അഫ്​ഗാന് വീണ്ടും യു.എ.ഇയുടെ സഹായം

ദുബൈ: ഭൂകമ്പത്തെ തുടർന്ന്​ ദുരിതത്തിലായ അഫ്​ഗാനിസ്താനിലേക്ക്​ കൂടുതൽ സഹായ വസ്തുകളെത്തിച്ച്​ യു.എ.ഇ. 11ലക്ഷം ദിർഹം മൂല്യമുള്ള 40 ടൺ സഹായ വസ്തുക്കളാണ്​ ദുബൈ ഹ്യൂമാനിറ്റേറിയന്‍റെ നേതൃത്വത്തിൽ അയച്ചത്​. ഒരാഴ്ചക്കിടെ കൂട്ടായ്മ അഫ്​ഗാനിലേക്ക്​ അയക്കുന്ന രണ്ടാമത്തെ സഹായമാണിത്​.

ടെൻറുകൾ, താമസ സ്ഥലത്തിനാവശ്യമായ വസ്തുക്കൾ, വീടുകളിലെ അവശ്യ വസ്തുക്കൾ, മരുന്നുകൾ തുടങ്ങിയവ ഉൾപ്പെടെയാണിത്. ഭൂകമ്പ ബാധിത പ്രദേശത്തെ 50,000ത്തിലേറെ ജനങ്ങൾക്ക്​ ഈ സഹായം ഉപകാരപ്പെടുമെന്നാണ്​ പ്രതീക്ഷിക്കുന്നത്​. ദുബൈയിൽ നിന്ന്​ വിമാനമാർഗമാണ്​ സഹായം അഫ്​ഗാനിലെത്തിച്ചത്​.

കഴിഞ്ഞയാഴ്ച 84 ടൺ സഹായ വസ്തുക്കളാണ്​ ഭൂകമ്പ മേഖലയിലേക്കയച്ചത്​. മരുന്നുകൾ, താമസ സൗകര്യങ്ങളുമായി ബന്ധപ്പെട്ട വസ്തുക്കൾ എന്നിവയടക്കം 34 ലക്ഷം ദിർഹം മൂല്യമുള്ള വസ്തുക്കളാണ്​ ഇതിലുണ്ടായിരുന്നത്​. ദിവസങ്ങൾക്ക്​ മുമ്പുണ്ടായ ഭൂകമ്പത്തിൽ 2,200ലേറെ പേരാണ്​ അഫ്​ഗാനിലെ പടിഞ്ഞാറൻ മേഖലയിൽ മരിച്ചത്​.