അബ്​ദുറഹ്​മാൻ അൽ ഖറദാവിയെ ലബനാനിൽനിന്ന്​ യു.എ.ഇ കസ്റ്റഡിയിലെടുത്തു

അബൂദബി: അബ്ദുറഹ്മാൻ അൽ ഖറദാവിയെ ലബനാനിൽ നിന്ന് യു.എ.ഇ കസ്റ്റഡിയിലെടുത്തു. യു.എ.ഇ വാർത്ത ഏജൻസി ‘വാം’ ആണ്​ ഇത്​ സംബന്ധിച്ച വാർത്ത പുറത്തുവിട്ടത്​. അറബ് ആഭ്യന്തര മന്ത്രിമാരുടെ കൗൺസിൽ ജനറൽ സെക്രട്ടേറിയറ്റിന്‍റെ ക്രിമിനൽ ഇൻവെസ്റ്റിഗേഷൻ ആൻഡ് ഡാറ്റ ബ്യൂറോ പുറപ്പെടുവിച്ച താൽക്കാലിക അറസ്റ്റ് വാറണ്ട് പ്രകാരമാണ്​ യു.എ.ഇ ലബനാനിൽ നിന്ന്​ കസ്റ്റഡിയിലെടുത്തത്​. പൊതുസുരക്ഷ അപകടത്തിലാക്കുന്ന പ്രവർത്തനം നടത്തി എന്നതാണ് ഇദ്ദേഹത്തിനെതിരായ കുറ്റം.

ലബനാനിലെ സെൻട്രൽ അതോറിറ്റിക്ക് യു.എ.ഇ നീതിന്യായ മന്ത്രാലയത്തെ പ്രതിനിധീകരിച്ച് സെൻട്രൽ അതോറിറ്റി സമർപ്പിച്ച ഔപചാരിക അഭ്യർഥനയെ തുടർന്നാണ് കൈമാറ്റം നടന്നത്​.

യു.എ.ഇയുടെ സുരക്ഷയെയും സ്ഥിരതയെയും ഉന്നംവെക്കുന്ന ഏതൊരാൾക്കെതിരെയും ഉറച്ച നിലപാട് സ്വീകരിക്കുമെന്നും ദേശീയ സുരക്ഷക്ക്​ ഭീഷണി ഉയർത്തുന്ന ഏതൊരു വ്യക്തിക്കെതിരെയും ആവശ്യമായ എല്ലാ നിയമ നടപടികളും സ്വീകരിക്കുമെന്നും യു.എ.ഇ വാർത്താ എജൻസി വ്യക്​തമാക്കി. പ്രമുഖ ഇസ്​ലാമിക പണ്ഡിതനായിരുന്ന അന്തരിച്ച യൂസഫ് അൽ ഖറദാവിയുടെ മകനാണ് അബ്ദുറഹ്മാൻ അൽ ഖറദാവി.