ആഗോള മികവ്​: മേഖലയിൽ  യു.എ.ഇ ഒന്നാമത്​ ആഗോളാടിസ്​ഥാനത്തിൽ ഏഴാമത്​

അബൂദബി: സ്വിറ്റ്​സർലൻഡ്​ ആസ്​ഥാനമായി പ്രവർത്തിക്കുന്ന ഇൻസാറ്റിയേറ്റ്​ ഒാഫ്​ മാനേജ്​മ​​െൻറ്​ ഡെവലപ്​മ​​െൻറ്​ (​െഎ.എം.ഡി) പുറത്തിറക്കിയ ‘ആഗോള മികവ്​ ഇയർ ബുക്ക്​ 2018’ൽ മിഡിലീസ്​റ്റ്​ മേഖലയിൽ യു.എ.ഇ ഒന്നാമത്​. ആഗോളാടിസ്​ഥാനത്തിൽ ഏഴാം സ്​ഥാനവും രാജ്യം നേടി. 2011നെ ​അപേക്ഷിച്ച്​ 21 റാങ്കുകളാണ്​ യു.എ.ഇ മുന്നേറിയിരിക്കുന്നത്​. സ്വീഡൻ, നോർവേ, കാനഡ രാജ്യങ്ങളെ സാമ്പത്തിക മുന്നേറ്റത്തിൽ മികച്ച പ്രകടനമാണ്​ യു.എ.ഇയുടേത്​. 
സർക്കാർ തീരുമാനങ്ങൾ, പൊതു-സ്വകാര്യ പങ്കാളിത്തം, തൊഴിൽ, അന്താരാഷ്​ട്ര പ്രാഗൽഭ്യം തുടങ്ങി വിവിധ സൂചകങ്ങളിൽ യു.എ.ഇ ആഗോളാടിസ്​ഥാനത്തിൽ ഒന്നാമതായി. വ്യാപാര കാര്യക്ഷമതയിൽ രണ്ടാം സ്​ഥാനവും സാമ്പത്തിക വൈവിധ്യവത്​കരണം, നഗര കൈകാര്യകർതൃത്വം എന്നിവയിൽ മൂന്നാം സ്​ഥാനവും ഉൗർജ സംവിധാനം, സാ​േങ്കതികവിദ്യയുടെ വികസനവും ഉപയോഗവും എന്നിവയിൽ നാലാം സ്​ഥാനവും രാജ്യം നേടി. 

മേഖലയിൽ ഒന്നാമതുള്ള യു.എ.ഇയുടെ പരിചയസമ്പത്ത്​ ആഗോളാടിസ്​ഥാനത്തിലെ ഒന്നാം റാങ്കിലേക്ക്​ നയിക്കുമെന്ന്​ യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂം പറഞ്ഞു. ബിസിനസ്​ സാഹചര്യം, അടിസ്​ഥാന സൗകര്യം, പ്രകൃതി വിഭവങ്ങൾ എന്നിവയുടെ ശാക്​തീകരണം തങ്ങൾ തുടരും. കാരണം പൗരന്മാർക്കും യു.എ.ഇയിലെ എല്ലാ താമസക്കാർക്കും മികച്ച ജീവിതം നൽകുകയെന്നത്​ തങ്ങളുടെ ആവശ്യമാണെന്നും അദ്ദേഹം കൂട്ടിച്ചേർത്തു.  

‘ആഗോള മികവ്​ ഇയർ ബുക്ക്​ 2018’ൽ ഒന്നാം സ്​ഥാനം അമേരിക്കക്കാണ്​. ഹോ​േങ്കാങ്​, സിംഗപ്പൂർ, നെതർലാൻഡ്​സ്​, സ്വിറ്റ്​സർലാൻഡ്​ എന്നിവയാണ്​ ആദ്യ അഞ്ച്​ സ്​ഥാനങ്ങളിലെത്തിയ മറ്റു രാജ്യങ്ങൾ. മൊത്തം 63 രാജ്യങ്ങളെയാണ്​ പട്ടികയിൽ ഉൾപ്പെടുത്തിയിരിക്കുന്നത്​. യു.എ.ഇക്ക്​ പുറമെ ഖത്തർ, സൗദി അറേബ്യ എന്നീ ജി.സി.സി രാജ്യങ്ങളും പട്ടികയിലുണ്ട്​.ഖത്തറിന്​ 14, സൗദി അറേബ്യക്ക്​ 39 റാങ്കുകളാണ്​. യു.എ.ഇ പത്തിൽനിന്ന്​ ഏഴിലേക്കും ഖത്തർ 17ൽനിന്ന്​ 13ലേക്കും റാങ്ക്​ ഉയർത്തിയപ്പോൾ സൗദിയുടെ റാങ്ക്​ 36ൽനിന്ന്​ 39ലേക്ക്​ താഴ്​ന്നു. 44 ആണ്​ ഇൗ വർഷം ഇന്ത്യയുടെ റാങ്ക്​. കഴിഞ്ഞ വർഷം 45 ആയിരുന്നു.