മരുഭൂമിക്കുള്ളിൽ കുടുങ്ങിയ മലയാളി സംഘത്തെ വീണ്ടെടുത്ത്​ ദുബൈ പൊലീസ്​

ദുബൈ: യു.എ.ഇയുടെ മുക്കുമൂലകൾ കൈവെള്ള പോലെ സുപരിചിതമാണെന്ന ധൈര്യത്തിലാണ്​ മലപ്പുറം ചട്ടിപ്പറമ്പ്​ സ്വദേശി മ ുഷ്​താഖ്​ അലിയും സുഹൃത്ത്​ ഷഹ്​നാസ്​ ഷംസുദ്ദീ​​​​െൻറയും നേതൃത്വത്തിൽ മൂന്ന്​ സ്​ത്രീകളും ഒന്നരവയസുള്ള കുഞ ്ഞുമുൾപ്പെടെ പത്തംഗ സംഘം അൽ ഖുദ്​റക്കടുത്ത മരുഭൂമിയിലേക്ക്​ വാഹനം പറപ്പിച്ചത്.ബേസിൽ ഫാർമസ്യൂട്ടിക്കൽസിൽ പി. ആർ.ഒ ആയ മുഷ്​താഖും കോൺട്രാക്​ടിങ്​ കമ്പനിയിൽ എഞ്ചിനീയറായ ഷഹ്​നാസും ഡെസേർട്ട്​ ഡ്രൈവിന്​ പോകുന്നത്​ പതിവുമാണ്​. സൂര്യാസ്​തമനം കണ്ടാസ്വദിക്കണം, സന്ദർശനത്തിന്​ നാട്ടിൽ നിന്ന്​ വന്നിരിക്കുന്ന മാതാപിതാക്കൾക്ക്​ അൽപം സന്തോഷം പകരണം, കുറച്ച്​ ചിത്രങ്ങളെടുത്ത്​ ഇൻസ്​റ്റാഗ്രാമിൽ പോസ്​റ്റു ചെയ്യണം എന്നിങ്ങനെ ആഗ്രഹങ്ങളുമായാണ്​ പുറപ്പെട്ടത്​.

പക്ഷെ ആ യാത്ര ജീവിതത്തിലെ മറക്കാനാവാത്ത അനുഭവമായി മാറിയെന്ന്​ മുഷ്​താഖ്​ പറയുന്നു. മരുക്കാട്ടിൽ ഒറ്റപ്പെട്ടുപോയവരെക്കുറിച്ച്​ കഥകളിൽ വായിച്ചും മറ്റാരെങ്കിലും പറഞ്ഞു കേട്ടുമുള്ള അറിവല്ലേ നമുക്കുള്ളൂ, പക്ഷെ ഇൗ സംഘം അതു നേരിട്ടനുഭവിച്ചു. ദുബൈ പൊലീസി​​​​െൻറ സേവനം തക്കസമയത്ത്​ ലഭിച്ചില്ലായിരുന്നുവെങ്കിൽ കഥ വേറൊന്നായേനെയെന്നും ഇവർ ഒാർക്കുന്നു. വെള്ളിയാഴ്​ച വൈകീട്ട്​ അൽ ഖുദ്​റയിൽ നിന്ന്​ മടങ്ങവെ ഇവർക്ക്​ വഴി തെറ്റുകയായിരുന്നു. മുന്നോട്ടുപോകു​േമ്പാൾ വഴി കണ്ടെത്താനാകുമെന്ന ധൈര്യത്തിൽ മുന്നോട്ടു പോയി നോക്കി. എട്ടു മണി മുതൽ പുലർച്ചെ ഒരു മണി വരെ വഴി തിരഞ്ഞ്​ നീങ്ങിയെങ്കിലും കൂടുതൽ ഇരുട്ടിലെവിടേയോ ആണ്​ ചെന്നു പെട്ടത്​. വാഹനത്തിൽ തന്നെ ഉറങ്ങി രാവിലെ യാത്ര തുടരാമെന്ന്​ തീരുമാനിച്ചു. പക്ഷെ നേരം പുലർന്നപ്പോഴേക്കും വാഹനങ്ങൾ മൺകൂനകൾക്കുള്ളിൽ പൂണ്ടുപോയിരുന്നു. കയ്യിലുള്ള ഭക്ഷണവും വെള്ളവും തീരുക കൂടി ചെയ്​തതോടെ പ്രശ്​നം സങ്കീർണ്ണമാവുന്നതായി തിരിച്ചറിഞ്ഞു.കൂടുതൽ സാഹസത്തിനു നിൽക്കാതെ ദുബൈ പൊലീസിനെ വിളിക്കാൻ തീരുമാനിച്ചതാണ്​ രക്ഷയായത്​.

ജി.പി.എസ്​ സംവിധാനങ്ങൾ പ്രവർത്തിക്കുന്നില്ല എന്നതിനാൽ ഹെലികോപ്​റ്ററിൽ എത്തിയാണ്​ ​തെരച്ചിൽ നടത്തി പൊലീസ്​ വ്യോമസേനാംഗങ്ങൾ ഇവരെ കണ്ടെത്തിയത്​. വിമാനത്തെ പിൻതുടർന്ന്​ എത്തിയ 4x4 റെസ്​ക്യൂ സംഘം മണ്ണിൽ പൂണ്ടുപോയ വാഹനം വീണ്ടെടുത്തു നൽകി. ഭക്ഷണവും വെള്ളവും നൽകി, പിന്നെ നഷ്​ടപ്പെട്ടു പോയ മനസമാധാനവും. മുറഖബ്​ മരുഭൂമി പ്രദേശത്താണ്​ തങ്ങൾ എത്തിപ്പെട്ടിരിക്കുന്നതെന്ന്​ അപ്പോൾ മാത്രമാണ്​ സംഘം മനസിലാക്കുന്നതു തന്നെ. ഇത്ര സാഹസപ്പെട്ട്​ രക്ഷാ പ്രവർത്തനം നടത്തു​േമ്പാഴും സംഘത്തെ പുഞ്ചിരിയോടെ ആശ്വസിപ്പിക്കാനും സന്തോഷിപ്പിക്കാനും പൊലീസ്​ സംഘം സമയം കണ്ടെത്തിയെന്നും ലോകത്തെ ഏറ്റവും മികച്ച ​പൊലീസ്​ സംഘമാണ്​ ദുബൈയുടേത്​ എന്നതിന്​ വീണ്ടുമൊരു തെളിവാണ്​ തങ്ങളുടെ അനുഭവമെന്നും മുഷ്​താഖും സംഘവും സാക്ഷ്യപ്പെടുത്തുന്നു.