സന്നദ്ധപ്രവർത്തനം ക്രമീകരിക്കാൻ ദുബൈയിൽ നിയമം

ദുബൈ: ദുബൈയിലെ സന്നദ്ധ പ്രവർത്തനങ്ങളുടെ ക്രമീകരണത്തിന്​ യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂം നിയമം പുറപ്പെടുവിച്ചു. സന്നദ്ധപ്രവർത്തനങ്ങൾ ക്രമീകരിച്ച്​ സമൂഹത്തിലെ സാമൂഹിക ഉത്തരവാദിത്തങ്ങൾ പ്രോത്സാഹിപ്പിക്കുക, ക്രിയാത്​മക സാമൂഹിക പ്രവർത്തനങ്ങൾ ഉത്തേജിപ്പിക്കുക, സമൂഹത്തെ സേവിക്കാൻ ജനങ്ങളെ ​പ്രേരിപ്പിക്കുക തുടങ്ങിയ ലക്ഷ്യങ്ങ​േളാടെയാണ്​ നിയമം അവതരിപ്പിച്ചത്​. 

സന്നദ്ധ പ്രവർത്തന ക്രമീകരണത്തിന്​ ആവശ്യമായ നയങ്ങളും പദ്ധതികളും നടപ്പാക്കാൻ നിയമം ദുബെ സാമൂഹിക വികസന അതോറി​റ്റിയെ (സി.ഡി.എ) ചുതമലപ്പെടുത്തി. സന്നദ്ധ പ്രവർത്തനം സംഘടിപ്പിക്കുകയോ സ്​പോൺസർ ചെയ്യുകയോ ചെയ്യുന്ന സ്​ഥാപനങ്ങൾ സി.ഡി.എയിൽനിന്ന്​ നിർബന്ധമായും അനുമതി നേടിയിരിക്കണമെന്ന്​ നിയമം വ്യക്​തമാക്കുന്നു. സന്നദ്ധപ്രവർത്തകർക്ക്​ കൂട്ടായ്​മ രൂപവത്​കരിച്ച്​ പ്രവർത്തനങ്ങളിൽ ഏ​ർപ്പെടാമെന്ന്​ പറയുന്ന നിയമം ഇത്തരം കൂട്ടായ്​മകൾ സി.ഡി.എയിൽ രജിസ്​റ്റർ ചെയ്യാമെന്നും ആവശ്യമായ എല്ലാ അനുമതികളും നേടിയിരിക്കണമെന്നും നിഷ്​കർഷിക്കുന്നു. സി.ഡി.എയിൽനിന്ന്​ അനുമതി നേടാതെ സന്നദ്ധസംഘത്തിന്​ ധനശേഖരണം നടത്താനോ ഏതെങ്കിലും മാധ്യമങ്ങളിലൂടെ പരസ്യം ചെയ്യാനോ അവകാശമില്ല. 
സന്നദ്ധ പ്രവർത്തനങ്ങൾ സംഘടിപ്പിക്കുന്ന സർക്കാർ^സ്വകാര്യ സ്​ഥാപനങ്ങൾ പ്രർത്തനങ്ങളും മാനദണ്ഡങ്ങളും നിയമങ്ങളും നിർവചിക്കുകയും അവയുടെ ഒരു പകർപ്പ്​ സി.ഡി.എക്ക്​ സമർപ്പിക്കുകയും ചെയ്യണം. 

സന്നദ്ധ പ്രവർത്തന വിഭാഗവും സ്വഭാവവും വ്യക്​തമാക്കുകയും ആവശ്യമെങ്കിൽ പ്രവർത്തനം നടത്താനുള്ള പരിശീലനം സന്നദ്ധ പ്രവർത്തകർക്ക്​ നൽകുകയും വേണം. സന്നദ്ധ പ്രവർത്തകരുടെ പേര്​, വ്യക്​തിവിവരങ്ങൾ, അവർ ചെയ്​ത പ്രവർത്തനങ്ങളുടെ സ്വഭാവം, പ്രവൃത്തിയുടെ സമയദൈർഘ്യം തുടങ്ങിയ വിവരങ്ങൾ സ്​ഥാപനങ്ങൾ രേഖപ്പെടുത്തിവെക്കണം. ഇത്തരം വിവരങ്ങളും സി.ഡി.എയുടെ വിവരശേഖരത്തിൽ രജിസ്​റ്റർ ചെയ്യണം. 
സന്നദ്ധ പ്രവർത്തകർക്ക്​ ആവശ്യമായ ഉപകരണങ്ങളും സുരക്ഷാ സംവിധാനങ്ങളും ലഭ്യമാക്കണം. പരിക്ക്​, പകർച്ചവ്യാധി തുടങ്ങിയവക്കെതിരെ ഇൻഷുറൻസ്​ പരിരക്ഷ നൽകണം. സി.ഡി.എ പുറത്തിറക്കുന്ന സന്നദ്ധ സേവന കരാറിൽ പ്രവർത്തകർ ഒപ്പിടണം. സന്നദ്ധ പ്രവർത്തകനും സ്​ഥാപനവും തമ്മിലുള്ള ബന്ധം ഇൗ കരാറിൽ വ്യക്​തമാക്കണം. 

സന്നദ്ധപ്രവർത്തകർ 18 വയസ്സിന്​ മുകളിലുള്ളവരായിരിക്കണമെന്നും നിയമം അനുശാസിക്കുന്നു. 18 വയസ്സിൽ കുറഞ്ഞവരെ സന്നദ്ധപ്രവർത്തനത്തിന്​ ഉപയോഗപ്പെടുത്തുന്നുണ്ടെങ്കിൽ രക്ഷിതാക്കളുടെ അനുമതി നേടിയിരിക്കണം. നല്ല സ്വഭാവവും ശാരീരികക്ഷമതയും സി.ഡി.എയിൽ വളണ്ടിയർ രജിസ്​​ട്രേഷൻ നടത്തിയവരെയും മാത്രമേ സന്നദ്ധ പ്രവർത്തനങ്ങൾക്ക്​ നിയോഗിക്കാവൂ. സന്നദ്ധ പ്രവർത്തന കരാറുമായി ബന്ധപ്പെട്ട പരാതികളും അന്യായങ്ങളും പരിശോധിക്കാൻ സി.ഡി.എ ഡയറക്​ടർ ജനറൽ വളണ്ടിയർകാര്യ കമ്മിറ്റി രൂപവത്​കരിക്കും. ഒൗദ്യോഗിക വിജഞാപനത്തിൽ ഇൗ നിയമം പ്രസിദ്ധീകരിക്കുകയും പ്രസിദ്ധീകരിച്ച തീയതി മുതൽ പ്രാബല്യത്തിലായതായി കണക്കാക്കുകയും ചെയ്യും.