യു.എ.ഇ രക്തസാക്ഷി സ്മാരകം വഹത് അൽ കറാമക്ക് അമേരിക്കൻ പുരസ്​കാരം

അബൂദബി: യു.എ.ഇ രക്തസാക്ഷി സ്മാരകമായ വഹത് അൽ കറാമക്ക് അമേരിക്കൻ വാസ്​തുശിൽപ പുരസ്‌കാരം. ആഗോള സാംസ്‌കാരിക നിർമിതികളുടെ വിഭാഗത്തിലാണ് വഹത് അൽ കറാമയെ മികച്ച സൃഷ്​ടിയായി തെരഞ്ഞെടുത്തത്. 42ഓളം വിഭാഗങ്ങളിലുള്ള നിർമിതകൾക്കാണ് ഇത്തവണ പുരസ്‌കാരം നൽകിയത്.  വിവിധ രാജ്യക്കാരായ 36 വിധികർത്താക്കളുടെ പാനലാണ് സ്​മാരകത്തെ പുരസ്‌കാരത്തിനായി തെരഞ്ഞെടുത്തത്. നിർമ്മിതിയിലെ മികവ്, പുതുമ, പ്രവർത്തനം എന്നിവയെല്ലാം പരിഗണിച്ചാണ് പുരസ്‌കാരത്തിന് തെരഞ്ഞെടുക്കുന്നത്. 

 90 മീറ്റർ വലിപ്പത്തിലുള്ള 31ഓളം ശിലാഫലകങ്ങൾ ചേർത്തുവച്ചാണ് വഹത് അൽ കറാമയുടെ നിർമാണം. യു.എ.ഇ സൈനികരുടെ രക്തസാക്ഷിത്വം, കർമരംഗത്തെ സൈനികർ, സൈനികർക്ക്​ രാഷ്​ട്രവും ജനങ്ങളും നൽകുന്ന പിന്തുണ എന്നിവയാണ് ഈ സൃഷ്​ടിയിലൂടെ ആവിഷ്​കരിക്കുന്നത്.  ബ്രിട്ടീഷ് വാസ്​തുശിൽപിയായ ഇദ്​രീസ്​ ഖാ​​െൻറ നേതൃത്വത്തിലുള്ള സംഘമാണ് വഹത്​ അൽ കറാമയുടെ നിർമിതിക്ക് പിന്നിൽ പ്രവർത്തിച്ചത്. പ്രവർത്തനരഹിതമായ യു.എ.ഇ പട്ടാള വാഹനങ്ങളിൽനിന്നെടുത്ത പത്ത് ടണ്ണോളം അലുമിനിയം ഉപയോഗിച്ചാണ് വഹത് അൽ കറാമയിലെ 2800ഓളം പ്ലേറ്റുകളുടെ നിർമാണം. 

യു.എ.ഇ രാഷ്​ട്രപിതാവ് ശൈഖ് സായിദ് ബിൻ സുൽത്താൻ ആൽ നഹ്​യാൻ, പ്രസിഡൻറ്​ ശൈഖ് ഖലീഫ ബിൻ സായിദ് ആൽ നഹ്​യാൻ, വൈസ് പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മഖ്‌തും, അബൂദബി കിരീടാവകാശിയും യു.എ.ഇ സായുധ സേനാ ഡെപ്യൂട്ടി സുപ്രീം കമാൻഡറുമായ ജനറൽ ശൈഖ് മുഹമ്മദ് ബിൻ സായിദ് ആൽ നഹ്​യാൻ എന്നിവരുടെ വചനങ്ങളാണ് ഇവയിൽ ആലേഖനം ചെയ്തിട്ടുള്ളത്.