ഭക്ഷ്യസു​രക്ഷ ഉറപ്പാക്കാൻ ദുബൈ നഗരസഭയുടെ രണ്ട്​ സ്​മാർട്ട്​ സേവനങ്ങൾ

ദുബൈ: എമിറേറ്റിലെ ഭക്ഷ്യസുരക്ഷ കൂടുതൽ മെച്ചപ്പെടുത്തുന്നതിനും സുസ്​ഥിര നഗരം എന്ന ലക്ഷ്യം കൈവരിക്കുന്നതിനും രണ്ട്​ സ്​മാർട്ട്​ സേവനങ്ങൾ ആരംഭിച്ചതായി ദുബൈ നഗരസഭ അറിയിച്ചു. നഗരസഭുടെ ‘ഫുഡ്​വാച്ച്​’ പ്ലാറ്റ്​ഫോമിന്​ കീഴിൽ ‘ഫുഡ്​വാച്ച്​ സ്​മാർട്ട്​ പെർമിറ്റ്​സ്​’, ഫുഡ്​വാച്ച്​ കോൺഫഡൻസ്​’ എന്നീ സേവനങ്ങളാണ്​ അവതരിപ്പിച്ചത്​. പൊതുജനാരോഗ്യം ​പ്രോത്സാഹിപ്പിക്കാനും ലഭ്യമായ വിഭവങ്ങൾ കാര്യക്ഷമമായി ഉപയോഗപ്പെടുത്താനും അധികൃതർക്കും ഭക്ഷ്യ സ്​ഥാപനങ്ങൾക്കും സേവനദാതാക്കൾക്കും ഉപഭോക്​താക്കൾക്കും നിരവധി ഒാൺലൈൻ സംവിധാനങ്ങളുടെ ഉപയോഗം സാധ്യമാക്കി രാജ്യത്തി​​െൻറ ഭക്ഷ്യ സുരക്ഷ സംസ്​കാരം മെച്ചപ്പെടുത്തുന്നതിനാണ്​ ഫുഡ്​വാച്ച്​ പ്ലാറ്റ്​ഫോം ഒരുക്കിയിരിക്കുന്നത്​.

ദുബൈയിൽ ഭക്ഷ്യസുരക്ഷയിൽ മാനുഷിക മികവ്​ വർധിപ്പിക്കുന്നതിനും ഭക്ഷ്യസുരക്ഷ സംവിധാനം ഏകോപിപ്പിക്കുന്നതിനും സ്​ഥിതിവിവര കണക്കുകളും വിവരങ്ങളും ഉപയോഗപ്പെടുത്തുന്ന ഉദ്യമത്തിനുള്ള സവിശേഷ വേദിയാണ്​ ഫുഡ്​വാച്ച്​ എന്ന്​ ദുബൈ നഗരസഭയുടെ ആരോഗ്യ^സുരക്ഷ^പരിസ്​ഥിതി മേഖല സി.ഇഒ ഖാലിദ്​ മുഹമ്മദ്​ ശരീഫ്​ അൽ അവാദി പറഞ്ഞു. ഭക്ഷ്യസുരക്ഷ നടപടികളുടെ ദൈനംദിന റെക്കോർഡുകൾ കൈകാര്യം ചെയ്യൽ വെല്ലുവിളിയാവുകയാണ്​.

നിലവിൽ 90 ശതമാനത്തിലധികം രേഖകളും നഗരസഭ സൂക്ഷിക്കുന്നത്​ കടലാസിലാണ്​. കടലാസുരേഖകളുടെ ഉപയോഗം കുറക്കുകയാണ്​ ഫുഡ്​വാച്ച്​ പ്ലാറ്റ്​ഫാമി​​െൻറ അവതരണത്തിലൂടെ ലക്ഷ്യം വെക്കുന്നത്​. ഭക്ഷ്യമേളകൾ സംഘടിപ്പിക്കുന്നതിനുള്ള അനുമതി, ഭക്ഷ്യവാഹനങ്ങളുടെ ലൈസൻസ്​, സ്​കൂൾ കാൻറീനുകളിലെ ഭക്ഷ്യവിതരണത്തിന്​ അനുമതി എന്നിവ ‘ഫുഡ്​വാച്ച്​ സ്​മാർട്ട്​ പെർമിറ്റ്​സ്​’ മുഖേന ലഭിക്കും. ഇതുവഴി ലൈസൻസ്​ ലഭ്യമാകാനുള്ള സമയം 50 മണിക്കൂറിൽനിന്ന്​ അഞ്ച്​ മിനിറ്റായി കുറയും.