അപകട സ്​ഥലത്ത്​ കൂടി നിന്നാൽ പിഴ; ചിത്രം പകർത്തി ​പ്രചരിപ്പിച്ചാൽ നടപടി

അബൂദബി: അപകടങ്ങൾ നടന്ന സ്​ഥലങ്ങളിൽ എത്തിനോക്കി നടക്കുന്ന ശീലമുണ്ടോ നിങ്ങൾക്ക്​. എങ്കിൽ അത്​ ഇപ്പോൾ തന്നെ നിർത്തണമെന്ന്​ അബൂദബി പൊലീസ്​ കർശനമായി നിർദേശിക്കുന്നു. റോഡിൽ അപകടങ്ങൾ നടന്നതു കണ്ട്​ വാഹനം പതുക്കെയാക്കിയും നിർത്തിയിട്ടും ദൃശ്യങ്ങൾ വീക്ഷിക്കാനും ഇറങ്ങി നടന്ന്​ ആംബുലൻസിനും സിവിൽ ഡിഫൻസ്​ വാഹനങ്ങൾക്കും മാർഗ തടസം സൃഷ്​ടിക്കുകയും ചെയ്യുന്നവർക്ക്​ ആയിരം ദിർഹം പിഴ ഉറപ്പാണ്​. 

പല അപകടങ്ങളും സൃഷ്​ടിക്കുന്നത്​ തന്നെ ഇത്തരം എത്തിനോട്ടക്കാരായ വാഹന യാത്രികരും കാൽനടക്കാരുമാണെന്ന്​ അബുദബി ട്രാഫിക്​ പട്രോൾ ഡയറക്​ടറേറ്റിലെ ട്രാഫിക്​ കൺട്രോൾ വിഭാഗം മേധാവി മേജർ ജനറൽ അബ്​ദുല്ല അൽ ഖുബൈസി പറഞ്ഞു.  ചിലർ ഗതാഗതം തടസപ്പെടുമെന്നതൊന്നും കാര്യമാക്കാതെയാണ്​ അപകട ദൃശ്യങ്ങൾ കാണാൻ തടിച്ചു കൂടുന്നത്​. വാഹനങ്ങൾ തിരക്കിലേക്ക്​ പാഞ്ഞു കേറാൻ ചിലപ്പോഴിത്​ വഴിവെക്കും. രക്ഷാ പ്രവർത്തനങ്ങൾ മന്ദീഭവിപ്പിക്കാനും കാരണമാവും. പിഴ ഏർപ്പെടുത്തുന്നത്​ ജനങ്ങൾ നിയമവിരുദ്ധമായി റോഡിൽ തടിച്ചു കൂടുന്നത്​ ഒഴിവാക്കാനും ആംബുലൻസുകൾക്കും സിവിൽ ഡിഫൻസ്​ വാഹനങ്ങൾക്കും എളുപ്പത്തിൽ പ്രവർത്തിക്കാനും സഹായകമാവും. അപകട ദൃശ്യങ്ങളും പരിക്കേറ്റവരുടെ ചിത്രങ്ങളും പകർത്തുകയും സാമൂഹിക മാധ്യമങ്ങളിൽ പങ്കുവെക്കുകയും ചെയ്യുന്നവർ ജനങ്ങളുടെ സ്വകാര്യത ലംഘിക്കുന്നതിന്​ നിയമ നടപടി നേരിടേണ്ടി വരും.