മഴയിൽ മുങ്ങി യു.എ.ഇ; ഏതാനും ദിവസം കൂടി തുടരും

അബൂദബി/അൽ​െഎൻ: ചൊവ്വാഴ്​ച യു.എ.ഇയുടെ വിവിധ ഭാഗങ്ങളിൽ ശക്​തമായ മഴ ലഭിച്ചു. ഷാർജ, റാസൽഖൈമ, ദുബൈ, അബൂദബി, ഫുജൈറ എമി​േററ്റുകളിലാണ്​ കനത്ത മഴ പെയത്​ത്​. അബൂദബിയിൽ പുലർച്ചെ നാല്​ മുതൽ രാവിലെ ഒമ്പത്​ വരെ മഴ പെയ്​തു. മഴ കാരണം ശൈഖ്​ സായിദ്​ റോഡിൽ ഗതാഗതം സാവധാനത്തിലായി വാഹനങ്ങൾ നീണ്ട വരിയായി കിടന്നു. വിവിധയിടങ്ങളിൽ വാഹനാപകടങ്ങളുണ്ടായി ഗതാഗതം തടസ്സപ്പെട്ടു. 
ശൈഖ്​ സായിദ്​ റോഡിൽ അബൂദബിയിലേക്കുള്ള പാതയിലും ഗർഹൂദ്​ പാലം കഴിഞ്ഞും അപകടമുണ്ടായി. ഇതു കാരണം രാവിലെ ഏറെ നേരം ഗതാഗത തടസ്സം അനുഭവപ്പെട്ടു.
അൽ​െഎനിലും പരിസര പ്രദേശങ്ങളിലും തിങ്കളാഴ്​ച രാവിലെ തുടങ്ങിയ പൊടിക്കാറ്റിന്​ ശമനമിട്ട്​ രാത്രി 12 മുതൽ ശക്​തമായ മഴ പെയ്​തു. ചൊവ്വാഴ്​ച രാവിലെ പത്ത്​ വരെ മഴ നീണ്ടുനിന്നു. പുലർച്ചെ നാലോടെ ഇടിയും മിന്നലും തുടങ്ങിയ​േപ്പാഴാണ്​​ മഴ കൂടുതൽ ശക്​തി പ്രാപിച്ചത്​. വിവിധ സ്​ഥലങ്ങളിൽ വെള്ളക്കെട്ട്​ രൂപപ്പെട്ടു. അൽ​െഎനി​​െൻറ സമീപ പ്രദേശങ്ങളായ ജിമി, മഖാം എന്നിവിടങ്ങളിൽ മരങ്ങൾ കടപുഴകി റോഡിലേക്ക്​ വീണു. രാവിലെ തന്നെ നഗരസഭ ജീവനക്കാർ വെള്ളക്കെട്ടുകൾ ഒഴിവാക്കുകയും മരങ്ങൾ നീക്കം ചെയ്യുകയും ചെയ്​തതതോടെ ഗതാഗത തടസ്സങ്ങൾ ഒഴിവായി.
അടുത്ത ഏതാനും ദിവസം കൂടി രാജ്യത്ത്​ ഒറ്റപ്പെട്ട മഴയുണ്ടാകുമെന്ന്​ ദേശീയ കാലാവസ്​ഥ^ഭൂകമ്പ​ശാസ്​ത്ര കേന്ദ്രം (എൻ.സി.എം.എസ്​) അറിയിച്ചു. മഴ കാരണം കാഴ്​ചാപരിധി കുറയുമെന്നും വാഹനങ്ങളുടെ വേഗത കുറക്കണമെന്നും വാഹനങ്ങൾക്കിടിയിൽ സുരക്ഷിത അകലം സൂക്ഷിക്കണമെന്നും എൻ.സി.എം.എസ്​ മുന്നറിയിപ്പ്​ നൽകി. 
ബുധനാഴ്​ച ആകാശം ഭാഗികമായി മേഘാവൃതമായിരിക്കും. മിതമായ വേഗതയിൽ കാറ്റടിക്കും. കാറ്റ്​ പൊടിപടലങ്ങളുയരാൻ കാരണമാകുന്നതിനാൽ കാഴ്​ചാപരിധി കുറയും. 
അറേബ്യൻ ഉൾക്കടൽ ചില സമയങ്ങളിൽ പ്രക്ഷുബ്​ധമായിരിക്കും. വ്യാഴാഴ്​ച കൂടുതൽ മഴക്ക്​ സാധ്യതയുണ്ടെന്നും എൻ.സി.എം.എസ്​ അറിയിച്ചു.

ദുബൈയിൽ 160 ലേറെ അപകടങ്ങൾ
ദുബൈ: രാ​ത്രി വീശിയ കനത്ത കാറ്റിനു പിന്നാലെ കോരിച്ചൊരിഞ്ഞു പെയ്​ത മഴയിൽ ഏറ്റവുമധികം വലഞ്ഞത്​ ദുബൈയിലെ വാഹനയാത്രികരാണ്​. ഷാർജയിൽ നിന്ന്​ ദുബൈയിലേക്ക്​ രാവിലെ അനുഭവപ്പെടുന്ന കനത്ത ട്രാഫിക്കിനിടയിലും 40 മിനിറ്റു കൊണ്ട്​ എത്തിയിരുന്നവർ മൂന്നു മണിക്കൂറാണ്​ റോഡിൽ കുരുങ്ങിയത്​. രാത്രി 12നും രാവിലെ എട്ടിനുമിടയിൽ 160 വാഹനാപകടങ്ങൾ​ ദുബൈ പൊലീസിൽ റിപ്പോർട്ട്​ ചെയ്യപ്പെട്ടു.1423 അടിയന്തിര സഹായ വിളികൾ​ ദുബൈ പൊലീസ്​ കൺട്രോൾ റൂമിലെത്തി. അപകടങ്ങൾ ചെറുതെങ്കിലും പരി​ഭ്രാന്തിയും തലങ്ങും വിലങ്ങും ഗതാഗതക്കുരുക്കുമുണ്ടാക്കാൻ കാരണമായി. യാത്രക്കാർ ഗതാഗത നിയമങ്ങളും സുരക്ഷിതമായ അകലവും പാലിക്കണമെന്ന്​ കൺട്രോൾ യൂനിറ്റ്​ ഡെ. ഡയറക്​ടർ കേണൽ ആരിഫ്​ അൽ ശംസി നിർദേശിച്ചു.  റോഡുകളിൽ തെന്നലുള്ളതിനാൽ വേഗത കുറച്ച്​ സഞ്ചരിക്കണമെന്നും അദ്ദേഹം നിർദേശിച്ചു. 
ഷാർജയിലേക്കുള്ള വഴി മധ്യേ അൽ അവീർ മേഖലയിൽ  കൂറ്റൻ യന്ത്രഭാഗങ്ങളുമായി എത്തിയ ട്രക്ക്​ മറ്റൊരു വാഹനത്തിലിടിച്ച്​ ഡ്രൈവർക്ക്​ സാരമായ പരിക്കേറ്റു. ഇത്​ ഗതാഗത കുരുക്ക്​ കൂടുതൽ രൂക്ഷമാക്കി. കാലാവസ്​ഥ  സ്​ഥിരതയില്ലാത്തതിനാൽ  കടലിൽ നീന്താനിറങ്ങുന്നതും പൊലീസ്​ നിരുത്സാഹപ്പെടുത്തുന്നുണ്ട്​.