അനുകരിച്ച മുഹ്​റയെ ഒാമനിച്ച്​ ശൈഖ്​ മുഹമ്മദ്​

ദുബൈ:  യു.എ.ഇ വൈസ്​പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം വീണ്ടുമാ കുഞ്ഞു മിടുക്കിയെ എടുത്തുയർത്തി^ മുഹ്​റ അഹ്​മദ്​ അൽ ഷെഹി എന്ന ആറു വയസുകാരിയെ. കഴിഞ്ഞ വർഷം തന്നെ അനുകരിച്ച്​ സംസാരിക്കുന്ന മുഹ്​റയുടെ വീഡിയോ ശ്രദ്ധയിൽപ്പെട്ട ശൈഖ്​ മുഹമ്മദ്​ അതു സാമൂഹിക മാധ്യമങ്ങളിൽ പങ്കുവെക്കുകയും ഷാർജയിലെ വീട്ടിലെത്തി കുട്ടിയെ അഭിനന്ദിക്കുകയും ചെയ്​തിരുന്നു. 
കഴിഞ്ഞ ദിവസം ദുബൈ വേൾഡ്​ ട്രേഡ്​ സ​​െൻററിൽ വിദ്യാഭ്യാസ മന്ത്രാലയം ഒരുക്കിയ ഹാദി ബിലാദി ^ഇതെ​​​െൻറ സ്വന്തം നാട്​ എന്ന സംഗീത^നൃത്ത ശിൽപം കാണാൻ എത്തിയപ്പോഴാണ്​ മുഹ്​റയെ വീണ്ടും ഭരണാധികാരി കണ്ടത്​. 

കുഞ്ഞിനെ വാരിയെടുത്ത അദ്ദേഹം കൂടി നിന്നവരോടെല്ലാം അവളെ പുകഴ്​ത്തി സംസാരിക്കുകയും ചെയ്​തു. മുഹ്റ കലാപരിപാടി അവതരിപ്പിക്കുന്ന ചിത്രങ്ങൾ ദുബൈ കിരീടാവകാശി ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം ഇൻസ്​റ്റാഗ്രാമിൽ പങ്കുവെക്കുകയും ചെയ്​തു.കഴിഞ്ഞ വർഷം സ്​കൂൾ അസംബ്ലിയിൽ അവതരിപ്പിക്കുന്നതിന്​ തയ്യാറെടുക്കവെയാണ്​ മുഹ്​റയുടെ പ്രസംഗം മുതിർന്നവരാരോ പകർത്തി സാമൂഹിക മാധ്യമങ്ങളിൽ പോസ്​റ്റു ചെയ്​തത്​.