ലോകകപ്പ്​ ആവേശത്തിലേക്ക്​ യു.എ.ഇയും

ദുബൈ: കാൽപന്ത്​ കളിയുടെ ലോകമാമാങ്കത്തിലേക്ക്​ കണ്ണും കാതും കൂർപ്പിച്ച്​ യു.എ.ഇയും. അയൽപക്കത്ത്​ നടക്കുന്ന ലോകമേളയെ ഏറ്റെടുക്കാനുള്ള ഒരുക്കത്തിലാണ്​ യു.എ.ഇയിലെ കായിക ലോകവും. ലോകകപ്പ്​ ട്രോഫിയുടെ വിദേശരാജ്യങ്ങളിലെ പ്രയാണത്തിന്‍റെ തുടക്കം ദുബൈയിൽ നിന്നായിരുന്നു. ജി.സി.സിയിൽ നടക്കുന്ന പ്രഥമ ലോകകപ്പിൽ ദുബൈയുടെ സ്ഥാനമെന്താണെന്ന്​ വിളിച്ചറിയിച്ചാണ്​ ട്രോഫി പ്രയാണം തുടങ്ങിയത്​. ലോകകപ്പുമായി ബന്ധപ്പെട്ട നിരവധി പരിപാടികൾക്ക്​ വരും ദിനങ്ങളിലും ദുബൈ നഗരം സാക്ഷ്യം വഹിക്കുമെന്നുറപ്പ്​.

ഖത്തർ ലോകകപ്പിലേക്കെത്തുന്ന കാണികളിൽ നല്ലൊരു ശതമാനവും യു.എ.ഇയും സന്ദർശിക്കുമെന്ന്​ ഫിഫ പ്രസിഡന്‍റ്​ ഇൻഫെന്‍റിനോ അടുത്തിടെ പറഞ്ഞിരുന്നു. ചെറിയ രാജ്യമായ ഖത്തറിൽ സന്ദർശകർക്ക്​ താമസിക്കാൻ പരിമിതമായ സൗകര്യമാണുള്ളത്​. ഈ സാഹചര്യത്തിൽ, കാണികളിൽ ന​ല്ലൊരു ശതമാനവും യു.എ.ഇയിൽ താമസയിടം തേടിയെത്തും. വിമാനത്തിൽ മുക്കാൽ മണിക്കൂർ കൊണ്ട്​ യു.എ.ഇയിൽ നിന്ന്​ ദോഹയിൽ എത്താൻ കഴിയും. വിസ നടപടികൾ അനായാസം നടക്കും. കൂടുതൽ വിമാനങ്ങൾ സർവീസ്​ നടത്തി നിരക്കിളവ്​ പ്രാബല്യത്തിലാക്കുമെന്നും കാണികൾ പ്രതീക്ഷിക്കുന്നു. യൂറോപ്​ ഉൾപെടെയുള്ള വിദേശ രാജ്യങ്ങളിൽ നിന്നെത്തുന്ന കാണികൾക്ക്​ ഖത്തറും യു.എ.ഇയും ഒരുമിച്ച്​ സന്ദർശിക്കാനുള്ള അവസരമായിരിക്കും ഈ ലോകകപ്പ്​ ഒരുക്കുക.

ഹോട്ടൽ ഹോസ്പിറ്റാലിറ്റി മേഖലയും പ്രതീക്ഷയിലാണ്​. എക്സ്​പോ നൽകിയ ഊർജം ഹോട്ടൽ മേഖലക്ക്​ ഉണർവേകിയിരുന്നു. എന്നാൽ, എക്സപോ കഴിഞ്ഞ്​ വേനൽകാലമായതോടെ റസ്റ്റാറൻറുകൾക്ക്​ ചെറിയ ക്ഷീണം തട്ടിയിട്ടുണ്ട്​. ലോകകപ്പ്​ എത്തുന്നതോടെ ഈ അവസ്ഥക്ക്​ മാറ്റമുണ്ടായി വീണ്ടും ഉണർവിലേക്കെത്തുമെന്നാണ്​ പ്രതീക്ഷ. ഇതിന്‍റെ സൂചനയായി നവംബർ മാസങ്ങളിൽ ഹോട്ടൽ ബുക്കിങ്ങുകൾ തുടങ്ങിയിട്ടുണ്ട്​. എന്നാൽ, ലോകകപ്പിനോട്​ അടുക്കുമ്പോഴായിരിക്കും കൂടുതൽ ബുക്കിങ്​ എത്തുക. വിസയും ടിക്കറ്റും ഉൾപെട്ട പാക്കേജുകളും ഹോട്ടലുകൾ തയാറാക്കുന്നുണ്ട്​.

റോഡ്​ മാർഗവും ഖത്തറിലേക്ക്​ പോകാം എന്നത്​ മറ്റൊരു സൗകര്യമാണ്​. സൗദി വഴി അതിർത്തി കടന്ന്​ ഖത്തറിലെത്താം. ഇത്തരം പാക്കേജുകളും വരും ദിവസങ്ങളിൽ അവതരിപ്പിക്കപ്പെടും. എക്​പോ നഗരിയായ ഡിസ്​ട്രിക്ട്​ 2020 കൂടി യാഥാർഥ്യമാകുന്നതോടെ യു.എ.ഇയിലെത്താനുള്ള ആവേശവും കൂടും.

ഇതിലെല്ലാമുപരി, യു.എ.ഇ ഫുട്​ബാൾ ടീം ലോകകപ്പിന്​ യോഗ്യത നേടുമെന്ന പ്രതീക്ഷയും ഈ രാജ്യത്തിന്‍റെ ആവേശം ഇരട്ടിപ്പിക്കുന്നു. രണ്ട്​ മത്സരങ്ങൾ കൂടി ജയിച്ചാൽ യു.എ.ഇക്ക്​ ഖത്തർ ലോകകപ്പ്​ യോഗ്യത ലഭിക്കും. പക്ഷെ, രണ്ടും കരുത്തരായ എതിരാളികളാണ്​. ജൂൺ ഏഴിന് നടക്കുന്ന ​േപ്ല ഓഫിൽ​ ആസ്​ട്രേലിയയാണ്​ യു.എ.ഇയുടെ ആദ്യ എതിരാളികൾ. ജീവൻമരണ പോരാട്ടത്തിൽ പരാജയപ്പെട്ടാൽ യു.എ.ഇ യോഗ്യത നേടാതെ പുറത്താവും. ജയിച്ചാൽ, ജൂൺ 13ന്​ പെറുവിനെ നേരിടാം.

ലാറ്റിൻ അമേരിക്കയിൽ ബ്രസീലിനെയും അർജന്‍റീനയെയും ​വിറപ്പിക്കുന്ന പെറുവിനെ മറികടക്കുക എന്നത്​ അത്ര എളുപ്പമല്ല. എന്നാൽ, കഴിഞ്ഞ യോഗ്യത മത്സരത്തിൽ ദക്ഷിണ കൊറി​യയെ തോൽപിച്ച യു.എ.ഇക്ക്​ ഇത്​ അസാധ്യമായ കാര്യവുമല്ല. ഖത്തറിലെ അഹ്​മദ്​ ബിൻ അലി സ്​റ്റേഡിയത്തിലാണ്​ മത്സരം. ഈ മത്സരവും ജയിച്ചാൽ യു.എ.ഇക്ക്​ ഖത്തർ ലോകകപ്പിൽ പന്തുതട്ടാം. ഗ്രൂപ്പ്​ ഡിയിൽ ലോകചാമ്പ്യൻമാരായ ഫ്രാൻസിനും ഡെൻമാർക്കിനും ടുണീഷ്യക്കുമൊപ്പമായിരിക്കും ഈ മത്സരത്തിലെ വിജയികൾ കളിക്കുക.

ലോകകപ്പ്​ ട്രോഫി പര്യടനത്തിനായി വീണ്ടും യു.എ.ഇയിൽ എത്തുമെന്നാണ്​ പ്രതീക്ഷ. കഴിഞ്ഞ ദിവസം കാണികൾക്ക്​ ട്രോഫി കാണാൻ അവസരമുണ്ടായിരുന്നില്ല. ലോക പര്യടനത്തിന്​ ശേഷം വീണ്ടും യു.എ.ഇയിൽ എത്തി കാണികൾക്ക്​ മുന്നിൽ പ്രദർശിപ്പിക്കുമെന്നാണ്​ പ്രതീക്ഷിക്കുന്നത്​.