യു.എ.ഇയിൽ നിന്ന്​ കെ.എം.സി.സി  ചാർട്ടഡ് ഫ്ലൈറ്റുകൾ നാളെ മുതൽ 

ദുബൈ: കൊറോണ വ്യാപനം തടയുന്നതിന്​ ഏർപ്പെടുത്തിയ  യാത്രാവിലക്കുമൂലം യു.എ.ഇയിൽ കുടുങ്ങിപ്പോയ പ്രവാസികൾക്കായി യു.എ.ഇ കെ.എം.സി.സി ഏർപ്പെടുത്തിയ ചാർട്ടഡ് വിമാനങ്ങൾ ജൂൺ രണ്ട്​ മുതൽ പറന്നു തുടങ്ങും. ജൂൺ രണ്ടിന് ഷാർജ അഴീക്കോട് മണ്ഡലം കെ.എം.സി.സി യുടെയും ജൂൺ മൂന്നിന് ദുബൈ മലപ്പുറം ജില്ലാ കെ.എം.സി.സി.യുടെയും വിമാനങ്ങളാണ്​ സർവീസ്​ നടത്തുക. രണ്ടു വിമാനങ്ങളും രാവിലെ 5 മണിക്കാണ് റാസല്‍ഖൈമ എയര്‍പോര്‍ട്ടില്‍ നിന്ന് പുറപ്പെടുക. ജൂൺ ഒന്നിന് ഷാർജ അഴീക്കോട് മണ്ഡലം കെ.എം.സി.സി യുടെയും ജൂൺ രണ്ടിന് ദുബൈ മലപ്പുറം ജില്ലാ കെ.എം.സി.സി.യുടെയും വിമാനങ്ങളാണ്​ സർവീസ്​ നടത്തുക.

റാസൽഖൈമയിൽ നിന്ന്​ കോഴിക്കോട്​ വിമാനത്താവളത്തിലേക്കാണ്​ സർവീസ്​. സ്​പൈസ്​ജെറ്റ്​ കമ്പനിയുടെ വിമാനത്തിൽ 1250 ദിർഹം ഇൗടാക്കിയാണ്​ യാത്രക്കാരെ കൊണ്ടുപോവുക. ദ​ുബൈ,ഷാർജ എന്നിവിടങ്ങളിൽ നിന്നുള്ള യാത്രക്കാരെ പ്രത്യേക ബസുകളിൽ റാസൽഖൈമയിൽ എത്തിക്കാൻ സംവിധാനമൊരുക്കിയിട്ടുണ്ട്​. വിവിധ എമിറേറ്റുകളിലെ കീഴ്ഘടകങ്ങളുടെ കീഴിൽ തുടർന്നുള്ള ദിവസങ്ങളിലും വിമാനങ്ങൾ കേരളത്തിലേക്കു പുറപ്പെടും. കൂടുതൽ സർവീസ് ലഭ്യമാക്കാനുള്ള ചർച്ചകൾ പുരോഗമിക്കുന്നതായി നാഷണൽ കമ്മിറ്റി പ്രസിഡൻറ്​ ഡോ. പുത്തൂർ റഹ്മാൻ, ജന:സെക്രട്ടറി നിസാർ തളങ്കര ചാർട്ടഡ് ഫ്ലൈറ്റ് കോ-ഓർഡിനേറ്റർ ഫൈസൽ അഴീക്കോട് എന്നിവർ അറിയിച്ചു.

ആദ്യ ടിക്കറ്റ് യു.എ.ഇ കെ.എം.സി.സി  രക്ഷാധികാരി എ.പി ശംസുദ്ദീൻ ബിൻ മുഹിയിദ്ദീൻ വിതരണം ചെയ്തു. ചടങ്ങിൽ ഷാർജ കെ.എം.സി.സി ആക്ടിങ് പ്രസിഡൻറ്​ കബീർ ചെന്നക്കര, ജനറൽ സെക്രട്ടറി ചാക്കിനത് ഖാദർ എന്നിവർ സന്നിഹിതരായിരുന്നു. സംസ്ഥാന മുസ്ലീം ലീഗ് നേതാക്കളായ പാണക്കാട്​ ഹൈദരലി ശിഹാബ് തങ്ങൾ, പി.കെ.കുഞ്ഞാലിക്കുട്ടി,  സാദിഖലി ശിഹാബ് തങ്ങൾ എന്നിവരുമായി കെ.എം.സി‌.സി രക്ഷാധികാരി എ.പി ശംസുദ്ധീൻ ബിൻ മുഹിയുദ്ധീൻ, പ്രസിഡൻ്റ് ഡോ.പുത്തൂർ റഹ്മാൻ, പി.കെ അൻവർ നഹ, ഡോ. അൻവർ അമീൻ ചേലാട്ട്​ എന്നിവർ നടത്തിയ ചർച്ചയുടെ അടിസ്ഥാനത്തിൽ ചാർട്ടഡ് ഫ്ലൈറ്റുകളുടെ അനുമതിക്കായി അപേക്ഷ സമർപ്പിച്ചിരുന്നു. ശേഷം പി.കെ.കുഞ്ഞാലിക്കുട്ടി എം.പി.യുടെ ഡൽഹി ഓഫീസ് നടത്തിയ നീക്കമാണ് സർവീസുകൾ വേഗത്തിലാക്കാൻ സഹായകമായതെന്ന്​ നേതാക്കൾ അറിയിച്ചു.