുടെ ഉപഹാരം സമ്മാനിച്ചു. ജനറല്‍ സെക്രട്ടറി ഇബ്രാഹിം മുറിച്ചാണ്ടി സ്വാഗതവും ട്രഷറര്‍ എ.സി. ഇസ്മായില്‍ നന്ദിയും പറഞ്ഞു.