തൊഴിൽ തർക്കങ്ങൾ  10 ദിവസം കൊണ്ട്​ തീർപ്പാക്കാൻ വിപുല പദ്ധതി

ദുബൈ: എമിറേറ്റിലെ തൊഴിലാളി തർക്കങ്ങൾ പത്തു ദിവസം കൊണ്ട്​ തീർപ്പാക്കാൻ പദ്ധതി. നിലവിൽ 30 ദിവസം എടുത്തിരുന്നത്​ 10 ദിവസമാക്കി കുറക്കാൻ മാനവ വിഭവ^സ്വദേശിവത്​കരണ മന്ത്രാലയം  വിപുല സംവിധാനങ്ങളാണ്​ മുന്നോട്ടുവെച്ചിരിക്കുന്നത്​. തൊഴിൽ തർക്കങ്ങൾ ഏറ്റവും മികച്ച രീതിയിൽ ഒത്തുതീർക്കുന്നതിന്​ ആറ്​ സംഘങ്ങൾ രൂപം നൽകിയതായി മന്ത്രാലയത്തി​ലെ തൊഴിലാളി വിഭാഗം ഡയറക്​ടർ മുഹമ്മദ്​ അഹ്​മദ്​ മുബാറക്​ അൽ ഹമ്മാദി വ്യക്​തമാക്കി. തർക്കങ്ങൾ പരിഹരിക്കുന്നതിന്​ വേണ്ട സമയത്തിൽ നല്ല കുറവു വരും. തൊഴിലാളികളുടെ പരാതികൾ സേവന കേന്ദ്രങ്ങളിൽ രജിസ്​റ്റർ ചെയ്യാം. കോടതിയിലേക്ക്​ നീങ്ങാതെ രമ്യമായി പരിഹാരമുണ്ടാക്കാനാണ്​ ശ്രമിക്കുക. 

ദുബൈ കോർട്​സ്​ മുന്നോട്ടുവെക്കുന്ന നിർദേശങ്ങൾക്കനുസൃതമായ ‘ഗ്രീൻ റൂം’ ആണ്​ പദ്ധതികളിലൊന്ന്​. തർക്കത്തിലുള്ള കക്ഷികൾക്ക്​ സമാധാനപൂർണമായ ഒരു അന്തരീക്ഷത്തിൽ ഇരുന്ന്​ ചർച്ച ചെയ്യാനുള്ള സൗകര്യമാണ്​ അവിടെ ഒരുക്കുക. നിയമ ഉപദേശ സംവിധാനമാണ്​ മറ്റൊരു പദ്ധതി. തൊഴിലാളികൾക്ക്​ തങ്ങളുടെ അവകാശങ്ങളെക്കുറിച്ച്​ ബോധവത്​കരണം നൽകാനാണിത്​. ​തൊഴിലാളികളുടെ ​പ്രശ്​നങ്ങൾക്ക്​ രണ്ടു ദിവസം കൊണ്ട്​ കൃത്യമായ മറുപടി നൽകും.
സഞ്ചരിക്കുന്ന തൊഴിൽ കോടതികളാണ്​ തർക്കങ്ങൾ എളുപ്പം തീർപ്പാക്കാനുള്ള സുപ്രധാന പദ്ധതികളിലൊന്ന്​.  

മന്ത്രാലയത്തിലെ തൊഴിൽ ഇൻസ്​പെക്​ടർമാരും ദുബൈ കോടതിയിലെ വിദഗ്​ധരും ഉൾക്കൊള്ളുന്ന സഞ്ചരിക്കുന്ന കോടതി തൊഴിലാളികളുടെ പ്രശ്​നങ്ങളിലും സമരങ്ങളിലും അടിയന്തിരമായി ഇടപെടും. തങ്ങളുടെ സഹപ്രവർത്തകരുടെ ഭാഗം വിശദീകരിക്കാനായി  തൊഴിലാളികൾക്കും കോടതി അവസരം നൽകും.