മാതൃദിനത്തിൽ അമ്മമാർക്ക്​ അഭിനന്ദനമോതി രാഷ്​ട്ര നേതാക്കൾ

ദുബൈ: യു.എ.ഇ മാതൃദിനമായിരുന്ന ഇന്നലെ നാടിനു വേണ്ടി ജീവനർപ്പിച്ച രക്​തസാക്ഷികളുടെ ധീരമാതാക്കൾക്ക്​ അഭിവാദ്യങ്ങളർപ്പിച്ച്​ രാഷ്​ട്ര നേതാക്കൾ. വൈസ്​പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമും അബൂദബി കിരീടാവകാശിയും സായുധസേന ഡെപ്യൂട്ടി കമാൻററുമായ ശൈഖ്​ മുഹമ്മദ്​ ബിൻ സായിദും അവരെ നേരിൽ സന്ദർ​ശിച്ച്​ സമ്മാനങ്ങളും ആശംസകളും കൈമാറി. രക്​തസാക്ഷികളുടെ ഉമ്മമാരെ അമൂല്യവും ഉന്നതരുമായ മനുഷ്യർ എന്നാണ്​ നേതാക്കൾ വിശേഷിപ്പിച്ചത്​.
രക്​തസാക്ഷികളുടെ അമ്മമാരേ, ആനന്ദിക്കൂ എന്നു തുടങ്ങുന്ന കവിതയുമായാണ്​ ശൈഖ്​ മുഹമ്മദ്​ ബിൻ റാശിദ്​ മാതൃദിനത്തെ സംബോധന ചെയ്​തത്​.  
സമൂഹത്തിനുവേണ്ടി മഹത്തായ സംഭാവന നൽകിയ മാതാക്കളെയോർത്ത്​ രാജ്യം എന്നും അഭിമാനിക്കുന്നുവെന്നറിയിച്ച്​ ശൈഖ്​ മുഹമ്മദ്​ ബിൻ സായിദ്​ ഇവർക്കെല്ലാം സന്ദേശങ്ങളയച്ചു.
 ശൈഖ്​ മുഹമ്മദി​​െൻറ നിർദേശ പ്രകാരം  ദുബൈ പൊലീസ്​  മേധാവി മേജർ ജനറൽ അബ്​ദുല്ലാ ഖലീഫ അൽ മറി അന്തരിച്ച മുൻ മേധാവി ഖമീസ്​ മതാർ അൽ മുസൈനയുടെ മാതാവിനെ സന്ദർശിച്ച്​ ഫസ്​റ്റ്​ ക്ലാസ്​ മെഡൽ സമ്മാനിച്ചു.