സാമ്പത്തിക, ടൂറിസം മേഖലയിൽ ബന്ധം ശക്തമാക്കാൻ യു.എ.ഇ-ഇസ്രായേൽ ധാരണ

ദുബൈ: സാമ്പത്തിക, ടൂറിസം മേഖലയിൽ ബന്ധം ശക്​തമാക്കാൻ യു.എ.ഇയും ഇസ്രായേലും ധാരണയിലെത്തി. ഇസ്രായേൽ ടൂറിസംമന്ത്രി യോവൽ റാസ്​വസോവി‍ന്റെ യു.എ.ഇ സന്ദർശനത്തോടനുബന്ധിച്ചാണ്​ ഇതുസംബന്ധിച്ച ധാരണയിൽ ഒപ്പുവെച്ചത്​. യു.എ.ഇ എമിറേറ്റ്സ് ടൂറിസം കൗൺസിൽ ചെയർമാനും സംരംഭകത്വ-ചെറുകിട, ഇടത്തരം വ്യവസായ സഹമന്ത്രിയുമായ അഹ്​മദ്​ അൽ ഫലാസിയുമായി നടന്ന ചർച്ചക്കുശേഷമാണ്​ കരാറിലെത്തിയത്​. 2020സെപ്​റ്റംബറിൽ ഒപ്പുവെച്ച അബ്രഹാം കരാറി‍ന്റെ അടിസ്ഥാനത്തിലാണ്​ ഇരു രാജ്യങ്ങളും തമ്മിലെ ബന്ധം ശക്​തമാക്കുന്നത്​. അബ്രഹാം കരാറിന്​ ശേഷം ഇരു രാജ്യങ്ങളും തമ്മിലെ വ്യാപാരം ഒരു വർഷത്തിനിടയിൽ 700മില്യണിലെത്തിയതായി നേരത്തേ അധികൃതർ വെളിപ്പെടുത്തിയിരുന്നു.

സമീപ കാലത്തെ വിവിധ സഹകരണ കരാറുകൾ യു.എ.ഇയുമായുള്ള ബന്ധത്തിൽ ചരിത്രപരമായ തുടക്കങ്ങൾക്ക്​ കാരണമായതായി കരാറിൽ ഒപ്പിട്ട ഇസ്രയേൽ മന്ത്രി റാസ്​വസോവ്​ അഭിപ്രായപ്പെട്ടു. ഇരു രാജ്യങ്ങളും തമ്മിൽ ടൂറിസം മേഖലയിൽ ശക്​തമായ സഹകരണത്തിന്​ കരാർ തുടക്കം കുറിക്കും. മാർക്കറ്റിങ്​, പ്രൊമോഷണൽ പ്രവർത്തനങ്ങളിലെ സഹകരണം, ട്രാവൽ ഏജന്‍റുമാർക്കും ടൂറിസം വ്യവസായത്തിലെ മറ്റുള്ളവർക്കും വേണ്ടി വന്‍റുകൾ സംഘടിപ്പിക്കൽ എന്നിവ ഇരുരാജ്യങ്ങളും സഹകരിച്ച്​ നടപ്പാക്കും -അദ്ദേഹം കൂട്ടിച്ചേർത്തു. എക്സ്​പോയിലെ ഇസ്ര​ായേൽ പവിലിയനിൽ ഇരുരാജ്യങ്ങളും തമ്മിലെ ബിസിനസ്​ സഹകരണത്തിന്​ പ്രത്യേക സജ്ജീകരണം ഒരുക്കിയിട്ടുണ്ട്​.