സഹകരണം ശക്തമാക്കാൻ യു.എ.ഇ-ഇസ്രായേൽ ധാരണ

ദുബൈ: നയതന്ത്ര സഹകരണം കൂടുതൽ ശക്​തമാക്കാൻ യു.എ.ഇ-ഇസ്രായേൽ ധാരണ. ദ്വിദിന സന്ദർശനത്തിനെത്തിയ ഇസ്രായേൽ വിദേശകാര്യ മന്ത്രി യായിർ ലാപിഡും യു.എ.ഇ വിദേശകാര്യ-അന്താരാഷ്​ട്ര സഹകരണ വകുപ്പ്​ മന്ത്രി ശൈഖ്​ അബ്​ദുല്ല ബിൻ സായിദ്​ ആൽ നെഹ്​യാനും തമ്മിൽ നടന്ന കൂടിക്കാഴ്​ചയിലാണ്​ തീരുമാനം.

മേഖലയിലെ സമാധാനം, ക്വാറൻറീൻ ഒഴിവാക്കിയുള്ള യാത്ര എന്നിവ പ്രധാന ചർച്ചയായി. കഴിഞ്ഞ വർഷം സെപ്​റ്റംബറിൽ അബ്രഹാം കരാറിൽ ഒപ്പുവെച്ചശേഷം ഇരുരാജ്യങ്ങൾക്കുമിടയിൽ ഉണ്ടായ നയതന്ത്രവികാസം മന്ത്രിതലസംഘം പങ്കുവെച്ചു. മേഖലയുടെയും ഇരുരാജ്യങ്ങളുടെയും പ്രയോജനത്തിന്​ ബന്ധം ഗാഢമാക്കണമെന്ന്​ നേതാക്കൾ അഭിപ്രായപ്പെട്ടു.

സാമ്പത്തിക വികസനം, ചരക്കുസേവനങ്ങളുടെ സ്വതന്ത്ര​മായ ഒഴുക്ക്, എക്​സിബിഷൻ മേഖലകളിലെ സഹകരണം, വിവര-ഗവേഷണം പങ്കുവെക്കൽ, പ്രതിനിധിസംഘങ്ങളുടെ സന്ദർശനം, ചേംബർ ഓഫ്​ േകാമേഴ്​സ്​ സഹകരണം, കാർഷിക സാങ്കേതികവിദ്യയുടെ ഗവേഷണവും വികസനവും തുടങ്ങിയ വിഷയങ്ങളിൽ വിവിധ കരാറുകളും ഒപ്പുവെച്ചു. കരാർ നടപ്പാക്കാൻ സാമ്പത്തിക വകുപ്പ്​ മന്ത്രിമാരുടെ നേതൃത്വത്തിൽ സംയുക്​ത കമ്മിറ്റിക്ക്​ രൂപം നൽകാനും തീരുമാനിച്ചു. ഇരുരാജ്യങ്ങളും തമ്മിൽ സ്വതന്ത്ര വ്യാപാരക്കരാറിൽ ഒപ്പുവെക്കാൻ നടപടിക്രമങ്ങൾ ആരംഭിച്ചിട്ടുണ്ട്​. കോവിഡ്​ പ്രതിരോധത്തിൽ സഹകരണത്തിനും ഇരുരാജ്യങ്ങൾക്കുമിടയിൽ വാക്​സിൻ സ്വീകരിച്ചവരുടെ യാത്രക്ക്​ അനുമതി നൽകാനും തീരുമാനിച്ചു.

ആദ്യമായാണ്​ ഒരു ഇസ്രായേൽ മന്ത്രിതലസംഘം യു.എ.ഇ സന്ദർശിക്കുന്നത്​. ഇരുരാജ്യങ്ങളും തമ്മിലെ ബന്ധം അബ്രഹാം കരാറിന്​ ശേഷം സാധാരണനിലയിലായതോടെയാണ്​ സന്ദർശനത്തിന്​ സാഹചര്യമൊരുങ്ങിയത്​. ചൊവ്വാഴ്​ച അബൂദബിയിലെത്തിയ യായിർ ലാപിഡ്​ ഇസ്രായേൽ എംബസി ഓഫിസ്​ ഉദ്​ഘാടനം ചെയ്​തു. ബുധനാഴ്​ച എക്​സ്​പോ 2020യിലെ രാജ്യത്തി​െൻറ പവലിയൻ സന്ദർശിക്കുകയും ദുബൈയിലെ കോൺസുലേറ്റ്​ ഉദ്​ഘാടനവും നിർവഹിച്ചു. യു.എ.ഇയിലെ ആദ്യ ഇസ്രായേൽ കോൺസുലേറ്റാണിത്​. ഇരുരാജ്യങ്ങൾക്കുമിടയിലെ സഹകരണത്തി​െൻറ കേന്ദ്രമായി കോൺസുലേറ്റ്​ മാറുമെന്ന്​ യായിർ ലാപിഡ്​ പറഞ്ഞു.