യു.എ.ഇ-ഒമാൻ ചരക്ക്​ ട്രെയിൻ സർവിസ്​ ​പ്രഖ്യാപിച്ചു; നോതം ലോജിസ്റ്റിക്സും എ.ഡി പോർട്​സ്​ ഗ്രൂപ്പും കരാർ ഒപ്പുവെച്ചു

അബൂദബി: ഒമാനിലെ സോഹാറിനേയും യു.എ.ഇയിലെ അബൂദബി എമിറേറ്റിനേയും ബന്ധിപ്പിക്കുന്ന ഹഫീത്​​ ചരക്ക്​ ട്രെയ്​ൻ സർവിസ്​ പ്രഖ്യാപിച്ചു. ഇതു സംബന്ധിച്ച കരാറിൽ ഹഫീത്​ റെയിൽ കമ്പനിയുമായി നോതം ലോജിസ്റ്റിക്സും എ.ഡി പോർട്​സ്​ ഗ്രൂപ്പ്​ കമ്പനിയും ഒപ്പുവെച്ചു. അബൂദബി പോർട്​സ്​ ​ഗ്രൂപ്പിന്​ കീഴിലുള്ള സ്ഥാപനമാണ്​ നോതം ലോജിസ്റ്റിക്സ്​. അബൂദബിയിൽ നടക്കുന്ന ഗ്ലോബൽ റെയിൽ 2025 എക്സിബിന്‍റെ ഭാഗമായാണ്​ കരാർ യാഥാർഥ്യമായത്​. ഇരുരാജ്യങ്ങൾക്കുമിടയിൽ ചരക്ക്​ ഗതാഗതം ശക്​തിപ്പെടുത്താൻ പുതിയ കരാർ സഹായകമാവും.

​ കരാർ പ്രകാരം നോതം ലോജിസ്റ്റിക്സ്​ ഹഫീത്​ റെയിൽ ശൃംഖല ഉപയോഗിച്ച്​ ഇരു രാജ്യങ്ങൾക്കുമിടയിൽ പ്രതിദിന സർവിസ്​ ആരംഭിക്കും. ആഴ്​ചയിൽ ഏഴ്​ കണ്ടെയ്​നർ ട്രെയ്​നുകൾ ഉപയോഗിച്ചായിരിക്കും സർവിസ്​ നടത്തുക. ഓരോ കണ്ടെയ്​നറിനും 276 ടി.ഇ.യു ശേഷിയുണ്ടാകും. അതായത്​ പ്രതിവർഷം 193,200 ടി.ഇ.യു യൂനിറ്റായിരിക്കും ശേഷി. 20, 40, 45 അടി കണ്ടെയ്​നറുകളാണ് സർവിസിനായി ഉപയോഗപ്പെടുത്തുക.

ഇതിലൂടെ കൂടുതൽ ചരക്കുകൾ വിശ്വസനീയമായി എത്തിക്കാനാവും. ​ജനറൽ കാർഗോ, ഭക്ഷ്യവസ്തുക്കൾ, വിവിധ ഉത്​പന്നങ്ങൾ, ഫാർമസ്യൂട്ടിക്കൽസ്​, കാർഷിക ഭക്ഷ്യ വസ്തുക്കൾ, മറ്റ്​ അവശ്യ വസ്തുക്കൾ എന്നിവയായിരിക്കും ​ചരക്ക്​ ട്രെയ്​നുകൾ വഴി കൊണ്ടുപോകുക. മേഖലയിലെ തന്ത്രപ്രധാനമായ രണ്ട്​ കേന്ദ്രങ്ങളെ റെയിൽ വഴി ബന്ധിപ്പിക്കുന്നതിലൂടെ സേവനങ്ങളുടെ വ്യാപ്തി വിപുലീകരിക്കാനും സുസ്ഥിരവുമായ ഗതാഗത മാർഗങ്ങൾ പ്രയോജപ്പെടുത്താൻ ഉപഭോക്​താക്കളെ പ്രാപ്തരാക്കാനും കഴിയുമെന്ന്​ നോതം ലോജിസ്റ്റിക്സ്​, എ.ഡി പോർട്​സ്​ ഗ്രൂപ്പ്​ സി.ഇ.ഒ സമിർ ചതുർവേദി പറഞ്ഞു.

ഹ്രസ്വ ദൂരങ്ങളിലേക്കും ദീർഘദൂരങ്ങളിലേക്കും വലിയ അളവിൽ ചരക്കുകൾ നീക്കുന്നതിന്​ റോഡ്​ ഗതാഗതത്തേക്കാൾ റെയിൽ സർവിസിന്​ ചെലവ്​ കുറവാണെന്നും അദ്ദേഹം പറഞ്ഞു. ഒമാനിലെ സുഹാർ നഗരത്തെയും യു.എ.ഇയിലെ അബൂദബി എമിറേറ്റിനെയും ബന്ധിപ്പിക്കുന്ന ഹഫീത്​ റെയിൽ ശൃംഖലക്ക്​​ 238 കിലോമീറ്ററാണ്​ നീളം. 300 കോടി യു.എസ്​ ഡോളറാണ്​ നിർമാണ ചെലവ്​. അതേസമയം, എന്ന്​ മുതൽ സർവിസ്​ ആരംഭിക്കുമെന്ന്​ അധികൃതർ വെളിപ്പെടുത്തിയിട്ടില്ല