ഗതാഗത നിയമം ലംഘിച്ചാൽ പിഴ, പാലിച്ചാൽ സമ്മാനവും

ദുബൈ: സൂക്ഷിച്ച്​ വാഹനമോടിച്ചില്ലെങ്കിൽ പിഴ കൊണ്ട്​ കുടുങ്ങുമെന്നതു പോലെ ശ്രദ്ധിച്ച്​ വാഹനമോടിക്കുന്നവരെ​ ഉ​ഗ്രൻ സമ്മാനങ്ങളും കാത്തിരിക്കുന്നു.  കഴിഞ്ഞ വർഷം അപകടങ്ങളൊന്നും വരുത്താതെ, ഗതാഗത നിയമങ്ങൾ തെറ്റിക്കാതെ വാഹനമോടിച്ച 2000 മികച്ച ഡ്രൈവർമാരിൽ നിന്ന്​ തെരഞ്ഞെടുക്കപ്പെട്ട രണ്ടു പേർക്ക്​ പുതുപുത്തൻ കാറുകളാണ്​ സമ്മാനം നൽകിയത്​. ദുബൈ പൊലീസ്​ മേധാവി മേജർ ജനറൽ അബ്​ദുല്ല ഖലീഫ അൽ മറി, ഉപ മേധാവി മേജർ ജനറൽ സൈഫ്​ അൽ സഫീൻ എന്നിവരുടെ സാന്നിധ്യത്തിലാണ്​ നറുക്കെടുപ്പ്​ നടന്നത്​.

അൽ ഹബ്​തൂർ ഗ്രൂപ്പ്​ മേധാവി ഖലഫ്​ അൽ ഹബ്​തൂറും സംബന്ധിച്ചു. ആർ.ടി.എയിൽ ജോലി ചെയ്യുന്ന ബിലാൽ ആതിഖ്​, ദുബൈ വിമാനത്താവളത്തിലെ സാറ ജുമ്​അ ഉസ്​മാൻ എന്നിവർക്കാണ്​ ഹ്യുണ്ടായി കാർ സമ്മാനമായി നൽകിയത്​.സാലിക്​, പാർക്കിംഗ്​ ഫൈനുകൾ പോലും വരുത്താത്ത, കഴ​ിഞ്ഞ വർഷം24 വൈറ്റ്​ പോയൻറുകൾ നേടിയ 2000 പേരിൽ 500 പേർ യു.എ.ഇ സ്വദേശികളാണ്​.

റോഡപകടങ്ങൾ വരുത്തിയതിൽ ഇമറാത്തികൾക്ക്​ പിന്നാലെ ഇന്ത്യക്കാരെങ്കിൽ സൂക്ഷിച്ച്​ വാഹനമോടിക്കുന്ന ശീലത്തിലും നമ്മൾ പിന്നിലല്ല.315 ഇന്ത്യക്കാരാണ്​ ഇൗ പട്ടികയിലുൾപ്പെട്ടത്​. 150 ബ്രിട്ടീഷുകാരും147 ഇൗജിപ്​തുകാരുമുണ്ട്​. 
വാഹനയാത്രികരെ ഗതാഗത നിയമങ്ങൾ പാലിക്കാൻ പ്രേരിപ്പിക്കുന്ന ഇൗ ഉദ്യമം വാഹനാപകടങ്ങൾ കുറക്കാനും സന്തോഷവും ​മാനസിക ഉൗർജവും വർധിപ്പിക്കാനും സഹായകമാകുമെന്ന്​ മേജർ ജനറൽ അൽ മറി പറഞ്ഞു.