സുരക്ഷ മേഖലയിൽ സഹകരണം  ശക്​തമാക്കാൻ യു.എ.ഇ-സൗദി ചർച്ച

അബൂദബി: യു.എ.ഇ ഉപപ്രധാനമന്ത്രിയും ആഭ്യന്തര മന്ത്രിയുമായ ശൈഖ് സൈഫ് ബിൻ സായിദ് ആൽ നഹ്​യാനും സൗദി ആഭ്യന്തരമന്ത്രി അബ്​ദുൽ അസീസ്​ ബിൻ സൗദ്​ ബിൻ നാഇഫ്​ ബിൻ അബ്​ദുൽ അസീസും തമ്മിൽ കൂടിക്കാഴ്​ച നടത്തി. സുരക്ഷ-പൊലീസ്​ മേഖലയിലെ സഹകരണം സംബന്ധിച്ച്​ ഇരുവരും പ്രത്യേക ചർച്ച നടത്തി.

ഇരു രാജ്യങ്ങൾക്കും താൽപര്യമുള്ള മറ്റു വിജയങ്ങളും യു.എ.ഇയും സൗദിയും തമ്മിലെ ബന്ധം കൂടുതൽ ശക്​തമാക്കാനുള്ള വഴികളും  വിഷയമായി. യു.എ.ഇ-സൗദി സംയുക്​ത സുരക്ഷ സമിതി റിപ്പോർട്ട്​ വിലയിരുത്തിയ മന്ത്രിമാർ സഹകരണം കൂടുതൽ ശക്​തമാക്കേണ്ടതി​​​െൻറ ആവശ്യകത എടുത്തുപറഞ്ഞു. 
യു.എ.ഇ ആഭ്യന്തര മന്ത്രാലയം നടപ്പാക്കുന്ന നിരവധി പദ്ധതികളും സംരംഭങ്ങളും ശൈഖ്​ സൈഫ്​ സൗദി മന്ത്രിക്ക്​ വിശദീകരിച്ചു നൽകി. ഉപപ്രധാനമന്ത്രിയും പ്രസിഡൻഷ്യൽകാര്യ മന്ത്രിയുമായ ശൈഖ് മൻസൂർ ബിൻ സായിദ് ആൽ നഹ്​യാനുമായും സൗദി ആഭ്യന്തരമന്ത്രി ചർച്ച നടത്തി.

ആഭ്യന്തര മന്ത്രാലയം അണ്ടർ സെക്രട്ടറി ലെഫ്​റ്റനൻറ്​ ജനറൽ സൈഫ്​ അബ്​ദുല്ല അൽ ഷഫാർ, ദുബൈ പൊലീസ്​^പൊതു സുരക്ഷ ​ഉപ​ മേധാവി ലെഫ്​റ്റനൻറ്​ ജനറൽ ദാഹി ഖൽഫാൻ തമീം, ആഭ്യന്തര മന്ത്രാലയം ഇൻസ്​പെക്​ടർ ജനറൽ മേജർ ജനറൽ അഹ്​മദ്​ നാസർ ആൽ റിസി, സിവിൽ ഡിഫൻസ്​ കമാൻഡർ ഇൻ ചീഫ്​ മേജർ ജനറൽ ജാസിം മുഹമ്മദ്​ ആൽ മർസൂഖി, മുതിർന്ന ഉദ്യോഗസ്​ഥർ, സൗദി ഒാഫിസർമാർ തുടങ്ങിയവരും ചർച്ചയിൽ പ​െങ്കടുത്തു.