ഭക്ഷ്യ മേഖലയിൽ ഇന്ത്യയിൽ വൻ നിക്ഷേപത്തിന്​ യു.എ.ഇ

ദുബൈ: ഭക്ഷ്യമേഖലയിൽ ഇരുരാജ്യങ്ങളും തമ്മിലുള്ള സഹകരണം ഊട്ടിയുറപ്പിക്കുമെന്ന പ്രഖ്യാപനവുമായി ഇന്ത്യ -യു.എ.ഇ ഭക്ഷ്യസുരക്ഷ ഉച്ചകോടി തുടങ്ങി. ദുബൈ ഇന്ത്യൻ കോൺസുലേറ്റും കോൺ​ഫെഡറേഷൻ ഓഫ്​ ഇന്ത്യൻ ഇൻഡസ്​ട്രിയും (സി.ഐ.ഐ) സഹകരിച്ചാണ്​ ഉച്ചകോടി സംഘടിപ്പിക്കുന്നത്​. ബുധനാഴ്​ച സമാപിക്കും.

ഗുജറാത്ത്​, മഹാരാഷ്​ട്ര, മധ്യപ്രദേശ്​ എന്നിവിടങ്ങളിലെ പദ്ധതി വഴി യു.എ.ഇയിലേക്കുള്ള ഇന്ത്യയുടെ കാർഷിക കയറ്റുമതി മൂന്നു മടങ്ങ്​ വർധിക്കു​മെന്ന്​ ഇന്ത്യയിലെ യു.എ.ഇ അംബാസഡർ ഡോ. അഹ്​മദ്​ അൽ ബന്ന പറഞ്ഞു. നിലവിലെ രണ്ടു​ ബില്യൺ ഡോളർ ഇടപാട്​ മൂന്നു​ വർഷത്തിനുള്ളിൽ 67 ബില്യണാകുമെന്നും അദ്ദേഹം പറഞ്ഞു. പഞ്ചാബിലെ കാർഷിക മേഖലയിൽ​ നിക്ഷേപമിറക്കാൻ യു.എ.ഇയിലെ നിക്ഷേപകരെ ക്ഷണിക്കുന്നുവെന്ന്​ പഞ്ചാബ്​ പ്രവാസികാര്യ മന്ത്രി റാണ ഗുർമീത്​ സിങ്​ സോധി പറഞ്ഞു. 5000 ഹെക്​ടറിലേറെ ഭൂമിയും എന്തിനും സഹായിക്കുന്ന സംഘവും പഞ്ചാബിലുണ്ടെന്നും അദ്ദേഹം പറഞ്ഞ​ു. ഇന്ത്യ-യു.എ.ഇ ഭക്ഷ്യ ഇടനാഴി പദ്ധതി വഴി 20 ലക്ഷം കർഷകർക്ക്​ ഗുണം ചെയ്യുമെന്ന്​ യു.എ.ഇ സാമ്പത്തികകാര്യ മന്ത്രാലയം അസിസ്​റ്റൻറ്​ അണ്ടർ സെക്രട്ടറി ജുമ അൽ കൈത്​ പറഞ്ഞു. ഇതുവഴി രണ്ടു​ ലക്ഷം പേർക്ക്​ ജോലി ലഭിക്കുമെന്നും അദ്ദേഹം വ്യക്തമാക്കി.ഭക്ഷ്യസുരക്ഷ ശക്തിപ്പെടുത്തുക, ഭക്ഷ്യ ഉൽപാദന സുസ്ഥിര മാതൃകയുണ്ടാക്കുക, കാര്യക്ഷമത നേടുക തുടങ്ങിയ പൊതുലക്ഷ്യങ്ങൾ കൈവരിക്കാൻ ഇരുരാജ്യങ്ങളും പരസ്​പരം സഹായിക്കണമെന്ന്​ ദുബൈയിലെ ഇന്ത്യൻ കോൺസൽ ഡോ. അമൻ പുരി പറഞ്ഞു. ജമ്മു-കശ്​മീരിൽ കാർഷികമേഖലയിലെ നിക്ഷേപം ഇരട്ടിയാക്കാനാണ്​ പദ്ധതിയെന്നും ഇതിലേക്ക്​ യു.എ.ഇയുടെ സഹകരണം പ്രതീക്ഷിക്കുന്നുവെന്നും ജമ്മു- കശ്​മീർ കാർഷിക പ്രിൻസിപ്പൽ സെക്രട്ടറി നവീൻ കെ. ചൗധരി പറഞ്ഞു.

നിക്ഷേപകർ, സംരംഭകർ, കയറ്റുമതിക്കാർ, ഇറക്കുമതിക്കാർ അടക്കം 200ഓളം പ്രതിനിധികളാണ്​ ഉച്ചകോടിയിൽ പ​ങ്കെടുക്കുന്നത്​. യു.എ.ഇയിലെ ഇന്ത്യൻ അംബാസഡർ പവൻ കപൂർ അധ്യക്ഷത വഹിച്ചു. ലോജിസ്​റ്റിക്​സ്​, കാർഷിക സാ​​ങ്കേതികവിദ്യ, പാക്കേജിങ്​ തുടങ്ങിയ മേഖലകളിൽ ചർച്ച നടന്നു.