യു.എ.ഇയിലേക്ക്​ മക്കളെ തനിച്ചയക്കു​േമ്പാൾ സാക്ഷ്യപത്രം നിർബന്ധം

ദുബൈ: ഇന്ത്യയിൽ നിന്ന്​ 18 വയസിൽ താ​െഴയുള്ള കുട്ടികളെ യു.എ.ഇയിലേക്ക്​ തനിച്ച്​ അയക്കുന്നുവെങ്കിൽ മാതാപിതാക്കൾ സാക്ഷ്യപത്രം നൽകണമെന്ന നിബന്ധന നിലവിൽ വന്നു. സാക്ഷ്യപത്രമില്ലാത്ത പക്ഷം കുടുംബാംഗങ്ങൾ ഒപ്പമില്ലാത്ത കുട്ടികളെ മടക്കി അയക്കും. കുട്ടിക്കടത്ത്​ തടയുന്നതി​​​​െൻറ ഭാഗമായി ദുബൈ ഇമിഗ്രേഷൻ, ദുബൈ പൊലീസ്​ തുടങ്ങിയ അധികൃതർ നൽകിയ നിർദേശത്തി​​​​െൻറ അടിസ്​ഥാനത്തിലാണ്​ ജൂൺ ഒന്നു മുതൽ സാക്ഷ്യപത്ര നിബന്ധന പ്രാബല്യത്തിലാക്കിയതെന്ന്​ എയർ ഇന്ത്യ അറിയിച്ചു. 

കുട്ടിയുടെ നാട്ടിലെയും യു.എ.ഇയിലെയും വിലാസം, യു.എ.ഇയിൽ വിമാനമിറങ്ങിയാൽ സ്വീകരിക്കാനെത്തുന്നയാളുടെ പേരും വിലാസവും തുടങ്ങിയ വിവരങ്ങളെല്ലാം മാതാപിതാക്കൾ സാക്ഷ്യപത്രത്തിൽ കൃത്യമായി പൂരിപ്പിച്ചിരിക്കണം. സാക്ഷ്യപത്രം ഉള്ള കുട്ടികളുടെ ഇമിഗ്രേഷൻ പൂർത്തിയാക്കാനും വിമാനത്താവളത്തിൽ നിന്ന്​ അംഗീകൃത വ്യക്​തിക്ക്​ കൈമാറാനും എയർലൈൻ ജീവനക്കാർ സഹായിക്കും. സാക്ഷ്യപത്രം ശരിയായി പൂരിപ്പിക്കാതെയും സംശയാസ്​പദമായ രീതിയിലും തനിച്ച്​ യു.എ.ഇയിൽ വന്നിറങ്ങുന്ന കുട്ടിയെ തിരിച്ച്​ നാട്ടിലേക്കയക്കാനും പിഴകൾ ചുമത്താനും വഴിയൊരുങ്ങിയേക്കുമെന്നും മുന്നറിയിപ്പുണ്ട്​.